Нæ абониккон цардиуаги æнæмæнгæ райаразуйнаг фарстати фæдбæл бæлвурд гъуддæгутæ æнхæстгонд ке цæуй, е, дзубанди дæр ибæл нæййес, хуарз æй. Фал никки хуæздæр ба е æй, æма етæ ’нцæ зингæ фæрæзнæ, цæмæй нæ исонибон уа зæрдæмæдзæугæдæр… Гъе уæхæн иссæй, нæ республики Сæргълæууæг Сергей Меняйло Парламенти æмбурди ци доклад искодта, Цæгат Иристони нуртæкки социалон-экономикон уавæри æма идарддæри райрæзти сæйрагдæр нисанти, уæдта республики Хецауади 2024 анзи архайди бæрæггæнæнти туххæй айразмæ цуппæрæни Парламенти æмбурди ци доклад искодта, уой сæйрагдæр гъуди. Республики разамонæг æ радзубандий бæлвурдæй æркастæй социалон-экономикон еугур къабæзти, культурон царди, фæсевæдон политики, алли адæмихæттити минæвæртти æма аллихузон динтæ æнхæстгæнæг дзиллити ’хсæн æнгомдзийнади федар кæнуни æма æндæр ахсгиаг фарстатæмæ.

Уонæбæл дзубанди кæндзинан нæ газети идарддæри номерти, абони ба цубуртæгондæй мухур кæнæн Сергей Меняйлой доклад.