Уæрæсей Бони фæдбæл дзубандий фæлгонцæн аци хузæ ке равзурстан, уомæ гæсгæ еске, ка ’й зонуй, бадес кæндзæнæй, гъома, айæ ба ци барæ даруй бæрæгбонмæ. Махмæ гæсгæ ба, уой ахсгиагдзийнади хæццæ æмзæлон æй аци хузи медес дæр.

Зæгъун гъæуй уой, æма  Кæсæг-Балхъари Республики адæмон хузæгæнæг, Уæрæсей аййевæдти Академий иуонг Хамид Савкуев сæ адæмон эпоси Нарти кадæнгитæмæ гæсгæ, æвдесуй номдзуд Сосруко (мах Нарти кадæнгити – Сослан) æма Тотраши (Тотрази) лæгæй-лæгмæ тох. Сæ тох ба ’й сæ кадæ æма намуси сæрбæлтау.

Æма абони нæ Фидибæстæ дæр уæхæн тохи уавæрти æй: абони Уæрæсей æзнæгтæ æ нихмæ карз тох исаразтонцæ, аллихузон фудракæндитæй архайунцæ нæ исæдзæллаг унбæл. Фал, уæхуæдтæ ’й уинетæ, неци рауайдзæнæй сæ фудвæндитæй. Уой син нæ бæсти Президент Владимир Путин цал æма цал хатти – кæми федар загъдæй, кæми ба бæлвурд гъуддæгутæй балæдæрун кодта. Уотæ – мæнæ æрæги Петербурги ци аллианзон экономикон форум арæзт æрцудæй, уоми æ радзубандий (уой фæдбæл æрмæг мухур кæнæн абони 2-аг фарсбæл). Æ загъд адтæй: Уæрæсей Бон æй цийфæнди ралхъевæ-балхъевити нихмæ федарæй фæллæуун, æма æ размæцуди æнтæстгин ун. Уæхæн нифс ба уомæй æй, æма нæ дзилли еудзийнадæ æндон æй, нæ тæлæн æй нæ Фидибæсти хуæрзагадæ æма æнæмæнгæ уæлахезон ке уодзæнæй, е ни федарæй æруагæс кæнуй.

Еугæр нæ дзубанди Нартæй райдæдтан, уæд кæронбæттæни æримисæн еу хабар – айразмæ дæр ин æ кой кодтан, фал ма ’й еума хатт ракæнун бунати уодзæнæй. Цæветтонгæ, Нарти гуппурсартæ æмбурдæй бадтæнцæ сæ къæлæтгин къелатæбæл. Тæрхон кодтонцæ сæ дзилли гъуддæгути фæдбæл.

– Нартæ Нартæ уæд адтæнцæ, арв дæр си нæрун уæд не ’ндиудта, æма мæлун ку зудтонцæ сæ дзилли сæрбæл, алке си æхебæл хуæцун ку фæразта. Нартæ Нартæ уæд адтæнцæ, æма нæртон адæймаги цъухæй рæстдзийнадæй æндæр ку неци игъустæй. Нæ дзиллæ дзиллæ уæд адтæнцæ, æма сæ сæр сæрмæ ку хастонцæ.

Уотæ радзурдта Нарти æмбурди еу хестæр.

– Адæм хицæ уæд кодтонцæ Нартæмæ, сæ хуарзи кой идардмæ уæд игъустæй Нартæн, сæ губунбæл хуæцун ку фæразтонцæ, ниуæзтæй сæхе ку гъæуай кодтонцæ, ронгæй сæ бæрцæ ку зудтонцæ; аци рæстæги хузæн сæ мæрдти къоти ку нæ калдтонцæ ниуæзтæ æма хуæрдæбæл, æнæгъдау фурниуæзтæй се ’фсармæ ку нæ исафтонцæ, сæ зунд, се ’хсарæ ку нæ састонцæ.

Уотæ загъта дуккаг хестæр:

– Нæ адæм адæм уæд адтæнцæ, æма кæстæр хестæри ку нимадта, кадæ ин ку лæвардта, кæрæдземæ ку игъустонцæ; силгоймаги туххæй æ цæсгон ку неке исафта.

Уой радзурдта æртиккаг хестæр…

Аци хабармæ гæсгæ уой зæгъуйнаг ан, цæмæй нæмæ зунд æма уоди хъаурæ фагæ разинна, Нарти хестæртæ ци хуæрзменеугути кой кодтонцæ, уонæй æнхæст унæн, уонæй нæ ирисхъи хабæрттæ æнхæстæй аразунгъон куд уæн!.