28 майя 2022

ӔМА КУ РАЙГЪУСТӔЙ ӔНӔНГЪӔЛТИ ФӔДЕСИ ГЪӔР, ИСИСТАДӔЙ УӔД ФИДИБӔСТӔ ӔНӔГЪӔНӔЙ ТОХМӔ…

26.06.2021 | 09:32

22 июнь Уӕрӕсей адӕмтӕн, уӕдта дуйней берӕ паддзахӕдти рӕстзӕрдӕ дзиллитӕн ӕностӕмӕ иссӕй зӕрдӕбӕлдарӕн ӕма хъонци Бон… Еци бон, цуппаринсӕй анзей размӕ, нӕ Райгурӕн бӕстӕмӕ ӕрбалӕбурдтонцӕ немуцаг-фашистон ӕрдонгтӕ…  Райдӕдта Устур Фидибӕстон тугъд. Уой гъезӕмайраг 1418 боней дӕргъи Советон Цӕдеси еугур адӕмтӕ дӕр еци хъазауатонӕй фронти дӕр ӕма фӕскъилдуни дӕр, уодуӕлдайӕй сӕхебӕл нецӕмӕй ауӕрдгӕй, тох кодтонцӕ фудголи нихмӕ, цалинмӕ 1945 анзи ханси мӕйи ӕ сирддон лӕгӕти, Берлини хорхгонд не ‘рцудӕй, уӕдмӕ…

Кӕд ӕма еци тугъди фӕуунбӕл дзӕвгарӕ рӕстӕг рацудӕй, кӕд ӕма цалдӕр фӕстугъдон фӕлтӕри рантӕстӕй, уӕддӕр, е хъӕбӕр берӕ адӕмтӕн ци зиндзийнӕдтӕ ӕма гъезӕмӕрттӕ бавзарун кодта, уонӕй етӕ абони дӕр ма зӕрдрист ӕнцӕ… Уомӕ гӕсгӕ еци рӕстӕгути хабӕрттӕ имисун еу бонбӕл ма евгъуйа…