Дзинагъа хумæтæги нæй нимад нæ Дигоргоми рæсугъддæр гъæутæй еуебæл. Сабур гъæу аууони æрбунат кодта æзнæт цæугæдон Ирæфи уæлбилгæрон. Ардигæй дзæбæх зиннунцæ бæрзонд Дзæгæраскæ, ехин Къæрæугом, нæ хуæнхбæсти æндæр цæмæдесаг рауæнтæ. Уогæ аци гъæубæстæ зæрдæмæдзæугæ айдагъ æ æрдзон алæмæтдзийнæдти фæрци нæй, æ сæйрагдæр хиццагдзийнадæ ’нцæ æ цæргутæ, Иристонæн дæр æма нæ устур Фидибæстæн дæр хуæрзгæнæг ка ’й, сæ еци æмгъæуккæгтæ.

Уонæй еу адтæй Гобати Станислав. Райгурдæй ами 1972 анзи, æнæгъæнæ гъæубæсти медæгæ дæр кадгин Вячеслав æма Хъазахон Дусяй фæрнгун хæдзари. Станислав æма е ’нсувæр Рубен сæ ниййергути цийнæ æма зæрдæнцойнæн байлæгъ кодтонцæ хуæрзæгъдаугин æма кустуарзонæй, сæ хестæрти фарнæй хайгин уогæй, архайдтонцæ сæ цардиуагæ арфиаг гъуддæгутæй аразунбæл.

Сæ мадæ Дуся куста гъæуи скъолай директорæй, Вячеслав ба тукани. Сæ царди хабæрттæ кодтонцæ сæхе фæллойни фæрци, сæ кæстæрти дæр гъомбæл кодтонцæ, цæмæй рæстуодæй аразонцæ сæ гъуддæгутæ. Куд нæ бæлдтæй Дуся æ кæстæрти амондæй бафсæдунмæ, уони æнтæстдзийнæдтæбæл фæццийнæ кæнунмæ. Фал ин, гъулæггагæн, уæхæн равгæ нæ фæцæй, уæззау нези амæттаг фæцæй, хеуæнттæ ци нæ фæккодтонцæ уомæй æй фæййервæзун кæнунбæл, фал син нæ бантæстæй… Хъæбæр æригонæй банæхстæр æй е ’носон дуйнемæ, æ уарзон бийнонти æ рæвдудæй фенæхай кæнгæй…

Зæрдрист фæцæнцæ бийнонтæ, фал ниффæразун гъудæй еци уæззау зинæн, сæ царди хабæрттæ идарддæр кæнунæн хъаурæ æма нифс иссерун. Еци уаргъ ранцадæй хъиамæтгун фидæ Вячеславбæл, æма куд бийнонти сæрбонс, уотæ еци уаргъ фæразонæй хаста. Уогæ растдæр уодзæнæй уотæ зæгъун, æма еци уаргъ хастонцæ еумæ æмбурд бийнонтæй. Киндзитæ сæхе рауон-циоуонæй равдистонцæ, сæ зелæнтæй Вячеславæн дæр фенцондæр уидæ… Фал уæддæр ирисхъæмæ æхе унаффитæ ес, уотæ рауадæй, æма Вячеслав дæр банæхстæр æй е ’носон дуйнемæ.

Дууæ ’нсувæри Рубен æма Станислав идарддæр ниййергути фарнæ хастонцæ, кæрæдзей берæ уарзгæй æма нимайгæй, кæрæдземæн нифс уогæй. Дзинагъай скъола каст фæууогæй, Станислав исахур кодта Цæгат Иристони Хетæгкати Къостай номбæл паддзахадон университети математикон факультети. Ахургæнæгæй косун райдæдта Гулæри скъолай, уоми ’й директорæй дæр ниввардтонцæ. Куста ма Стур Дигори астæуккаг скъолай дæр. Уæдмæ математики ахургæнæг багъудæй Мæцути интернати, æма еци ихæс дæр райста æхемæ.

Станислави хæццæ мин еумæ косгæ рауадæй, æма мæ бон федарæй зæгъун æй, цæйбæрцæбæл устур уоди хецау адтæй, цийфæнди фарстатæ дæр архайдта раст æма гъæугæ хузи аразунбæл. Цийфæнди гъуддаги дæр ибæл адтæй баууæндæн. Цардæн æ уагæ уæхæн æй, æма адæймаг цæмæйдæрти уотæ исфæлмæцуй, æма сæумæй кустмæ ’рбацæугæй, адæймагмæ уотид дзорун дæр хатгай нæ фæццæуй. Еске ни уæхæн уавæри æрæстæфгæй, Станислав æхе нециуинæг искæнидæ, уотемæй дæ хæццæ дзубанди кодтайдæ æма дæ нæ ниууагътайдæ æнæ нихходун кæнгæй. Хъæбæр хуарз зудта æ предмет, уарзта сувæллæнтти æма син неци æвгъау кодта, æновудæй сæ хайгин кодта æ зонундзийнæдтæй, æ уоди гъардзийнадæй.

Уæдмæ Станислав нисангонд æрцудæй Мæхчески скъолай директорæй, дууадæс анзей дæргъи æвæллайгæй фæхъхъиамæт кодта ахургæнæндони гъуддæгутæ тæккæ хуæздæр хузи райаразунбæл, баруагæс уи уæд, адтæй дæсни сæрбонс скъолайæн. Æ уод некæд исхестæр кодта сувæллæнттæй. Уарзтонцæ ’й ниййергутæ, æхцул ибæл адтæнцæ сувæллæнттæ, арази си адтæнцæ косгутæ.

Станислав æмкъайæн байагурдта Багъæрати Заури æма Телæхъурти Анюти кизгæ Зæлини. Исæнтæстæй син рæсугъд зæнæг – фурт æма кизгæ. Зæлинæ дæр æй устур æма рæсугъд уоди хецау, берекеткъох, иуазæгуарзон. Гъæубæстæ дæр æма муггаг дæр æй базудтонцæ сæрæн адæймагæй… Уæхæн бийнонтæ куд гъæуама нæ уонцæ амондгун!.. Фал сæ еци цардмондаг нивæ ба берæ нæ рахаста. Æнæхайири карз нез бацудæй Станислави бауæри. Бæргæ тох кодта æ хæццæ, хуасæ гъæуагæ ’й нæ ниууагътонцæ бийнонтæ дæр æма хеуонтæ дæр, лимæнтæ, æмгустгæнгутæ… Уæддæр сæ бон неци бацæй… Гъулæггагæн, хуæрзæрæги, мартъий бæнтти рандæй не ’хсæнæй Станислав, уоййасæбæл боз æма сæрустур кæмæй адтан, нæ еци рæсугъд адæймаг…

Сæйгæдони ку адтæй, уæд уоми дохтиртæй еу, хъæбæр бадестæ кæнгæй, загъта, зæгъгæ, айбæрцæ адæм сæйгæфæрсæг цæугæ нæма фæууидтон… Айдагъ уомæй дæр бæрæг адтæй, адæми цæйбæрцæбæл берæ уарзта æма ин етæ дæр æхе дæр цæйбæрцæбæл берæ уарзтонцæ, е.

Станиславæн фæстаг фæндараст зæгъунмæ æрæмбурд æй æгæрон берæ дзиллæ… Хъæбæр зæрдристæй ибæл хъонц кодтонцæ æ ахурдзаутæ дæр… Рохсаг уæд, нæ хъазар æмбал, нæ зундгин ахургæнæг, Иристони æнккæтей æрдхуард… Æ номерæнæн зæрдхъурмæй ниффинстон мæнæ аци рæнгъитæ дæр…

 

Аууони лæууй Дзинагъа,

Къæрæугом мæтъæлæй кæсуй.

Мартъий бони уазал соцъа,

Мети гæбинатæ хæссуй.

 

Гъæуи астæу унæр цæуй,

Гобати дуар игонæй лæууй.

Дессаг уоми ци æрцудæй,

Станислав Гобатæй фæгъгъудæй.

 

Нæ дзæбæх зундгин ахургæнæг,

Мæхчески скъолай сæргълæууæг.

Кæстæр фæлтæри рохситауæг,

Нæбал фæууидта рæсугъд уалдзæг.

 

Еци æгъатир карз нез,

Æ кой дуйнейæй фесæфæд.

Хуасæ ин бæстити нæййес,

Илгъаг не ’нæуинон фæууæд.

 

Не ’стур тæрних, ездон, зундгин,

Цардмæ е ’уæнгтæ ивазта.

Фал нин е ’скодта махæн зин,

Карз нез æй не ’хсæнæй райста.

 

Ейæ бæлдтæй цардмæ нæргæ,

Æнккæтей зæрдæй куд уарзта.

Хуасæ æнгъæл адтæй бæргæ,

Фал æй нез не ’хсæнæй райста.

 

Станислав æгасей куд уарзта,

Æхе тог стæгæй куд баста.

Алке æй игъæлдзæгæй зудта,

Е ’гъдау, æ кадæ лæвардта.

 

Скъола Станиславæн æ бундор,

Сабийти худт е ’стурдæр хор.

Æ берæ æрдхуæрдтæ æ хъаурæ,

Е иуазгути худта æ фарнæ.

 

Федар астъонæ æ бийнонтæ,

Мадæ, фиди кадæ хаста.

Е ’стурдæр мулк – уарзон хеуонтæ,

Станислав ци берæ сæ уарзта.

 

Абони седзæр æ бæдæлттæ,

Уарзон бийнойнаг – седзæргæс.

Раскъудæнцæ æ берæ фæндæнттæ,

Байзадæй æрдæгбæл – е ’хæс.

 

Æ еунæг æнсувæр ци æнкъард,

Еунæгæй зин æ уод æфхуард.

Хæдзари къумти ’й агоруй,

Фал имæ ейæ ба нæ дзоруй.

 

Нæ маст нæ зæрдити хæссæн,

Сæумæраги надмæ – фæккæсæн.

Кæд, миййаг, кустмæ райевгъудтæ,

Фал ду ба, оххай, нæ разиндтæ.

 

Нæ кадгин, зундгин рохситауæг,

Дзенети дин уæд рохс бунат.

Аци царди мах ан иуазæг,

Нартикæнти де ’носон уат.

 

Мах дæ æноси имисдзинан,

Де ’нгæс нæ зæрдити хæсдзинан.

Макæддæр фесæфæд дæ хъаурæ,

Кæстæртæн байзайæд дæ фарнæ.

 

ХАЙМАНТИ Антонинæ,

Мæцути скъолай директори хуæдæййевæг.