25 майя 2022

НÆУÆГ ÆФСÆДДОН ГОСПИТÆЛ

30.12.2020 | 16:22

2020 анзи Дзæуæгигъæуи байгон æй нæуæг æфсæддон берæкъабазгин медицинон центр.

Уой туххæй фегъосун кодта Уæрæсей Гъæуайкæнуйнади министради пресс-службæ.

«Нæуæг медицинон косæндонæ исцæттæ ’й Уæрæсей Федераций Гъæуайкæнуйнади министради Æфсæддон-арæзтадон комплекси дæлхайæдти хъауритæй», – загъта пресс-служби минæвар. Æ дзубандимæ гæсгæ, госпитæли æвæрд æрцудæй тæккæ нуриккондæр медицинон техникæ æма æндæр ефтонггæрзтæ.

«Медицинон центри исконди косунцæ дууæ хайади – хирургион æма терапевтон, ес си инфекцион æма пульмонологон къæбинеттæ, диагностикæ æма æнæраргъæвгæ медицинон агъази дæлхайæдтæ, уæдта æртасæн лаборатори», – æ дзубанди фæббæлвурддæр кодта пресс-служби минæвар. Центри косунцæ 100 дохтири æма æндæр медицинон специалисттæ.