Цæгат Иристони æ куст кæнуй «Фидибæстæн – службæ», зæгъгæ, патриотон акци. Аци хъæппæрес равдистонцæ уæрæсейаг æхсæнадæ «Зонундзийнæдтæ», «Фидибæстæ гъæуайгæнгутæ»-йи паддзахадон фонд.

Сувæллæнтти фæлладуадзæн лагерь «Стъалу»-мæ ’рбацудæнцæ сæрмагонд æфсæддон операций ветерантæ, æхсæнадæ «Зонундзийнæдтæ»-йи лектортæ, проект «СВОя история»-йи иуонгтæ Рубен Днепровский, Алибегти Роман, тугъдон уацхæссæг Илати Батраз. Етæ фембалдæнцæ сувæллæнтти хæццæ, дзурдтонцæ æнсувæрдзийнадæ, царди равзурст нæдтæ æма фæскъилдуни агъази туххæй.

Комкоммæ уагæй дзоргæй, дзубанди рауадæй тугъдон нæдтæбæл, æнсувæрдзийнадæ, лимæндзийнадæ, кæрæдземæн агъаз кæнун, тугъдон ихæсæн, бæстæн кадæ кæнунбæл. Æригæнттæн уæхæн фембæлд адтæй æхцæуæн, лæгдзийнади урок син æрхаста берæ æнкъарæнтæ, граждайнаг бæрнондзийнадæ.

Сувæллæнтти хæццæ дзурдта Рубен Днепровский – гвардий майор. Лæгдзийнади дууæ ордени – æ кительбæл, æ Райгурæн бæстæн службæ исбарæн ес фондз фæлтæрей хæццæ. Беслæни фидбилизи рæстæг Рубен Днепровский амæнати бахауæг адæми ервæзун кодта, адтæй Цæцæн æма Хонсар Иристони тугъдтити. Сæрмагонд æфсæддон операци ку райдæдта, уæд уордæмæ дæр рандæй. Тугъди будури цæфтæ райсунæй нæ тарстæ, зæгъгæ, фарстæн уæхæн дзуапп равардта: «Цæфтæй нæ тарстæн, айдагъдæр рист лæдæрдтæн. Айдагъдæр, тугъди будури æмбал ку фæммард уидæ, уæд тарстæн, уомæн æма ин мæ бон неци адтæй», – зæгъуй тугъдон лæг.

Алибегти Роман 2022 анзи равзурста æ над, иссæй батальон «Алани»-й бархеуон, цудæй херсойнаг, луганскаг æма донбассаг нæдтæбæл. Кæддæр еци зæнхитæ иссæребарæ кодтонцæ æ фиди фидтæлтæ, нур ба нæуæгæй тох кæнунцæ сабур арви сæрбæлтау. Тугъдон уацхæссæг Илати Батрадз документалон кинонивти фæрци «Стъалу»-й иуонгтæн равдиста тугъди будури тугъдон ихæс куд æнхæст кæнунцæ, уони.

Цæгатиристойнаг лæхъуæнтæ алли бон дæр æвдесунцæ багъæтардзийнадæ, ирæзгæ фæлтæри рохс федæни сæрбæлтау сæ цардбæл нæ ауæрдгæй.

Мария ТЕПЛИНСКАЯ,  Цæгат Кавкази федералон зилди уæрæсейаг æхсæнадæ «Зонундзийнæдтæ»-йи пресс-службæ.