Евгъуд анзи дуккаг ӕмбеси Цӕгат Иристони берӕфатерон цӕрӕн хӕдзӕрттӕ ӕма цалдӕр медицинон косӕндонеми ӕвӕрд ӕрцудӕй 100 нӕуӕг лифти.

Цӕрӕнуатон-коммуналон хӕдзаради, артаг ӕма энергетики министради дзубандимӕ гӕсгӕ, нӕуӕг техникон фӕрӕзнитӕй 93 ӕвӕрд ӕрцудӕнцӕ берӕфатерон цӕрӕн хӕдзӕртти, 7 ба – Дзӕуӕгигъӕуи ӕма Мӕздӕги медицинон косӕндӕнтти.

Специалисттӕ куд зӕгъунцӕ, уотемӕй нӕуӕг лифттӕ ефтонг ӕнцӕ еугур нуриккон домӕнти бундорбӕл. Нӕуӕг техникӕй ӕдӕрсгӕй пайда кӕнӕн ес, цӕстӕй лӕгъуз ка уинуй, кенӕ бустӕги хъӕрӕу ка ‘й, еци адӕмӕн – кабинити уӕладзгути туххӕй нисантӕ финст ӕнцӕ Брайли шрифтӕй, уӕдта сӕ автомат гъӕлӕсиуагӕй дӕр фӕлхат кӕнуй.

Министради минӕвари дзубандимӕ гӕсгӕ, анзи кӕрони ци лифттӕ исӕвардтонцӕ, етӕ нурма косунцӕ фӕлварӕни хузи. «Ростехнадзор»-и специалисттӕ нӕуӕг лифтти кусти туххӕй хатдзӕгтӕ ку скӕнонцӕ, уӕд сӕ раййевдзӕнӕнцӕ еудадзугон кусти фӕткӕмӕ.

Зундгонд куд ӕй, уотемӕй еци техникон фӕрӕзнитӕ раййевунбӕл фарӕ бадзубанди кодтонцӕ Республикӕ Цӕгат Иристон-Аланий Сӕргълӕууӕг Сергей Меняйло ӕма Карачарови механикон заводи хецау Дзиуати Александр. Дзиуи-фурти фӕндӕмӕ гӕсгӕ, еци техникӕ республикӕн равардтонцӕ лӕвар.