Еристи уæлахезонтæ (галеуæрдигæй рахесæрдæмæ) БИЧЕГКУТИ Идæ, ЕЛОЙТИ Дианæ, МÆРГЪИТИ Эльмирæ.

Ӕрӕги Дзӕуӕгигъӕуи центр «Сӕуӕхсид»-и арӕзт ӕрцудӕй Еугуруӕрӕсеуон конкурс «Цард – ӕгас классикӕ»-йи регионалон ӕркаст. Архайдтонцӕ си нӕ республики еугур районтӕй 5-11 кълӕсти аст ӕма инсӕй скъоладзауи.

Аци цӕмӕдессаг еристи фӕууӕлахез ӕй Дигори райони сувӕллӕнтти исфӕлдистадон Хӕдзари ахурдзау Елойти Дианӕ. Дуккаг ӕма ӕртиккаг бунӕттӕ ба си байахӕстонцӕ Дзӕуӕгигъӕуи 25-аг скъолай ӕма Беслӕни И. Канидийи номбӕл скъола-интернати ахурдзау Бичегкути Идӕ ӕма Мӕргъити Эльмирӕ.

Уомӕй уӕлдай, конкурси хатдзӕгтӕмӕ гӕсгӕ рабӕрӕг ӕнцӕ лауреаттӕ: Аслӕмурзати Батрадз, Аннӕ Чениб, Губати Дзерассӕ, Зӕгъойти Сӕрмӕт, Дзарасти Камиллӕ, Калоти Сарӕ ӕма Меланья Герасименко.

Конкурси регионалон хаййи архайдтонцӕ республики еугур районтӕй 5-11-аг кълӕсти 28 скъоладзауи. Конкурсантти архайдӕн аргъ ка кодта, еци дӕсни жюрий сӕргъи адтӕй педагогон наукити кандидат, дзурди культури специалист Надеждӕ Воробьева. Ӕма е загъта:

– Адӕймаги зунди ирӕзтӕн агъазгӕнӕг киунугӕ кӕд бакӕсуй адӕймаг, уӕлдайдӕр ба кӕстӕр, уӕд ӕ зонундзийнадӕ зингӕ фӕгъгъӕздугдӕр уй. Киунугӕ нӕ цардӕй еуварсгӕнгӕ ӕгириддӕр нӕй. Киунугӕ ка уарзуй ӕма сӕ ка кӕсуй, еугур еци ахургӕнгутӕ, зундамонгутӕ ӕма ахурдзаутӕй боз дӕн ӕма син зӕрдиагӕй арфӕ кӕнун.

Аци конкурси регионалон ӕркасти уӕлахездзаутӕ архайдзӕнӕнцӕ Еугуруӕрӕсеуон кӕронбӕттӕн еристи.

Еугуруӕрӕсеуон конкурси бундорӕвӕрӕг ӕй Фонд «Цардӕгас классикӕ», конкурси регионалон хаййӕн ба фадуӕттӕ исаразта Цӕгат Иристони ахурадӕ ӕма науки министрадӕ.

Конкурс арӕзт цӕуй киунугутӕ кӕсунмӕ скъоладзаути исразӕнгард кӕнун ӕма син сӕ зонундзийнӕдтӕ фӕффулдӕр кӕнунӕн.