ЕУГУРУÆРÆСЕУОН адæмон фронти цæгатиристойнаг активисттæ æма журналисттæ Ирæфи æма Æрæдони районти центрон сæйгæдæнтти разамонгути хæццæ æрæги исбæрæг кодтонцæ фельдшерон-акушерон косæндæнттæ æма амбулаторити кусти уавæртæ.
Æртæ мæйей размæ Красногори байгон æй амбулатори. Фиццаг агъаз бакæнунæн ци медицинон дзаумæуттæ гъæуй, етæ си еугурæй дæр æнцæ. Цалцæг дæр æй хуарз искодтонцæ, фал си аййеппитæ дæр ес: интернет си нæ косуй, амбулаторий алфамбулай фæзуат горенæй нæ исæхгæдтонцæ, æма имæ гъæуи цæргути æвæгæсæг хæдзарон фонс цæунцæ.
– Ци рæсугъд къотæртæ æма деденгутæ си ниййаразтан, уони еци фонс цалдæр бонемæ бахуардтонцæ, – гъаст кæнунцæ амбулаторий косгутæ.
Ирæфи райони Советон поселокки фельдшерон-акушерон косæндонæ нерæнгæ ма æрдæгарæзт æй, цæунцæ си аллихузи цалцæггæнæн куститæ. Æ алфалæмбулай фæзуат дæр, куд зæгъунцæ, уотемæй гъæуама аййевгонд æрцæуа, зæгъæн, аци медицинон косæндонæмæ бацæуæнтæ гъæугæ хузи арæзт æрцæуонцæ.
– Цæмæдæр гæсгæ райдайæни аразгутæн над исцалцæг кæнуни куст нæ баихæс кодтонцæ, æма райони разамундæн бафæдзахстан, цæмæй аци фарстамæ се ’ргом раздахонцæ æма фельдшерон-акушерон косæндонæмæ æнцонæй бацæуæнтæ арæзт æрцæуонцæ, – загъта Адæмон фронти цæгатиристойнаг æнхæсткоми разамонæг Гæлити Клим.
Адæмон фронти эксперттæ ма бабæрæг кодтонцæ, дууæ анзей размæ Толдзгуни ци фельдшерон-акушерон косæндонæ арæзт æрцудæй, уой дæр. Куд рабæрæг æй, уотемæй е медицинон косæндзаумæуттæ æма хуастæй æнхæстæй ефтонггонд нæй.
– Адæмæн сæ цæрæн рауæнти медицинон агъазæй æнхæстæй æма афойнадæбæл испайда кæнуни фадуат ес æви нæ, уой рæстæгæй-рæстæгмæ исбæрæг кæнæн, – зæгъуй Гæлити Клим. – Амæй размæ Горæтгæрон æма Рахесфарси районти дзæбæхгæнæндæнттæ бабæрæг кодтан æма си ци гъæндзийнæдтæ разиндтæй, уони туххæй игъосункæнуйнæгтæ балæвардтан æнæнездзийнадæ гъæуайкæнуйнади Министрадæмæ. Нерæнгæ аййеппитæн сæ еу хай еуварсгонд æрцудæй. Нури инспекцион балци æрмæгутæ дæр профилон министрадæ æма районти администрацитæмæ барвистан. Æруагæс ни кæнуй, хецауеуæггæнæг адæймæгутæ нин æвæстеуатæй дзуапп ке ратдзæнæнцæ, е.