Аци анз Цæгат Иристони бийнонтæй 6,8 минемæй фулдæр испайда кодтонцæ ниййерæги сертификати лæггæдтæй.

Уæрæсей Социалон фонди цæгатиристойнаг хайадæ æнгъæлдзау силгоймæгтæн æма нæуæгигурд сабийтæн медицинон агъаз бакæнунæн республики медицинон косæндæнттæмæ барвиста 36,7 миллион соми.

Ниййерæги сертификати фæрци ес силгоймæгти консультаций лæггæдти, сувæллон райгуруни рæстæг медицинон агъази, уæдта сабийи царди фиццаг анзи дæргъи медицинон æртасæнти æргътæ бафедуни фадуат. Æнгъæлдзау силгоймæгти номхигъдтæмæ ци бон бахæссунцæ, уæдæй дууæ боней æмгъудмæ медицинон косæндонæ амунд документ электрон уагæй исаразуй. Ниййерæги сертификат силгоймæгти консультаций исаразуни фадуат ку нæ уа, уæд æй ниййерæгæн раттунцæ арæндони, кенæдта сувæллæнтти поликлиники.

– Ниййерæги сертификати аргъ æй дууадæс мин соми. Æрмæги æхцайæй райсæн ке нæййес, еци амунд æхцатæ барветунцæ медицинон косæндæнттæмæ. Аци косæндæнттæ сæ бахарз кæнунцæ дохтиртæн мизд бафедуни, уæдта гъæугæ ефтонггæрзтæ балхæнуни гъуддæгутæбæл, – зæгъуй регионалон хайади разамонæг Милдзихти Аслан.

Документ ци æртæ талонемæй арæзт æй, уонæй сæ алкæций нисантæ исæвæрунцæ медицинон косæндæнттæмæ бахатуни рæстæг: 4000 соми – силгоймæгти консультаций цæстдарди туххæй (барадон, психологон æма медицинон-социалон агъаз нимайгæй), 6000 соми – арæндони фæййагъаз кæнуни туххæй, 2000 соми – сабиймæ æ царди фиццаг анз сувæллæнтти поликлиники цæстдарди туххæй.

Исонибони мадæ кæд фазæнттæмæ æнгъæлмæ кæсуй, уæддæр ин раттунцæ ниййерæги айдагъдæр еу сертификат (уомæн æма аци документ раттунцæ сувæллонæн нæ, фал силгоймагæн).

Документæн гæгъæдитæ исаразунæн исонибони мади ихæс æй паспорт, æнæмæнгæ банхæсткæнуйнаг медицинон фæдзæхстати полис æма СНИЛС бавдесун. Сертификат куддæр исаразонцæ, уотæ аци документи бæрæггæнæнтæ фæууинæн уодзæнæй портал «Госуслуги»-йи «личный кабинет»-и

ФЕППАЙУЙНАГ: æнгъæлдзау силгоймагмæ æхцай бундорбæл кæд цæстæ дарунцæ, уæд ниййерæги сертификат нæ исаразунцæ æма ин медицинон лæггæдти аргъ нæ бафедунцæ.

Кæд ма уæмæ фарстатæ исæвзурдæй, уæд уæ бон алкæддæр лæвар бадзорун æй Уæрæсей Социалон фонди еугонд контакт-центри телефони уæхæн номерæй: 8-800-100-00-01. Уæрæсей Социалон фонди цæгатиристойнаг хайадæ косуй авдисæрæй цуппæрæни уæнгæ – 9.00 сахаттемæй 18.00 сахаттей уæнгæ, майрæнбони ба – 9.00 сахаттемæй 16.00 сахатти æма 45 минуттей уæнгæ.

Уæрæсей Социалон фонди цæгатиристойнаг хайадипресс-службæ