Зундгонд куд æй, уотемæй Уæрæсей Президент Владимир Путини унаффæй 2026 анз нимад цæуй нæ бæсти цæрæг адæмти еудзийнади Анзбæл.

Е агъазиау гъуддаг æй, æма, куд федералон æмвæзни, уотæ регионти арæзт цæуй аллихузон медесгун мадзæлттæ.

Уотæ ахедгæ куст æнхæстгонд цæуй Цæгат Иристони дæр. Уой фæдбæл арæзт æрцудæй сæрмагонд гъуддагаразæг къуар дæр – организацион комитет. Æрæги адтæй кезуй æмбурд, амудта ’й нæ республики Сæргълæууæг æма Хецауади Администраций разамонæг Гобети Ибрагим.

Æ радзубандий куд баханхæ кодта, уотемæй Уæрæсей адæмти еудзийнади Анзи ахедундзийнадæ агъазиау æй – е берæнацион уæрæсейаг адæм никки æнгондæрæй æрбайеу кæндзæнæй, сæ гъомусдзийнадæ син никки  гъæздугдæр фæккæндзæнæй.

Уой фæдбæл дзоргæй загъта:

– Нæ республикæ ’й, сæдæгай адæмихæттитæ лимæнæй, кæрæдзей нимайгæй æма кæрæдземæй арази уогæй, кæми цæрунцæ, уæхæн регион. Еци берæвæрсугдзийнадæй æй сæ хъаурæ, сæ нифс æма разæнгарддзийнадæ. Е ма уой æвдесæн дæр æй, æма Уæрæсей национ политики бундори æвæрд ес, нæ бæсти рагæй ка цæруй, еци алли адæмихæттити агъазиау хуæдхуз.

Æ радзубандий ма Гобей-фурт куд загъта, уотемæй, кæрæдземæн кадæ кæнгæй, кæрæдзей  культурон аллихузондзийнадæ лæдæргæй æма нимайгæй, адæмæн арæзт цæунцæ хузæнон царди уавæртæ:

– Алли æвзагæн, традицитæн, историон зæрдæбæлдарæн æма культурон хецæндзийнæдтæн дæр гъæугæ фадуæттæ аразгæй, нæ бæсти æдасдзийнадæ æма хуæдбарæдзийнадæн аразæн федар бундор.

Адæмти еудзийнади анзмæ ци ахсгиаг мадзæлттæ бацæттæ кодтонцæ, уой туххæй фегъосун кодта национ политики министради разамонæг Бæгъиати Алан.

– Аци бæрæг анз нин фадуат дæттуй, цæмæй рæнгъæмæ рахæссæн, цалдæр дæсгай æнзти ци фæлтæрддзийнадæй исгъæздуг ан, уой.

Адæмти еудзийнади Анзмæ бацæттæ кодтонцæ, сæ ахедундзийнадæ гъæуама бæрзонд кæмæн исуа, уæхæн зæрдæмæдзæугæ гъуддæгутæ – сæдемæй фулдæр. Анз кадгин уавæри игонгонд æрцудæй 6 феврали республики Национ библиотеки арæзт мадзалæй. Игон ба ’й бакодта нæ республики Сæргълæууæг Сергей Меняйло. Æнæмæнгæ, берæ медесгун мадзæлттæ æнхæстгонд цæудзæнæнцæ районти дæр. Аллихузон акцитæ, фестивальтæ, уордæмæ хунд цæудзæнæнцæ не ’нсувæрон Кæсæг-Балхъари Республики районти минæвæрттæ дæр.

Куд нисангонд цæуй, уотемæй аллихузон спортивон, культурон, ахурадон æма æндæр цаутæй æнхæст уодзæнæй 2026 анз.

Федарæй æууæндæн ес уобæл, æма адæмти еудзийнади Анзи зингæ фæффедардæр уодзæнæнцæ алли адæмихæттити æвзæгтæ, культурæ, æгъдæуттæ æма цардиуагон фæткитæ гъæуай кæнуни æма райрæзти фæдбæл архайд, зингæ фæббæрæг уодзæнæй нæ бæсти медæгæ æхсæн-национ еудзийнадæбæл, сабурдзийнадæбæл, аразидзийнадæбæл. Æма ма никки ирддæрæй исбæлвурд уодзæнæй тæккæ сæйрагдæрæй-сæйрагдæр æцæгдзийнадæ – нæ бæстæ гъæздуг æй æ адæмтæй, уони æмзæрдæдзийнадæ ’й фарнæхæссæг нæ еумæйаг Фидибæстæн.

Æрмæг бацæттæ кодта БИЧИЛТИ Алетæ