ФЕДОГ

Рохсмӕ, фӕсевӕд, тундзетӕ,
Рохсмӕ цӕуетӕ ӕнгом,
Нифс, лӕгдзийнадӕ уарзетӕ,
Скӕнтӕ муггагмӕ стур ном.
 
Арвмӕ мӕсуг амайетӕ,
Хормӕ скӕнетӕ фӕндаг,
Гъӕйт, зӕрдиуагӕй уайетӕ,
Догъи ма уотӕ фӕстаг!
 
Тари цӕфсӕд сӕребарӕ,
Мегъи сорӕд ӕ тунтӕй,
Цард мабал уӕд гъезӕмарӕ,
Зӕнхӕ райзол уӕд рунтӕй.

 Рохсмӕ, фӕсевӕд, тундзетӕ,
Рохсмӕ цӕуетӕ ӕнгом,
Нифс, лӕгдзийнадӕ уарзетӕ,
Скӕнтӕ муггагмӕ стур ном.

Аци финст ӕмдзӕвгӕ Иристони ка нӕ зонуй, уӕхӕн, ӕвӕдзи, бустӕги ефстаг разиндзӕнӕй. Мах ба ‘й абони уомӕ гӕсгӕ ӕримистан, ӕма ӕ ниффинсӕг, номдзуд финсӕг, рохситауӕг ӕма ӕхсӕнадон архайӕг Малити Гадой фурт Геуӕргий райгурдбӕл рӕхги, 5 ноябри (зӕронд нимадмӕ гӕсгӕ 23 октябри) ӕнхӕст кӕнуй финддӕс ӕма ӕртинсӕй анзи (1886-1942).

Уой фӕдбӕл цӕттӕ кӕнӕн нӕ газети сӕрмагонд рауагъд, абони ба бал мухур кӕнӕн, Малий-фурти туххӕй Цӕгат Иристони адӕмон поэт Бабочити Руслан кӕддӕр ци монографи бацӕттӕ кодта, уомӕй хецӕн хай (автор ӕй куд ниффинста, уотемӕй ӕй мухур кӕнӕн 4-5-аг фӕрстӕбӕл).