Кафт æма заруни фольклорон ансамбль Гъæдгæрони хъæбæр раги фæззиндтæй, Цæгат Иристони адæмон исфæлдистадон коллективти фиццæгти хæццæ. Æ архайæг кадгин лæгтæ æма силгоймæгтæ сæ аййевадæ æвдистонцæ айдагъ нæ республики нæ, фал нæ агъазиау бæсти берæ рауæнти, сауæнгæ фæсарæнти дæр ма адтæнцæ.

Сæ фарни гъуддæгутæ нæ фесавдæнцæ, рæсугъдæй сæ идарддæр хæссунцæ сæ фæдонтæ. Аци культурон артдзæсти коллективтæ анз еу хатт адæми тæрхонмæ рахæссунцæ сæ исфæлдистадон æнтæстдзийнæдтæ, дзуапдæттæн концертти хузи. Æрæги бабæй исаразтонцæ уæхæн концерт, æма си гъæубæстæ хъæбæр фæббоз æнцæ: «Арфиаг уи ан, æгайтима нин нæ зæрдитæ уоййасæбæл барохс кодтайтæ!..»

– Нæ культурæ æма аййевадæ нæ гъæздугдзийнадæ ‘нцæ, зæгъуй Басити Эльзæ. – Æнæ уонæй еунæг адæмихатт дæр нæййес. Не ‘нгом коллективи архайд, нæ адæмон исфæлдистадæбæл æновуддзийнадæ, нæ гъæубæсти уарзон цæстдард нин æнцæ нæ разæнгардгæнгутæ.