06 июля 2022

НÆ МАДДÆЛОН ÆВЗАГ – НÆ ÆНОСОН ФАРНÆ!..

14.05.2022 | 14:30

Зундгонд куд æй, уотемæй 2003 анзæй фæстæмæ алли анз дæр 15 майи Цæгат Иристони бæрæггонд цæуй нæ маддæлон (дигорон æма ирон) æвзаги  æма литератури Бон. Уой фæдбæл  нæ республики Сæргълæууæг Сергей Меняйло нæ дзиллæн зæрдиагæй райарфæ кодта: «Нæ фидтæлтæ нин ниууагътонцæ рæсугъд æма гъæздуг маддæлон æвзаг. Не ’стур ихæс æй уой багъæуай кæнун, идарддæр косун æ райрæзтбæл. Мæ зæрдæ зæгъуй, цæмæй уæ хæдзæртти æма уæ косæн бунæтти кæддæриддæр игъуса нæ фидтæлтиккон аййев дзурд, цæмæй Иристони кæстæртæ æновудæй ахур кæнонцæ, зононцæ æма уарзонцæ сæ маддæлон æвзаг, цæмæй уой дзурди фарнæ фæлтæрæй-фæлтæрмæ æности цæуа!..»

Аци фæдзæхсти хузæн загъди хæццæ, махмæ гæсгæ, арази уодзæнæй нæ маддæлон æвзаг рæстуодæй хъазар кæмæн æй æма æ райдзастдæр исонибонбæл зæрдиагæй ка архайуй, уонæн еугуремæн дæр. Уой фæдбæл ба ма уой дæр зæгъуйнаг ан, æма нæ кæд æцæгæйдæр фæндуй, цæмæй нæ маддæлон æвзаги фарнæ гъæуайгонд цæуа æма фæлтæрæй-фæлтæрмæ ирæза, уой туххæй цæй æма æ бæрæг кæнуни Бони исаразæн арфиаг гъуддаг – дзиллонæй рафинсæн нæ маддæлон æвзагбæл уагъд ка цæуй, еци газеттæ æма журналтæ.

Уотæ ку бакæнæн, уæд æцæгæйдæр Иристони еугур рауæнти дæр цитгинæй хеуон исуодзæнæй нæ маддæлон æвзаг. Еудадзуг си игъусдзæнæй æ фарнæхæссæг дзурд!.. Ма базийнадæ кæнæн æма, нæ маддæлон æвзагбæл цæйбæрцæбæл æновуд ан, уой еумæйаг бæлвурд гъуддагæй бавдесæн!..

ГАЗЕТ «ДИГОРÆ» – АЛЛИ БИЙНОНТÆН!

2022 АНЗИ ÆМБЕСÆН.
Æ РАФИНСУНИ АРГЪ АНЗИ ÆРДÆГÆН ÆЙ 323 СОМИ ÆМА 64 КЪАПЕККИ;

УÆЛБАРТÆМÆ ГÆСГÆ БА – 288 СОМИ ÆМА 96 КЪАПЕККИ.

ГАЗЕТ «ДИГОРÆ» РАФИНСУН ÆНГЪЕЗУЙ «УÆРÆСЕЙ ПОЧТИ» ЕУГУР ХАЙÆДТИ ДÆР, УÆДТА МУХУР УÆЙÆГÆНÆН КИОСКТИ ДÆР.