05 октября 2022

«КУД РАЗАМОНГУТӔ, УОТӔ ДЗУАПДӔТТӔГ АЙТӔ АДӔМИ РАЗМӔ!..»

30.09.2021 | 10:36

Уӕрӕсей Федераций Президент Владимир Путинӕн
регионти нӕуӕг ӕвзурст сӕргълӕугути хӕццӕ видеобастдзийнади фӕрци адтӕй фембӕлд.

Архайдта си Сергей Меняйло дӕр, – уой нӕ республики Парламент 19 сентябри равзурста Республикӕ Цӕгат Иристон-Аланий Сӕргълӕууӕгӕй. Бӕсти Президент ӕ радзубандий райарфӕ кодта разамонгутӕн, комкоммӕ сӕ кустӕй адӕмӕн дзуапп ке дӕттунцӕ, уой бафеппайдта. Бӕлвурдӕй син бафӕдзахста:

– Алкӕмӕ дӕр уи ес кусти фӕлтӕрддзийнадӕ, хъӕбӕр вазуггин ӕй, берӕ хъаурӕ домуй, цӕргути рази бӕрнон ке айтӕ, уой гъӕуама лӕдӕрайтӕ. Се ‘ууӕнкӕн син гъӕуама алли бон дӕр дзуапп дӕттайтӕ, гъӕуама косайтӕ уони туххӕй, уӕ дустӕ бахатгӕй, уӕ зӕрдӕ ӕма уӕ уоди хъаурити фӕрци. Уӕхӕн бӕрзонд бунати ке айтӕ, уой син гъӕуама алли бон бӕлвурд гъуддӕгутӕй амонайтӕ. Тӕккӕ карздӕр социалон, экономикон фарстатӕ лух кӕнунмӕ разамунддӕтгути хъауритӕ исаразетӕ.

Национ проекттӕ цӕйбӕрцӕбӕл ӕнӕкъулумпитӕ ӕма ӕнӕгъӕнӕй ӕнхӕстгонд цӕунцӕ, уомӕ гъӕуама разамонгутӕ алкӕддӕр сӕ гъос даронцӕ. Сувӕллонгин бийнонтӕн ӕма граждӕнти ӕндӕр категоритӕн, минкъий ӕма рӕстӕмбес амалгъонади минӕвӕрттӕн бунӕтти куд агъаз кӕнунцӕ, коронавируси хӕццӕ куд тох кӕнунцӕ, уонӕмӕ гъӕуама уонцӕ къӕрцгъос.

– Кусти бунӕтти хӕццӕ уавӕрмӕ устур ӕргом гъӕуй ӕздахун, – баханхӕ кодта Владимир Путин. – Аци рауӕн – фӕсевӕд ӕма пенсий агъоммӕ адӕммӕ. Сӕйраг стратегион пълантӕ ӕнхӕст кӕнун нӕ бӕсти ирӕзтбӕл хъӕбӕр фӕззиндзӕнӕй, царди сӕ уадзунцӕ бунӕтти, регионти. Сӕ бӕрӕггӕнӕнти туххӕй сумах айтӕ адӕмӕн дзуапдӕттӕг, етӕ уӕ кустӕн аргъ кӕндзӕнӕнцӕ. Царди сӕ рауадзунмӕ фулдӕр адӕми ӕргом раздахетӕ, граждайнаг ӕхсӕнади институти хӕццӕ уоми гъӕуама ӕмгустадӕ уа.

Кӕронбӕттӕни Президент фембӕлди архайгутӕн райарфӕ кодта, ӕ зӕрдӕ син агъазиау ӕнтӕстдзийнӕдтӕ ке зӕгъуй, уой фӕббӕрӕг кодта.