Фиццагкезуй национ проект «Культури» мадзӕлттӕ Цӕгат Иристони ӕнхӕстгонд цӕунцӕ бӕлвурд фӕткӕмӕ гӕсгӕ. Уӕхӕн хатдзӕгмӕ ӕрцудӕнцӕ Цӕгат Иристони Хецауади Сӕрдар Тускъати Таймораз ӕма Уӕрӕсей Федераций культури министри хуӕдӕййевӕг Владимир Осинцев, ӕрӕги син ци фембӕлд адтӕй, уой рӕстӕг сӕ бӕстон дзубандий, уӕдта исбӕлвурд кодтонцӕ, исаразуйнаг ма ци ес ӕма уомӕн ци гӕнӕнтӕ ӕма равгитӕ гъӕуй, уой дӕр.

Зундгонд куд ӕй, уотемӕй Уӕрӕсей Федераций Хецауадӕ исфедар кодта Цӕгат Иристони социалон-экономикон райрӕзтӕн файйгъаз кӕнуни туххӕй ӕнӕмӕнгӕ ка гъӕуй, уӕхӕн мадзӕлтти  сӕрмагонд номхигъд. Еци документти бундорбӕл республики арӕзт ӕма цалцӕггонд цӕудзӕнӕнцӕ ахсгиаг социалон объекттӕ. Се ’хсӕн – культури аллихузон косӕндӕнттӕ дӕр.

Тускъай-фурт ӕ радзубандий куд байамудта, уотемӕй уонӕй еу ӕй сахар Алагири культури Хӕдзарӕ «Фӕскомцӕдесон»-и райарӕзт. Аци объекти цалцӕггӕнӕн кустити туххӕй еугур гъӕугӕ гӕгъӕдитӕ дӕр республикӕ афойнадӕбӕл бацӕттӕ кодта ӕма сӕ балӕвардта Уӕрӕсей Федераций культури Министрадӕмӕ.

Анзи кӕронмӕ федералон министрадӕмӕ ӕрвист ӕрцӕудзӕнӕнцӕ Елхотти культурон ирӕзти Центри арӕзтади фӕдбӕл гъӕугӕ проектон-хӕрзти гӕгъӕдитӕ дӕр.

Ахсгиаг культурон объектти номхигъдмӕ хаст ӕрцудӕй Беслӕни фӕсевӕди Галауани райарӕзт, сувӕллӕнтти аййевадон ӕма музыкалон скъолати, уӕдта ӕндӕр косӕндӕнтти арӕзтӕдтӕ дӕр. Еугур еци объектти туххӕй проектон-хӕрзти гӕгъӕдитӕ нуртӕккӕ ’нцӕ паддзахадон экспертизи служби. Еци служби хатдзӕги фӕсте ба бӕлвурдгонд ӕрцӕудзӕнӕй ранимад объектти арӕзтади фӕткӕ.

Цӕгат Иристони Хецауади Сӕрдари дзубандимӕ гӕсгӕ, фӕстаг цалдӕр анзей дӕргъи республики культури къабази фӕззиндтӕй берӕ нӕуӕг объекттӕ. Уони еу хай ӕрбунӕттон ӕй идӕрддзӕф хуӕнхаг рауӕнти дӕр. Еци гъуддаг идарддӕр рапарахатдӕр кӕнунбӕл ӕновудӕй архайуй республики Сӕргълӕууӕг Битарти Вячеслав, Уӕрӕсей Федераций Хецауади Сӕрдари хуӕдӕййевгутӕ ӕма федералон ведомствити хӕццӕ ӕнгом ӕмгустадӕ кӕнгӕй.

Тускъати Таймораз федералон министради бӕрнон косӕги ӕргом раздахта цалдӕр лухкӕнуйнаг фарстамӕ дӕр. Ӕ дзубандимӕ гӕсгӕ, бундоронӕй райаразуйнаг ӕнцӕ районти центрти культури галауантӕ дӕр. Уонӕй, фиццаги-фиццагидӕр, цалцӕгкӕнуйнаг ӕнцӕ Ӕрӕдон ӕма Мӕздӕги районти культури Галауантӕ. Райаразуйнаг ӕй Цӕгат Иристони Тӕбӕхсаути Балой номбӕл академион театри азгъунст дӕр.

Фембӕлди архайгутӕ куд бадзубанди кодтонцӕ, уотемӕй, дзубанди ци фарстати фӕдбӕл цудӕй, уонӕн сӕ еугуремӕ дӕр лӕмбунӕг каст ӕрцӕудзӕнӕй. Ӕма сӕ гъӕугӕ хузи исӕнхӕст кӕнунӕн ӕнӕмӕнгӕ гъӕуама арӕзт ӕрцӕуа еугур гъӕугӕ мадзӕлттӕ дӕр.