Фæззæги Мæскуй арæзт æрцæудзæнæй дуйнеуон форум-равдист «Уæрæсе». Æ сæйрагдæр нисантæ ’нцæ нæ бæсти æнтæстдзийнæдтæ экономики, культури, наукæ æма иннæ къабæзти равдесун, уæд бундоронæй исбæлвурд æма иснисан кæнун Уæрæсей идарддæри социалон-экономикон æма культурон райрæзти гæнæнтæ æма равгитæ.

Абони уæнгæ нæ бæсти фараст æма цуппаринсæй субъекти еугурæйдæр унаффитæ рахастонцæ форуми архайуни фæдбæл. Экономикон экспозицитæй уæлдай ма равдисти арæзт цæудзæнæнцæ аллихузон агъазиау ахурадон-рохсадон, культурон-аййевадон программитæ. Алли регионæн дæр уодзæнæй фадуат æ ахсгиагдæр инвестицион проекттæ равдесунæн, цæмæдесагдæр фæлладуадзæн бунæтти гъомусади туххæй радзорунæн…

Форуми архайдзæнæй Цæгат Иристон дæр, æма нуртæккæ профилон ведомствити косунцæ, цæмæй еугур равгитæй дæр æнхæстæй пайдагонд æрцæуа æма нæ республикæн си ци урух экспозици уодзæнæй, уоми æ гъомусадæ берæвæрсугæй æвдист æрцæуа, цæмæй æмбурди архайгутæ æма иуазгутæ лæмбунæгдæр базонгæ уонцæ нæ абони цард, нæ исонибонмæ равгитæ æма гæнæнти хæццæ. Нæ экспозиций æвдист цæудзæнæй промышленнон æма гъæууонхæдзарадон, уæдта адæмон амалеуæггади кустуæтти продукци. Ке зæгъун æй гъæуй, уæхæн форуми фæрци регионти минæвæрттæн уодзæнæй кæрæдзей фæлтæрддзийнади хæццæ базонгæ уни фадуат дæр. Æма е се ’хсæн æмгустадæн рапарахат кæнунæн агъаз ке фæууодзæнæй, уобæл зæрдæдарæн ес.