Сауæнгæ недзамантæй ардæмæ а дуйней еске медастæу ес æнæбафедаугæ хæрандзийнадæ, уæд тæккæ фиццагидæр мади зæрдæ æма тугъд æндзаргути ’хсæн. Мадæ æ уодæй уод фæккæнуй æ фурт исгъомбæл кæнунбæл æма ин ку рабайлæгъ уй, уæдта ин æй æнæхайири тугъд бастъæлуй, додоййаг ин фестун кæнуй æ цард… Хæзнидонæй рацæуæг зундгонд лæгтæй еу, Хъамболти Марат сауæнгæ æ сабийдогæй фæстæмæ уидта, æ хеуæнттæй дæр æма гъæубæсти дæр цæйбæрцæбæл зæрдрист æнцæ, Устур Фидибæстон тугъди будуртæй сæ фидиуæзæгбæл ка нæбал исæмбалдæй, еци мадтæлтæ, беретæ си сæ фурттæмæ, кæдимайди ба фæззиннидæ, зæгъгæ, æнгъæлмæ кæсгæй банæхстæр æнцæ се ’носон дуйнемæ…

Фæстæдæр, федералон хецаудзийнади бæрзонд бунæтти косгæй, æма нæ бæсти алли рауæнти уогæй æй уидта, Уæрæсей цæйбæрцæбæл æгæрон берæ ’нцæ сæ тугъдонтæмæ æнгъæлмæкæсæг зæрдрист мадтæлтæ.

Ка ’й зонуй, уæд имæ фæззиндтæй еци мадтæлтæн номерæн циртдзæвæн æ райгурæн Хæзнидони ниввæруни фæндæ дæр. Æма ин еци арфиаг гъуддаг исаразун бантæстæй. Циртдзæвæн æвæрд ци фæзуати æй, е абони иссæй цитгийнаг рауæн. Арæзт си цæуй аллихузон кадгин мадзæлттæ. Уонæй еу – аййевадон литературон уадзимистæ кæсгути аллианзон республикон конкурс «Нæ сæртæй ниллæг раковæн æфсæддони Мадæн…» Арæзт æрцæудзæнæй аци анз дæр.

Сæ фурттæ адзалхæссæг тугъдтити кæмæн бастъалдæнцæ,  еци мадтæлтæ еци зæрдристæй дæр сæ устурдæр сагъæс – цæмæй уæхæн саумарой макебал бавзара. Уони бæлдæ нæ зундгонд поэт Хидирти Ехйа е ’мдзæвгитæй еуеми уотæ æвдесуй:

Фагæ ’й! Мæ фурт æ цард нистъалдта,

Нур ба тавæд нæ хори гъар.

Цæмæй седзæртæ макæдбал уа,

Цæмæй хор бон ма ’суа мæйдар…

Æма мæнæ ци конкурси кой кæнæн, уой нисанеуæг дæр æй: цæмæй исцитгин кæнæн, нæ Фидибæсти сæрбæлтау æ цард ка иснивонд кодта, уонæн сæхе æма сæ мадтæлти рохс нæмттæ, цæмæй тугъд мабал уа æма цард амондгунæй-амондгундæр кæна.

Конкурс бабæй арæзт æрцæудзæнæй аци анз дæр – 6 майи Хæзнидони. Уоми архайун ке фæндуй, е гъæуама бацæттæ кæна видео-ролик, кæцими гъæуама æвдист цæуа, Устур Фидибæстон тугъди туххæй æмдзæвгæ куд кæсуй, е. Еци æрмæг ба 25 апърели уæнгæ рарветун гъæуй мæнæ ауæхæн электрон адресмæ: ket.poesy@mail.ru. Æма æ хæццæ æнæмæнгæ байамонун гъæуй архайæги муггаг æма ном, æ къарæ, телефон, номинаци, ци уадзимис равзурста, уой автори муггаг æма ном.

Мадзали архайгути арæхстдзийнадæ бæрæггонд цæудзæнæй æртæ номинациеми: хе финст æмдзæвгитæ, аййевадон кæсундзийнадæ æма нæ зундгонд поэт Колити Виталий æмдзæвгитæ хуæздæр бакæсунæй. Æртиккаг номинаци хумæтæги нæ фæззиндтæй аци анз. Кæдæй аци исфæлдистадон мадзал арæзт цæуй, уæдæй си алли анз дæр Колити Витали уидæ жюрий иуонг, хъæбæр æновудæй архайидæ, цæмæй е рацæуа тæккæ хуæздæр хузи, цæмæй æй адæм сæ зæрдитæбæл бадаронцæ, цæмæй æригæнттæ разæнгард кæнонцæ исфæлдистадон архайдмæ. Виталий цардвæндаг, гъулæггагæн, æгæр рацубуртæ ’й, хуæрзæрæги банæхстæр æй е ’носон дуйнемæ. Хъонцгæнгæй ин зæгъæн рохсаг… Æ рохс ном ба нин цитгийнаг ке æй, е ба бæрæг æй аци дессаг мадзали ин æ номерæнæн хецæн номинаци нисангонд ке ’рцудæй, е дæр.

Исфæлдистадон конкурси рæстæг ма арæзт æрцæудзæнæй æндæр аллихузон мадзæлттæ дæр, зæгъæн, спорти ветеранти ’хсæн футболæй республикон еристæ «Созо».

Зæрдиагæй уæ хонæн аци мадзалмæ, уомæй уæхецæн исараздзинайтæ алæмæти зæрдæхцæуæндзийнадæ.

ГИБИЗТИ Регинæ