Елхотти фиццаг скъолай кадгин уавæри байгон кодтонцæ сæ рауагъдон Милдзихти Эдуарди номбæл партæ. Милдзихи-фурт фæммард æй сæрмагонд æфсæддон операций.

Аци гъуддаг исаразун  бантæстæй скъолай косгути фæрци. Скъоламæ æрбацудæнцæ ка фæммард æй, уой хеуæнттæ, раздæри æмкъласонтæ, Кирови райони ахуради управлений косгутæ, гъæуи разамунд. Скъолай директор Хъусати Ларисæ куд загъта, уотемæй Милдзихти Эдуарди хеуæнттæ ин æ уæледарæс æма хуæрзеугутæ балæвар кодтонцæ скъолайæн.

– Æ къари размæ ин  иссугътан сонгун цирæгътæ, хъæбæр зин адтæй евгъуд дзамани æ кой кæнун. Устурæй-минкъийæй æмхузонæй кудтæнцæ, сæ цæстисуг нæ уорæдтонцæ. Æ ном зæрдæбæл дарун махæн ахсгиаг æй, гъæуама сувæллæнттæ зононцæ, уæхæн бæгъатæртæ ке ес, уой. Æ фурт мах скъолай ахур кæнуй, æ кизгæ ба скъола каст фæцæй, – радзурдта скъолай директор.

Милдзихти Эдуард, кæстæр сержант, сæрмагонд къуари тугъдон, «Лæгдзийнадæ»-йи ордени (æ рамæлæти фæсте), майдантæ «Тугъдон æскъуæлхтдзийнæдти туххæй», «Тугъдон æвзугъддзийнади туххæй»-и хецау бæгъатæрæй фæммард æй, Мариуполь 2022 анзи 15 мартъий сæребарæ кæнгæй. Цудæй ибæл фондз æма дууинсæй анзи. Райгурдæй æма исгъомбæл æй Елхотти, скъолай фæсте ахур кæнунмæ бацудæй Елхотти берæфадуатгин колледжмæ. Уой фæсте каст фæцæй Дзæуæгигъæуи хуæнхон-металлургон техникум. Æфсади служби фæсте куста Медгъуддæгути министради. Сæрмагонд къуари бригади рæнгъити æрлæудтæй 2013 анзи.