19 майя 2024

НÆУÆГ АНЗИ НÆУÆГ НИСАНТÆ НÆ ИХÆСГИН КÆНУНЦÆ ÆНТÆСТГИН КУСТÆЙ

14.01.2023 | 21:12

Цæгат Иристони Сæргълæууæг Сергей Меняйлой разамундæй адтæй нæ республики Хецауади иуонгтæ æма районти разамонгути алликъуæреуон аппаратон æмбурд. Дзубанди си цудæй, нæ аллибони царди нуртæккæ ци райаразуйнаг фарстатæ ес, уони гъæугæ хузи райаразуни фæдбæл.

Фиццагидæр дзубанди цудæй уой фæдбæл, æма никки фулдæр æргом æздахун гъæуй адæми цардиуаги æдасдзийнади туххæй æнæмæнгæ æнхæсткæнуйнаг мадзæлттæ аразун. Аци фарста æй хъæбæр ахсгиаг. Гъулæггагæн, республики нæдтæбæл æрцудæй 43 фидбилизи, æртæ адæймаги си фæммард æнцæ, алли анхоссæгтæмæ гæсгæ æрцудæй 21 зингисервæзти, еу адæймаг си гъигæдард баййафта.

Иннæ ахсгиаг фарста – нури эпидемиологон уавæр. «Роспотребнадзор»-и цæгатиристойнаг управлений бæрæггæнæнтæмæ гæсгæ, грипп æма æндæр хуæцгæ незтæй сæйгити нимæдзæ берæ фæмминкъийдæр æй сувæллæнтти ’хсæн дæр.

Æмбурди дзубанди цудæй 2023 анзи кусти пъланбæл. Сæрмагонд æргом ’здæхт æрцудæй ахсгиаг социалон инфраструктури объектти арæзтадæмæ, бюджети уавæрмæ, бундорон арæзтадæмæ.

– Алли разамонæг дæр гъæуама нисангонд æмгъудтæй цалдæр ампъези раздæр цæуа, идардмæуинагæ æма арфгъудигæнагæ уа, уомæн æма, æ кусти ихæстæ рагацау ка æнхæст кæна, æнтæстдзийнадæ дæр уони къохи бафтуйдзæнæй, – загъта Сергей Меняйло.

Аци анз устур æргом здæхт цæудзæнæй автомобилон нæдти уавæрмæ, уæдта транспортæй ефтонгадæмæ. Республики Сæргълæууæги загъдмæ гæсгæ, районти хæццæ транспортон бастдзийнадæмæ уодзæнæй хецæн æркаст.

Хайон æфсæдтон фæдздзурдмæ гæсгæ Гæрзефтонг тухти рæнгъитæмæ ке байагурдтонцæ, уони бийнонтæн циуавæр агъаз лæвæрд цæуй, уой туххæй радзурдта республики фæллойнæ æма социалон ирæзти министр Айдарти Алинæ.

Дзубанди цудæй скъолати бундорон цалцæги, нæ республики автономий 100 анзей юбилеймæ цæттæдзийнади, Цæгат Кавкази кинохроники студи иснæуæг кæнуни, Дзæуæгигъæуи Дони станцæ æма Терки билгæрæнтти аййевгæнæн кустити æма æндæр фарстати фæдбæл. Куд амунд æрцудæй, уотемæй Цæгат Иристони цæргутæн хецаудзийнади ’рдигæй зæрдæ æвæрд цæмæй æрцудæй, еугур еци гъуддæгутæ гъæуама æнхæстгонд æрцæуонцæ афойнадæбæл æма гъæугæ хузи.

Республики Сæргълæууæг районти разамонгутæн бафæдзахста, цæмæй адæми еунæг курдиадæ дæр æнæргъудийæй æма æнæдзуаппæй ма изайа, уæлдай лæмбунæг æргом æздахонцæ сахартæ æма гъæути санитарон уавæрмæ, цæрæнуатон-коммуналон хæдзаради лæггæдтæн хъалонтæ афойнадæбæл æма æнхæстæй æмбурд кæнунмæ.