Уæрæсей экономикон ирæзти министри хуæдæййевæг Сергей НАЗАРОВ (галеуæрдигæй) æма нæ республики Сæргълæууæг Сергей МЕНЯЙЛО комплекс «Мамисон»-и арæзтади.

Нæ республики Сæргълæууæг Сергей Меняйло Мæскуй косæг балций уогæй, архайдта Уæрæсей Хецауади Сæрдари хуæдæййевæг Александр Новак ци æмбурд искодта, уоми. Дзубанди си цудæй анзи дæргъи еугур афæнтти косæг туристон-рекреацион комплекс «Мамисон»-и ирæзти хæццæ. Æмбурди архайдтонцæ бæсти экономикон ирæзти, финансон министрадти, монополити нихмæ служби, Кавкази ирæзти институти, инвесторти æма банкти минæвæрттæ.

Сергей Меняйло раздæр бал Александр Новакæн радзурдта, республики бæрни ка ’й, еци мадзæлттæ куд конд цæунцæ, уой туххæй æма æ радзубандий баханхæ кодта:

– Уæлдай æргом æздахæн, нæхемæ ист ихæстæ царди куд уадзæн, уомæ. Аразæг организацитæмæ æма нæ Хецауадæмæ ци гъуддæгутæ хаунцæ, уонæмæ ан къæрцгъос. Арæзтадæ размæ цæуй, пъланти нисантæн сæ фулдæр хай конд æрцудæй. Циуавæрдæр зиндзийнæдти хæццæ дæр æмбæлæн, зæгъæн, цемент арæзтадæмæ æрласуни хæццæ. Фал сæ уайтæкки ралух кæнæн.

«Кавказ. УФ»-й генералон директор Андрей Юмашев куд фæббæрæг кодта, уотемæй исуйнаг курорти хуæнхон лыжитæбæл бурæн инфраструктурæ тагъд фæззиндзæнæй. Аразæг бал бавналдта хуæнхтæмæ хæрдмæ есæнтæ, бурæн трасситæ, медæггаг нæдтæ, хедтæ, берæфадуатгин комплекстæ, хуæдтолгитæ æвæрæнтæ аразунмæ. Кæд æма экономикон гæрæнтæ уойбæрцæ нæ уадзунцæ æвналун, уæддæр рæтæнти нæдтæн иссирдтонцæ гъæугæ хæйттæ.

Уæрæсей экономикон ирæзти министради хуæдæййевæг Сергей Назаров радзурдта, æ балци Цæгат Иристонмæ куд рауадæй, уой туххæй. Федералон ведомстви хатдзæгтæмæ гæсгæ, гъуддæгутæ цæунцæ графикмæ гæсгæ, фарстатæ уайтæккæ гъæугæ хузи райаразунцæ. Фæстæдæр дзубанди байахæстонцæ курорти дуккаг æма уомæй идарддæри арæзтади къæпхæнтæ, гъæуама испайда кæнонцæ инвесторти фæрæзнитæй.

Федералон Хецауади Сæрдари хуæдæййевæг Александр Новак куд фæббæрæг кодта, уотемæй Уæрæсей Президент æма Хецауади Сæрдар еудадзуг гъос дарунцæ туристон-рекреацион курорти арæзтадæмæ. Æма уой фæдбæл загъта:

– Е айдагъ Цæгат Кавкази нæ, фал бæсти Хонсайраг хаййи æй тæккæ размæцуддæр проект. Е бахездзæнæй «Эльбрус» æма «Архыз»-и æмрæнгъæмæ. Гъæуама еугур нисантæ дæр афойнадæбæл æма æмгъудтæмæ гæсгæ арæзт æрцæуонцæ.