Раст гъе уæхæн загъдæй – «Нæ гъуддæгутæ дзæбæх цæунцæ!..» – райдайуй завод «Арвæрдун»-и («Радугæ»-йи) генералон директор Тауасити Эльбрус æ дзубанди сæ кустуати хабæртти туххæй. Æма, баруагæс уи уæд, æ еци загъд уæлдай æхцæуæн æй – æгайтима нæмæ ес, аци æзнæт рæстæгути уавæрти дæр сæ кустæй арази æма зæрдрохс ка ’й, уæхæн кустуат. Уæхæнттæ ма нæмæ разиндзæнæй, фал абони «Арвæрдун»-и туххæй уомæ гæсгæ радзоруйнаг ан, æма е берæ æнзти дæргъи нимад цæуй айдагъ нæ республики нæ, фал Уæрæсей æнтæстгиндæрæй архайæг промышленнон кустуати нимæдзи, æ раздзæуæг ба æй искурдиадæгиндæр æма æскъуæлхтдæр разамонгутæй еу.

Завод «Арвæрдун»-и цардвæндаг райдæдта 1975 анзи – куд Лианозоваг электромеханикон еумæйаг кустуат «Утес»-и цех-хайадæ, уотæ. Еци мæскуйаг кустуат еу рæстæги цæттæ кодта, нæ бæсти гъæуайкæнуйнади гъуддæгути хъæбæр ахсгиагæй ка гъудæй, уæхæн аллихузон комплекстæ æма системитæ. Уомæ гæсгæ ба æ дзæуæгигъæуккаг хайадæ дæр уæхæн продукци уагъта, уой хæццæ ба ма хæдзарадон дзаумæуттæ дæр.

Æлхæнгутæмæ бæрзонд цæстиварди адтæй, сæ рауагъд æртæпрограммон радиоприемниктæ, медицинон стерилизатортæ æма ингалятортæ. Коллектив цæйбæрцæбæл рауон-циуон æма сауæнгæ æмæнтъери рæстæгути дæр дессаги цардгъон разиндтæй, уомæн ба æвдесæн æй е дæр, æма сæмæ нифс æма хъаурæ разиндтæй, ци берæ гъигæдæрдтитæ син æвзаргæ рауадæй, уонæн ниффæразун æма сæ сæрти уæлахезонæй рахезун. Уæлдайдæр ба евгъуд æноси 90-аг уæззау æнзти цийфæнди зинæй дæр сæ бон бацæй кустуат багъæуай кæнун, æма е ба уæди уавæртæмæ гæсгæ, æнæмæнгæ адтæй æцæг лæгдзийнадæ. Кустуати разамунди æма æ коллективи сæрæндзийнадæн ба æвдесæн æй е дæр, æма абони Уæрæсей Федераций тугъдон радиоэлектрон ефтонггæрзтæ ка уадзуй, еци бундорон кустуæтти æмрæнгъæ федарæй лæуд æй. Æма Тауасити Эльбрус баргъонæй, «нæ гъуддæгутæ дзæбæх цæунцæ!..», зæгъгæ, ке зæгъуй, е æруагæс кæнуй, кустуати гъуддæгути хæццæ бæлвурдæй базонгæ уогæй.

– Кусти медæгæ рауагъд продукций æфтуйæггæгтæ бæрзондæй-бæрзонддæр кæнунцæ. Зæгъæн, 2023 анзи адтæй – 357 миллион 735 мин соми, 2024 анзи ба исхъæрттæй 503 миллион 351 мин сомей уæнгæ, 2025 анзи ба рауадæй  806 млн 687 мин соми. Нæ размæ æвæрд ихæстæ æнхæст кæнæн гъæугæ уагæбæл, уой дæр нæхе хъауритæй.

Завод «Арвæрдун»-и раззагдæр фæллойнæгæнгути къуар. Астæуæй – кустуати рагондæр косæг, менеджменти фарстати фæдбæл генералон директори хуæдæййевæг Евгения АВАКОВА.

Аци кустуати хуарзи кой кæнгæй, æнæ зæгъæн нæййес еу ахсгиаг гъуддаги туххæй. Цийфæнди кустуат дæр æ ирисхъи нæдтæбæл ку ранæхстæр уй, уæд е æй, мæнæ науæ денгизи куд рабалци кæнуй, уой хузæн. Æма денгиз ба алкæд хуæрзахъæл нæ фæууй, æ уагæ аллихузонæй дæр равдесуй – кæми хæларзæрдæй, кæми ба æзнаггадæй… Æма багъæуй науæн æ балхонæги сæрæндзийнадæ, е куд исарæхса, уотæ науæ дæр ервæзт уодзæнæй. Раст гъе уæхæн раздзæуæг æй Тауасити Хадзирæти фурт Эльбрус – айдагъ нæ республики нæ, фал æнæгъæнæ Уæрæсей дæр зундгонд, æнтæстгинæй архайæг кустуати разамонæг.

Зæгъун гъæуй уой, æма адæймагæн æ ирисхъи æнай-æнойти неци æрцæуй. Уоди федардзийнадæ, нифс æма æновуд фæллойнæ гъæунцæ, цæмæй, дæ царди цæмæ бæллис, етæ дин бантæсонцæ. Гъе уотæ Эльбрусæн дæр берæ цидæртæ æвзаргæ рауадæй, куд фæззæгъунцæ, берæ дæнттæ æма къæдзæхти сæрти рахезун æй багъудæй, цæмæй, нуртæккæ сæрустур кæмæй æй, еци устур кустадон æнтæститæ æма адæймагон æскъуæлхтдзийнæдтæ æ къохи бафтудайуонцæ, уой туххæй.

Уогæ æ царди хабæрттæй алкæцидæр кæд æма хъæбæр цæмæдесаг æй, уæддæр сæ еугурей кой лæмбунæгæй ракæнуни равгæ нуртæккæ нæййес, уомæ гæсгæ ба си уæддæр кæцидæрти туххæй цубурæй зæгъдзинан.

Тауасити Эльбрус райгурдæй Мæскуй 1940 анзи 18 январи. 1959-1962 æнзти службæ кодта Советон Æфсади рæнгъити. Уой дæр æррæстæ хумæтæг службæ нæ кодта, фал бахаудтæй Кубæмæ, Кариби нихмæлæуд ке хонунцæ, еци тæссагæй-тæссагдæр уавæр си ку исæвзурдæй, раст еци рæстæгути. Уæд айдагъ дууæ паддзахадей – Америкон Еугонд Штаттæ æма Советон Цæдеси ирисхъæ нæ, фал еугур зæнхи цъари цæргути «ун æви нæ ун» хали дууæ кæронебæл ку æрауиндзæг æй. Сæ нивæ адтæй адæмтæн æма дууæ паддзахадей разамонгути бон бацæй куддæртæй бадзубанди кæнун, зунд æма курухондзийнадæ фæууæлахез æй гумери тухæбæл.

Тауасий-фурт æрæздахтæй æ фидтæлтиккон уæзæгмæ Иристонмæ, æма ахур кæнунмæ бацудæй Цæгат Иристони гъæууонхæдзарадон институтмæ. Каст æй фæцæй 1970 анзи æма æригон специалист косун райдæдта республики промышленнон кустуæтти. Анзæй-анзмæ ирæзгæ цудæй æ кустадон фæлтæрддзийнадæ, уой хæццæ ба къæпхæнгай хезгæ цудæй еу бæрнон бунатæй иннемæ. Куд арæхстгин æма хъæппæресгин косæг, уотæ ибæл сæ цæстæ æвæргæ цудæнцæ нæ республики хецауадæ. Тæккæ фиццаг разамонæги бунати косун райдæдта Дзæуæгигъæуи прибортæаразæн заводи. Уой фæсте ба ’й æ кустадон ирисхъæ æркодта завод «Арвæрдун»-мæ æма си косуй 1977 анзæй абони уæнгæ. Дæс æма дууисæй анземæ хæстæг æ кустбæл дæр æма æ кустуатбæл дæр æ зæрдæ некæд исæййивта. Устур хъаурæ гъæуй уоми. Еугурей бон уæхæн уæзæн бафæразун нæ фæууй.

Сергей ЯКОВЛЕВ – хуæдтолгитæ æскъæрæг.

Тауасий-фурт ами косун райдæдта æмбурдгæнæн цехи сæргълæууæгæй æма исхизтæй кустуати генералон директори уæнгæ.

Æ дæргъвæтийнæ æнзти дæргъи заводи берæ æййивддзийнæдтæ ’рцудæй: кустадон æнтæститæ, паддзахадон заказтæ, размæцуд æма æнæкъулумпи архайд. Фал алкæд æмхузон лигъз нæдтæбæл нæ цудæй завод «Арвæрдун». ССР Цæдес ку нийхалдæй, уæд куд нæ бæсти мингай устур æма минкъий кустуæттæ, уотæ аци заводи кæддæри æнæкъулумпи архайд дæр къурцдзæвæнмæ æрцудæй, экономикон ирæзти бæрæггæнæнтæ цæхгæр фæмминкъийдæр æнцæ. Адæми фулдæр хаййæн кусти бунæттæ нæбал адтæй, цехти куст бустæги æрлæууни азари бафтудæй…

Ци гъæуама кодтайдæ заводи кустæргъæвд коллективи разамунд еци æдзæллаг уавæрти: дзæвгарæ хъазар ефтонггæрзтæ, цехтæ, сæйрагдæр ба адæм, цæмæй кустæй ма фенæхай уонцæ æма ма ниххæлеу уонцæ. Мадзæлттæ! Æвæстеуатæй гъудæй еци уавæрæй фæййервæзунæн ахедгæ мадзæлттæ! Æма кустуати разамунд баунаффæ кодтонцæ сæ архайд æндæр уагæмæ раййевунбæл, сæрмагондæй ба адæмæн гъæугæ товартæ уадзунмæ раздахун. Уотемæй уадзун байдæдтонцæ, зæгъæн, медицинон косæнгæрзтæ, æндæр уæхæн гъæугæ товартæ, æдеугурæй продукций финддæс æма инсæй хузи.

Гъудæй сæ айдагъ продукци уадзун нæ, фал ма уой уæйæ кæнун дæр. Æма адæми зæрдæмæ цæмæй цудайуонцæ, уой туххæй ба син сæ хуæрзгъæдæдзийнадæ бæрзонддæр кæнун гъудæй. Цубур дзурдæй, завод «Арвæрдун» нæ фæккиудтæй, бафæразта еци еугур цæлхдорти сæрти рахезун. Æма е бантæстæй куд кустуати разамонæг Тауасити Эльбруси дæсни разамунди, уотæ коллективи уодведардзийнади фæрци.

Еугæр нæ дзубанди цæуй кустуати разамонæги туххæй, уæд зæгъун гъæуй уой, æма æ хъазауатон фæллæнттæн ин аргъ кæнгæй хецауадæ дæр æма æ уæлдæрлæууæг разамунд дæр ци аллихузон хуæрзеугутæй исхуарзæнхгин кодтонцæ, етæ дзæвгарæ-дзæвгарæ ’нцæ: Кади гæгъæди «Берæ æнзти хъазауатон фæллойни туххæй», 2001 анзи ба: разамунддæттунади системи Уæрæсей агентади Кади гæгъæди, 2003 анзи ба райста «Республикæ Цæгат Иристон-Аланий промышленности æскъуæлхт косæги» кадгин ном. Куд коллективбæл хуæрзауодæг, косгути бартæ æновудæй гъæуайгæнæг, уотæ ин аккаггонд æрцудæй майдан «Уæрæсей профцæдестæбæл 100 анзи».

Завод «Арвæрдун»-и арфиаг гъуддæгутæбæл дзоргæй, зæгъун æнгъезуй уотæ: ци гъуддаг райсай дæхемæ, уобæл зæрдæй ку тухсай, тæккæ хуæздæр хузи ’й райаразунбæл разæнгардæй ку архайай, æнтæститæ дæр къохи уæд æфтуйунцæ.

Раздæри рæстæгути хæццæ рабаргæй, завод гъай-гъайдæр цæхгæр æндæр хузи фæцæй.

Сергей БУЛАНОВ – оператор.

Уой фæдбæл Тауасий-фурт уотæ зæгъуй:

– Техникон æгъдауæй нуриккон домæнтæн дзуапп ка дæттуй, уæхæн косæнгæрзтæй кустадæ ефтонг кæнун, уонæй арæхстгинæй пайда кæнунбæл косгути ахур кæнун, нæуæг æргъудигонд мадзæлттæ æма технологитæ царди уадзун, менеджменти системæ цæхгæрмæ раййевун  æма ма берæ æндæр гæнæнтæй пайда кæнуни фæрци нуртæккæ нæ кустуати бон æй размæ федар къахдзæфтæй цæун, кустади гъомусадæ бæрзонддæр кæнун. Ку зæгъун,  нуриккон техникон æма профессионалон ефтонггадон дзаумæтти фæрци. Уобæл еудадзуг архайæн æмзунд-æмвæндæй. Æма заводи кадæ ба бæрзонд æй, уомæн æма цæсгонгинæй æма афойнадæбæл æнхæст кæнæн нæ размæ æвæрд ихæстæ.

Уомæн ба ами ци гæнæнтæ æма равгитæ ес, етæ, зæгъун æнгъезуй, æнцæ коллектив разæнгардгæнæг. Фæллойнæгæнгутæ дæр афойнадæбæл есунцæ сæ кусти мизд, кæци нæ республики иннæ кустуæттæй æй бæрзонддæр, уой хæццæ ба райсунцæ 13-аг мизд дæр. Ка ци рæстæг бакуста ами, еци æнзти бæрцæмæ гæсгæ син фист цæуй сæрмагонд уæлæнхасæн феддонтæ. Аллианзон уолæфуни бæнтти ка фæццæуй, уонæн ма уæлæнхасæн материалон агъаз лæвæрд фæццæуй, цæмæй сæ бон уа санаторити сæхе дзæбæх кæнун. Мадта косгутæн хуæрзадæ рæфтад ами æй лæвар. Уони уæлæнхасæн ба заводи косгутæн ес барæуадзæ æмдзæрæн дæр.

Æмбурдгæнæн-монтажгæнæн цехи инженер-технологтæ АНАТИ Заур æма КОЧИТИ Иринæ.

Нæ гъуддæгутæ дзæбæх цæунцæ, зæгъгæ, ку загъта Тауасити Эльбрус, уæд ма уæхæн æздæх дæр  фæккодта, гъома, бустæги арази ба куд уæн абони уавæртæй, кæд æма хъæбæр нæ тухсун кæнуй е, æма исонибони нæмæ нæ нури косгути хузæн ка косдзæнæй еци фарста:

– Нæ нæмæ фагæ кæнуй косæг къохтæ. Уотемæй ба нæ бон æй берæ-берæ косæн бунæттæ игон кæнун. Фарста гъæугæ хузи райаразунбæл бæргæ архайæн. Ахид дæттæн игъосункæнуйнæгтæ, косгутæ нæ ке гъæуй, уой туххæй, фал нæмæ, гъулæггагæн, неке цæуй. Гæнæн ес, æма косун ке фæндуй, фал имæ гъæугæ дæснийадæ нæййес, зæгъгæ, уæд уони ба мах, нæхе кустуати исахур кæндзинан. Æма райсдзæнæнцæ æндадзгутæ, техникæ цалцæггæнгутæ æма æндæр дæснийæдтæ.

Нæ еци кустæй дæр пайда ес, цийфæнди кæд æй, уæддæр нæмæ фæсевæд цæунцæ. Æма сæбæл ауодæн, цæмæй син нæ кустуат исуа зæрдтагон. Нæ косгутæн сæ фулдæр хай кæд хестæр кари адæм æнцæ, уæддæр коллективи ’хсæн  профориентацион кустмæ устур æргон æздæхт цæуй. Уой фæрци ба нæмæ æригон фæлтæр дæр æрбацæуй ахур кæнунмæ, æма цæмæдесдзийнадæ си кæмæ фæззиннуй, етæ байзайунцæ кустуати. Зæгъæн, механикон-æмбурдгæнæн цехи нур дæс анзей дæргъи косуй 5-аг разряди фрезергæнæгæй Радмил Дружинин. Кæд æма скъола каст фæууни фæсте ветеринари дæснийадæ райста, уæддæр æй бафæндадтæй, завод «Арвæрдун»-и косун. Ами æ ахургæнæг адтæй дæсни специалист Геннадий Борисов. Æма е зæрдиагæй, æнæвгъауæй æ берæ зонундзийнæдтæй, кусти сосæгдзийнæдтæй бахай кодта лæхъуæнæн. Радмил куд имисуй, уотемæй ин гъай-гъай, фиццаг рæстæг зингомау адтæй, уæдта æ курухон зундамонæги фæрци фæццалх æй æ кустбæл

– Нерæнгæ дæр ма ахур кæнун, – имисуй Радмил. – Мæнæ нур кæбæл косун, еци станок мин æртиккаг æй. Æнцондæр æй, фулдæр равгитæ фæззиндтæй. Фал нæ дæснийадæ уæхæн æй, æма дæхуæдæг еудадзугдæр гъæуама сæрæй гъуди кæнай.

Механикон-æмбурдгæнæн æма индустриалон цехи разамонæг Эттети Фатимæ дæр Радмил Дружинини кустæн устур аргъ кæнуй. Нимайуй æй бæрнон æма коммæгæс косæгбæл, æ кусти медæгæ некæд æруагъта зулундзийнадæ, аразуй хуæрзгъæдæ дзаумæуттæ.

БАЗАТИ Таймораз – слесæр-æмбурдгæнæг.

Анзæй-анзмæ кустуати продукци фулдæр-фулдæр агурд цæуй фæлхасгæнгутæй, уомæ гæсгæ ба кусти гъæдæ техникон æгъдауæй гъæуй хуæрзгъæдæдæр кæнун, модернизацимæ уæлдай фулдæр æргом æздахун гъæуй. Заводи разамунд уой лæдæруй, æма, аллихузи гæнæнтæй пайда кæнгæй, мадзал кæнуй нæуæг ахедгæдæр косæнгæрзтæ. Зæгъæн, евгъуд анзи æлхæд æрцудæй нуриккон домæнтæн дзуапп ка дæттуй, уæхæн косæнгарз – лазери фæрци кæрдун. Æма уой фæрци дзæвгарæ фæмминкъийдæр æй къохтæй косуни бæрцæ. Аци анз ма исамал кодтонцæ æхседæн аппарат дæр.

Техникон нæуæгдзийнæдтæй ефтонг кæнуни хæццæ кустуати фиццаг бунати æвæрд æнцæ косгути æнæнездзийнади æма æдасдзийнади фарстатæ. Зæгъæн, хуæздæртæй æййивд æрцудæнцæ косæнбунæтти уæлдæф кæдзосгæнæн системитæ.

Механикон-æмбурдгæнæн æма инструменталон цехæй продукци бацæуй гальваникæ æма хуарæн хайадæмæ. Еци хайадæ нæуæг кæдзосгæнæн косæнгæрзтæй ефтонггонд ке æрцудæй, уомæ гæсгæ алфамбуламæ нецихузи зæранхæссæг калæдздзæгтæ хаунцæ. Е ба уобæл дзорæг æй, æма кустуат сагъæс кæнуй æрдзи кæдзосдзийнадæбæл. Уой фæсте дзаумæутти хæйттæ барветунцæ æмбурдгæнæн цехмæ. Аци цехи инженер-косæг Денис Донской хуæрз æрæги хъæбæр хуарз бæрæггæнæнти хæццæ райста Цæгат Кавкази хуæнхон-металлургон институти диплом. Æ дæснийадæ ’й «Микроэлектроникæ, наноэлектроникæ». Еци-еу рæстæг ахур дæр æма косгæ дæр кодта.

– Инсæй анзей размæ ’рбацудтæн заводмæ техникум фæууни фæсте, зæгъуй Денис. –  Нур ба уæлдæр ахурадæ райсуни фæсте косдзæнæн мæ равзурст дæснийадæбæл. Уогæ электроникæмæ цæмæдесдзийнадæ мæмæ фæззиндтæй æхсæз анзи мæбæл ку цудæй, уæд. Ахур кодтон металлургти культури Галауани исфæлдистадон къуари.

Радмил ДРУЖИНИН – фрезеровщик.

Денис заводмæ косунмæ ’рбацудæй хуæрз æригонæй, æма ами æ разамонгути фæлтæрддзийнадæ æма кустуарзондзийнади фæрци æ бон иссæй хъæбæр хуарз бæрæггæнæнти хæццæ диплом райсун дæр. «Кадртæ аразунцæ алцидæр»,– е завод «Арвæрдун»-и коллективæн уотид рæсугъд загъди хузæн лозунг нæ ’й. Æцæгæйдæр, алцидæр адæм сæхуæдтæ  аразунцæ. Сæхе сæризунд æма сæхе къохтæй. Кустуат ба син агъаз кæнуй, багъæуаги син раст унаффæ раттуй…

Уæ куст алкæд еци-еу хузи хуарз æма раст уагæбæл хæссун уæ бон кутемæй æй, зæгъгæ, ку бафарстан  кустуати генералон директор Тауасити Эльбруси, уæд æ дзуапп адтæй цубур:

– Римæхстагæй си неци ес. Нæ косгутæ еугурæй дæр косунцæ цæсгонгинæй. Ес нæмæ инсæйгай,  дæс æма инсæйгай æнзтæй фулдæр ка косуй, уæхæн фæллойнæгæнгутæ. Ес нæмæ æригæнттæ дæр, кæцитæ иссæнцæ коллективи æнхæстбаргин иуонгтæ  æма рæстуодæй косунцæ. Дзубанди айдагъ бæрзонд миздбæл нæ цæуй. Гъай-гъай е дæр,  æнæмæнгæ, ахсгиаг æй. Фал сæйрагдæр æй, дæ куст адæми ку гъæуа, федарæй æй ку лæдæрай уой,  æма дæ хъиамæттæ дзæгъæли нæ ’нцæ, кусти медæгæ дæр дин аргъ ку кæнонцæ, дæ бартæ гъæуайгонд ку цæуонцæ, уæд е ба берæ æхцатæй хъазардæр æй…

Александр ТАРАШВИЛИ – æмбурдгæнæн-монтажгæнæн цехи монтажник.

Куд алли æнтæстгин кустуатæн, уотæ завод «Арвæрдун»-и коллективæн дæр нифсдæттæг æнцæ æ фæллойнæгæнгутæ, боз æма  сæрустур кæмæй æнцæ, берæ æнзти дæргъи си рæстзæрдæй æма хъæппæресгинæй ка косуй, сæ кустуати кадæ æма намусбæл æновудæй ка архайуй, етæ. Уæлдай зæрдæмæдзæугæ ба е æй, æма си æмзæрдæ-æмвæндæй фæллойнæ кæнунцæ цалдæр фæлтæремæй – хестæрти æмвæрстæ архайгæй, байлæгъ кæнунцæ æригон косгути  фæлтæртæ дæр. Бæргæ хуарз уидæ уонæн сæ еугурей кой дæр ракæнун, фал нин уæхæн равгæ аци хатт нæййес, æма си уæддæр цалдæрей къартæ мухур кæнæн. Фадуат нин ку фæууа, уæдта иннети туххæй радзубанди кæндзинан.

Зæгъун гъæуй уой дæр, æма завод «Арвæрдун» айдагъ æхе коллективи хуæрзагадæн нæ косуй, фал ма æй республикон бюджетмæ æууæнкаг хъалонтæ федæг. Нимæдзтæ ниллæг нæ ’нцæ: 2023 анзи хъалонтæй бафистонцæ 77 миллион соми, 2024 анзи – 191 миллион соми. Æма еугур еци æхцай фæрæзнитæ цæунцæ нæ республики социалон-экономикон райрæзт фæгъгъомусгиндæр кæнуни гъуддагмæ.

Зæгъун гъæуй уой дæр, æма аци кустуати разамонæг Тауасити Эльбрус хæларзæрдæй хуæрзауодæг æй мах, республикон газет «Дигорæ»-йи коллективбæл дæр, берæ цæмæйдæрти нин фæййагъаз кæнуй, уæлдайдæр ба газет рафинсуни гъуддаги. Æма си хъæбæр боз æма арфиаг ан.

Завод «Арвæрдун» айразмæ исбæрæг кодта æ исарæзти дæс æма дууинсæй анзон юбилей. Æма æ еци цардвæндаги кæд естæмæй цитгийнаг æй, уæд тæккæ фиццагидæр ирæзти æнтæстдзийнæдтæ æма арфиаг гъуддæгутæй. Уой хæццæ ба ма бæлвурд æй е дæр, æма идарддæр дæр никки бæрзонддæр уæлахезтæмæ федар къахдзæфтæй цæуй. Коллектив цардгъон æй, æ кадæ ’й бæрзонд, устур аргъ ин кæнунцæ се ’мгустгæнгутæ, сæ фæлхасгæнгутæ. Æма рæствæндаг, уæлахезон уæнтæ!

Аци æрмæг цæттæ кæнуни рæстæги нин зæрдиагæй фæййагъаз кодта заводи рагондæр косгутæй еу, менеджменти фарстати фæдбæл генералон директори хуæдæййевæг Евдокия Авакова æма ин зæрдиагæй арфæ кæнæн.

ХЕКЪИЛАТИ Маринæ