Уæрæсей æдасдзийнади Совети нимæрдар Сергей Шойгу, Цæгат-Кавказаг федералон зилдмæ ’рцæугæй, Нальчикки исаразта сæрмагонд æмбурд. Архайдтонцæ си Цæгат-Кавказаг федералон зилди Уæрæсей Президенти Æнхæстбаргин минæвар Юрий Чайка, зилди еугур регионти разамонгутæ. Цæгат Иристони номæй си архайдта республики Сæргълæууæг Сергей Меняйло.

Æмбурди ци ахсгиаг фарстати фæдбæл цудæй дзубанди, уонæн сæ сæйрагдæртæй еу адтæй – региони цæргути зундирахаст фесинмæ æма знаггадæхæссæг гъудитæй багъæуай кæнун. Хумæтæги имæ уæлдай лæмбунæгдæр æргом нæ раздахтонцæ. Зундгонд куд æй, уотемæй Нигулæни паддзахæдтæ æмдзæхдонæй архайунцæ уæрæсейаг æхсæнадæ ниххæлхъойтæ æма ниддехтæ кæнунбæл,  сæ уодæй уод кæнунцæ, уæхæн уавæртæ си исаразун, цæмæй ами  цæрæг аллихузон адæмихæттити æма аллихузон динтæ æнхæстгæнгути ’хсæн нихмæлæуди, экстремизми æма сепаратизми идеологи иситинг уа.

Æмбурди  нисангонд æрцудæнцæ, нæ нихмæ архайгути информацион-психологон ракæндтити фудæй ци медбæстон тæссагдзийнæдтæ фæззиннуй, уонæн, еуемæй, сæ ирæзт бауорамуни, иннемæй ба сæ бустæги искунæг кæнуни туххæй мадзæлттæ. Уæлдай æргом раздахтонцæ, ирæзгæ фæлтæрти гъомбæладæмæ. Гъæуама етæ исаразонцæ Райгурæн бæстæбæл æновуд уни æма уæрæсейаг паддзахадæдзийнади æгъдæуттæ æма фæткитæ рæстзæрдæй æнхæст кæнуни зундирахасти хæццæ.

Æмбурди архайгутæ лæмбунæг æркастæнцæ паддзахадон хецаудзийнади оргæнти, бунæттон хеунаффæйадæ æма граждайнаг æхсæнади институтти архайд ци уавæри æй, истори ракæнæ-бакæнитæй «нæуæг» кæнуни, ксенофоби æма неонацизм парахат кæнуни нихмæ ’рлæууни, традицион культурон æма уодварни хуæрзæгъдаудзийнади хæзнатæ багъæуай кæнуни гъуддаги. Уой фæдбæл дзубандий рæстæг исбæрæг кодтонцæ сæйраг нæхъæртондзийнæдтæ райеуварс кæнуни мадзæлттæ. Гъæуама федералон зилди æма бæсти æхсæнадон-политикон уавæр ма фæккеуа, фал гъомусгинæй-гъомусгиндæр кæна нæ Фидибæсти хуарзæн.

Амунд æрцудæй,  цæмæй фадуæттæ искæнонцæ адæймаги райрæзтæн, социалон æздæхт экономики ирæзтæн, адæми фæллойнадон архайд æма цæргути фæрнугадæн.

Уæрæсей æдасдзийнади Совети нимæрдар Сергей Шойгу Цæгат-Кавказаг федералон зилди балций уогæй, сæрмагондæй бабæрæг кодта Цæгат Иристон.

Еци рæстæг,  Юрий Чайка æма Сергей Меняйло дæр æ хæццæ, уотемæй бабæрæг кодтонцæ Беслæни террористон фудракæнди ка фæммард æй, етæ кæми æвæрд æнцæ, еци мемориалон уæлмæрдтæ «Изæдти сахар», деденгути бæститæ исæвардтонцæ циртдзæвæн «Хъонци бæласæ» æма фудбæлахи бахауæг адæми ервæзун кæнгæй ка фæммард æй, еци бæгъатæр æфсæддонтæн циртдзæвæни рæбун. Куд загъта, уотемæй еци фудбæлахи ка бастъалдæй, уони ниййергути зæрдрист лæдæрд æй Уæрæсей дæр æма дуйней еугур рæстзæрдæ дзиллитæн дæр, æма хъонц кæнгæй дæр гъæуама æмзунд-æмхъаурæй архайæн, цæмæй æверхъаудзийнæдтæ æрцæунæн æгириддæр ма уа гæнæнтæ.

Дзæуæгигъæуи ба Сергей Шойгу исаразта косæг æмбурд. Архайдтонцæ си Уæрæсей Президенти Æнхæстбаргин Минæвар Цæгат-Кавказаг федералон зилди Юрий Чайка, Цæгат Иристони Сæргълæууæг Сергей Меняйло, нæ республики хецаудзийнади бæрнон косгутæ.

Æмбурди æрдзубанди кодтонцæ сæрмагонд æфсæддон операций архайгути æма бийнонти социалон ефтонгади фарстатæбæл, террори нихмæ циуавæр мадзæлттæ æма куд æнхæстгонд цæунцæ, уæдта еци ахсгиагæй-ахсгиагдæр гъуддаги фæдбæл æнæмæнгæ ма ци исаразун гъæуй, уобæл. Фæббæрæг кодтонцæ сæрмагонд æфсæддон операций архайгутæн, сæ бийнонтæн, ка си фæммард æй, уони хæстæгутæн уæлæнхасæн уæлбартæ, зæрдæдарæнтæ дæттуни фарстатæ.

Дзубанди ма цудæй уобæл дæр, цæмæй агъазгонд кæмæн гъæуама ’рцæуа, уонæмæ фæккæсонцæ гъæугæ документтæ æмбурд кæнунмæ, æма Уæрæсей алли регионти æхцай агъаз, субсидитæ, компенсацитæ райсуни фарста æнцондæрæй лухгонд цæуа, сæ феддонтæ син  федгæй сæмæ æвæстеуатæй агъаз куд хъæрта, уотæ..

Аци æрмæг цæттæгонд æй нæ республики Сæргълæууæг æма Хецауади пресс-служби игъосункæнуйнагмæ гæсгæ.