24 майя 2022

НАМУСГИН – Æ ЦАРДВÆНДАГ, ÆНОСОН – Æ РОХС НОМ…

09.12.2020 | 15:59

Уæрæсе æма Иристони культурæбæл æрцудæй уæззау зиан – æ цардæй рахецæн æй зундгонд бæхбæлбадæг, педагог, Уæрæсей Федераций æма Цæгат Иристон-Аланий адæмон артисткæ, фидибæстаг æма дуйнеуон цирки аййевади таурæхъон архайæг Туйгъанти Дзерассæ Михали кизгæ.

Туйгъанти Дзерассæ райгурдæй 1929 анзи цирки зундгонд артисткæ – советон бæхгин цирки бундорæвæргутæй еу Туйгъанти Михал æма уæлдæфон гимнасткæ Нинæ Никитаси бийнонти.

Астæуккаг скъола фæууни фæсте, Дзерассæ ахур кæнунмæ бацудæй Мæскуй фæсарæйнаг æвзæгти Морис Торези номбæл институтмæ. Райдайæнти бæхти спортмæ æмхиц нæ адтæй, устурдæр æргом æздахта балет æма национ кæфтитæмæ. Фал еухатт æ фиди репетицæмæ ку бакастæй, уæд æй бафæндадтæй бæхбæл исбадун. Уотæ райдæдта нæ бæсти ирон цирки аййевади искурдиадæгиндæр минæвæрттæй еуей цæмæдессаг æма ирд цард. Æ архайдæй Дзерассæ идæрдтæбæл райгъусун кодта æ райгурæн Иристон æма еугур Уæрæсей ном.

1951 анзæй фæстæмæ æ фиди хæццæ косгæй, 1962 анзи Дзерассæ бундор æрæвардта бæхбæлбадгути нæуæг къуар «Иристон»-æн. Еци исфæлдистадон къуари гастролтæ алкæддæр уиуонцæ советон æма фæсарæйнаг цирки аййевадæуарзгути бæрæгбон.

Æ æведуйгæ искурдиади туххæй Туйгъанти Дзерассæ хуарзæнхæгонд æрцудæй бæрзонд паддзахадон хуæрзеугутæй – лæвæрд ин æрцудæй Фæллойнадон Сурх турусай æма «Кади нисани» ордентæ. Исаккаг ин кодтонцæ Уæрæсей Федераций æма Цæгат Иристони адæмон артистки кадгин ном, иссæй Цирки аййевади еугурцæдесон конкурси лауреат.

Дзерассæ æртинсæй анземæй фулдæр разамунд лæвардта исфæлдистадон къуар «Иристон»-æн, фал бæхбæлбадгути къуари хæццæ æ куст ниууадзгæй дæр, æ архайд нæ фæмминкъийдæр æй. Берæ æнзти ма зæрдиагæй кодта педагогон куст, цирки æригон артисттæн æнæвгъауæй лæвардта æ гъæздуг зонундзийнæдтæ æма  æ фæлтæрддзийнадæ.

Цæгат Иристон фæстаг «фæндараст» зæгъуй, не ’мзæнхонтæ алкæддæр сæрбæрзонд кæмæй адтæнцæ, æ ном æностæмæ нæ республикæ æма еугур Уæрæсей культури анзфинсти кæмæн байзайдзæнæй, æ еци кадгин кизгæн.

БИТАРТИ Вячеслав,

Алексей МАЧНЕВ,

ТУСКЪАТИ Таймораз.