Нӕуӕг хуӕцгӕнезӕн гӕрӕнтӕ ӕвӕруни Оперативон штаби ӕмбурди дзубанди цудӕй тестити бӕрцӕ фӕффулдӕр кӕнун, тагъд агъази бригадитӕбӕл бафтаун, цӕргути хецӕн категоритӕн ӕнӕмӕнгӕ вакцинаци искӕнун ӕма ӕндӕр ахсгиаг фарстати фӕдбӕл.

Ӕмбурдӕн разамунд лӕвардта нӕ республики Сӕргълӕууӕг Сергей Меняйло, ӕма е куд бафӕдзахста, уотемӕй адӕмӕн экспресс-теститӕ фулдӕр кӕнун гъӕуй:

– Уой  фӕрци равгӕ уодзӕнӕй сӕйгити тӕккӕ райдайӕни исбӕрӕг кӕнун. Паддзахадон ӕма муниципалон службӕгӕнгутӕ  еугурӕйдӕр, медицинон ӕвдесӕнтӕмӕ гӕсгӕ кӕмӕн не ‘нгъезуй, уонӕй уӕлдай иннетӕ ба гъӕуама  вакцинаци искӕнонцӕ, лӕггӕдтӕгӕнӕг къабӕзти разамонгутӕ ба сӕ косгутӕн теститӕ кӕнонцӕ.

Республики Хецауади Сӕрдари хуӕдӕййевӕги ихӕстӕ рӕстӕгмӕ ӕнхӕстгӕнӕг Александр Реутов ӕнӕнездзийнадӕ гъӕуайкӕнуйнади министради хӕццӕ гъӕуама теститӕ фӕффулдӕр кӕнуни пъланбӕл бакосонцӕ. Ӕмбурди ма байгъустонцӕ дзӕбӕхгӕнӕндӕнтти сӕйраг дохтиртӕмӕ. Етӕ куд фегъосун кодтонцӕ, уотемӕй ковид-стационартӕмӕ фулдӕр адӕм ласт цӕуй, тагъд агъази служби косгутӕбӕл ци уӕзӕ ӕвӕрд ес, е фӕффулдӕр ӕй.

Тагъд медицинон агъази станций филиали сӕйраг дохтири хуӕдӕййевӕг Туати Таймураз куд загъта, уотемӕй тагъд агъази бригадити нимӕдзӕ гъӕуама дууадӕс ӕма инсӕйемӕй фӕффулдӕр уонцӕ дууинсӕйей уӕнгӕ.  Уомӕ гӕсгӕ ба ма байархайун гъӕуй, цӕмӕй медицинон кадртӕй фагӕ уонцӕ.

Сувӕллӕнттӕ коронавирусӕй ӕма  респираторон незтӕй фулдӕр ке сӕйунцӕ, уой туххӕй радзурдта сувӕллӕнтти республикон клиникон сӕйгӕдони сӕйраг дохтир Икъати Мурат. Медицинон косӕндони ма коронавируси хӕццӕ сӕйгитӕн уӕлӕнхасӕн хайадӕ байгон кодтонцӕ.

Ахурадӕ ӕма науки министри ихӕстӕ рӕстӕгмӕ ӕнхӕстгӕнӕг Алибегти Эллӕ куд фӕббӕрӕг кодта, уотемӕй исӕхгӕдтонцӕ ӕхсӕрдӕс рӕвдауӕндони, дууадӕс ӕма инсӕй скъолайеми ба – ӕвддӕс ӕма цуппаринсӕй къласи. Уавӕрмӕ гъӕугӕ цӕстдард цӕуй. Республики Сӕргълӕууӕг куд загъта, уотемӕй фӕззигон каникултӕн ес, куд нисангонд цудӕй, уомӕй раздӕр исаразун. Ӕ радзубандий кӕронбӕттӕни ба ма бафӕдзахста, цӕмӕй еугур разамонгутӕ дӕр сӕ архайд байеу кӕнонцӕ ӕма афойнадӕбӕл ӕнхӕстӕй арӕзт цӕуонцӕ еугур мадзӕлттӕ дӕр, цӕмӕй аци незихатт дзиллонӕй ма рапархат уа Цӕгат Иристони.

Цӕгат Иристони уӕлбарон къӕпхӕни сӕйгитӕн, бӕлвурддӕр ба – онкологи ӕма сӕкӕрнезӕй ка сӕйуй, уонӕн хуастӕ ӕлхӕнунӕн дехгонд цӕуй 189 миллион соми.

Республики ӕнӕнездзийнадӕ гъӕуайкӕнуйнади министри ихӕстӕ рӕстӕгмӕ ӕнхӕстгӕнӕг Тебиати Сослан куд радзурдта, уотемӕй еци ӕхца паддзахадӕ дӕттуй тухст сӕйгитӕн фӕййагъаз кӕнунӕн, фулдӕр хӕттити син хуастӕ дӕттуни гъуддаги къулумпитӕ ке фӕууй, уомӕ гӕсгӕ. Еци ахсгиаг гъуддӕг исаразуни туххӕй еугур гъӕугӕ гӕгъӕдитӕ дӕр нури уӕнгӕ  ‘нцӕ цӕттӕ. Ӕлхӕнуйнӕгти фӕдбӕл комитетӕн бабарӕ кодтонцӕ, цӕмӕй хуастӕ амалгонд цӕуонцӕ цубур ӕмгъудмӕ.

Цӕгат Иристони Сӕргълӕууӕг Сергей Меняйло байхӕс кодта, цӕмӕй дзӕбӕхгӕнӕн хуастӕ еухаттӕн ӕлхӕд ӕрцӕуа 600 мин сомей аргъ, базаргӕнӕн ӕма ӕндӕр уӕхӕн мадзӕлтти нӕ архайгӕй:

– Аци гъуддаг, куд хуӕздӕр ӕй, уотӕ гъӕуама арӕзт ӕрцӕуа. 600 мин сомей аргъ ӕлхӕнӕн ес  сауӕнгӕ дӕс хатти дӕр. Уомӕн ӕма сӕ гъӕугӕ хуастӕмӕ онкологи ӕма сӕкӕрнезӕй сӕйгитӕ ӕнгъӕлмӕ кӕсунцӕ. Кӕд  ести къулумпидзийнӕдтӕ исӕвзура уой туххӕй, уӕд нӕмӕ ӕвӕстеуатӕй игъосун кӕнетӕ. Исаразӕн кӕмӕн нӕййес, уӕхӕн фарстатӕ нӕййес, айдагъдӕр ес, гъуддаг гъӕугӕ хузи исаразун сӕ бон кӕмӕн нӕй, уӕхӕн адӕймӕгутӕ!..