01 декабря 2022

ӔНОСТИ ӔВДЕСӔНТӔ – ӔНОСОН ӔМБӔЛЦЦОНТӔ

22.04.2022 | 11:59

Фондз ӕма ӕхсӕзинсӕй анзей размӕ (1897 анзи 8 апърели) Терки облӕсти адӕмихӕттити цардарӕзти ӕрцудӕй дессаги ӕхцӕуӕн хабар – Дзӕуӕгигъӕуи кадгин уавӕри игонгонд ӕрцудӕй Терки облӕстон музей. Еци цау цӕйбӕрцӕбӕл ахсгиаг адтӕй уӕди рӕстӕги, е бӕрӕг ӕй уомӕй дӕр, ӕма культурон-историон артдзӕстӕ иссӕй, ами уӕд ка фӕззиндтӕй, уӕхӕн фиццаг наукон косӕндонӕ. Ӕма нӕ фӕндуй, музей кутемӕй ӕма цӕй фӕрци фӕззиндтӕй, уой фӕдбӕл хабӕртти хӕццӕ уӕ базонгӕ кӕнун. Нӕ радзубандий пайда кӕнӕн, историон наукити кандидат Цогойти Валоди кӕддӕр ци уац ниффинста, уомӕй дӕр ӕма ма ӕндӕр зонадон ӕрмӕгутӕй дӕр.

* * *

Аци азгъунсти æ рæстæги адтæй Теркаг облæсти музей, абони си æй нæ маддæлон æвзаг æма литератури Музей.

Нӕудӕсӕймаг ӕноси дуккаг ӕмбеси Уӕрӕсей алли регионти дӕр рапарахат ӕй бӕстӕзонунади берӕвӕрсуг куст. Уӕди рӕстӕгути Цӕгат Иристон хаст цудӕй Терки облӕсти искондмӕ, ӕма е дӕр еци ахсгиаг кусти фӕсте нӕ байзадӕй. Ци берӕ наукон экспедицитӕ арӕзт цудӕй, уони фӕрци ӕртаст ӕма наукон ӕгъдауӕй бӕлвурдгонд цудӕнцӕ нӕ адӕми истори, культурӕ, цардарӕзти фӕткитӕ, ӕгъдӕуттӕ ӕма берӕ ӕндӕр хабӕрттӕ. Ахургӕндтӕн уӕлдай цӕмӕдессагдӕр адтӕй, дууӕ мин анзей дӕргъи ка фӕллӕудтӕй ӕма гъӕуайгонд ка ‘рцудӕй, Хъобани еци недзамайнаг культурӕ. Ӕма уӕд ӕхсайӕймаг ӕнзтӕй фӕстӕмӕ Дзӕуӕгигъӕумӕ еу инней фӕдбӕл цӕун байдӕдтонцӕ, айдагъ Уӕрӕсей нӕ, фал ӕнӕгъӕнӕ дуйней дӕр игъустгонддӕр ка адтӕй, уӕхӕн археологтӕ, лингвисттӕ ӕма этнографтӕ – Рудольф Вихров, Всеволод Миллер, Владимир Антонович, Витторио Селла, Эрнест Шантр ӕма иннетӕ. Уӕлдай ахсгиагдӕр ӕма хъазардӕр иссерӕггӕгтӕ уӕди рӕстӕги сосӕггай ласт ӕрцудӕнцӕ фӕсарӕнтӕмӕ ӕма абони дӕр ма ‘нцӕ Лондони, Парижи, Вени ӕма Берлини тӕккӕ зундгонддӕр музейти сӕрустурдзийнадӕ. Иннӕ хӕзнатӕ ба ӕрвист ӕрцудӕнцӕ Тифлис ӕма Санкт-Петербургмӕ.

Аци гъуддагбӕл бунӕттон интеллигенций рӕстбӕлгъудигӕнӕг минӕвӕрттӕ дӕр арази нӕ адтӕнцӕ. Гъе уомӕ гӕсгӕ ба Григорий Вертепови разамундӕй арӕзт хъӕппӕресӕй архайун байдӕдтонцӕ ами, Дзӕуӕгигъӕуи, сӕрмагонд музей исаразунбӕл. Сӕ фарс рахуӕстӕнцӕ бунӕттон хецауадӕ дӕр, ӕма 1893 анзи Терки облӕсти Статистикон комитет рахаста унаффӕ Дзӕуӕгигъӕуи музей исаразуни туххӕй. Ами гъӕуама гъӕуайгонд цудайуонцӕ, облӕсти цӕрӕг адӕмихӕттити царди уагӕ ӕма дуйнелӕдӕрундзийнадӕ ка ‘вдистайдӕ, уӕхӕн экспонаттӕ. Уомӕй уӕлдай ма еугур еци ӕрмӕгутӕ гъӕуай кӕнун гъудӕй уомӕ гӕсгӕ дӕр, ӕма етӕ заманай парахат равгитӕ лӕвардтонцӕ региони истори ӕцӕгдзийнади цӕстингасӕй, географион ӕма геологон ӕгъдауӕй исахур кӕнунӕн.

Фӕстӕдӕр райдӕдта недзамайнаг предметтӕ ӕмбурд кӕнуни куст дӕр. Беретӕ ба музейӕн ӕхцайӕй дӕр агъаз кодтонцӕ ӕма фиццаг бӕрӕггӕнӕнтӕ адтӕнцӕ зӕрдрохсгӕнӕг. Фиццаг равдист 1897 анзи байгон ӕй, Статистикон комитетӕн уӕд Вагзали проспектбӕл (нур – Маркови гъӕунгӕ) ци азгъунст адтӕй, уоми. Еци цау цӕйбӕрцӕбӕл цӕмӕдессаг иссӕй, уомӕн ӕвдесӕн иссӕй, адӕм куд дзиллонӕй гулфӕн кӕнун байдӕдтонцӕ уордӕмӕ, айдагъ е дӕр. Гъулӕггагӕн, равдист дууӕ анзей фӕсте ӕхгӕд ӕрцудӕй, финансон фӕрӕзнитӕ ке нӕ фагӕ кодтонцӕ, уой фудӕй.

Статистикон комитет 1902 анзи нӕуӕгӕй ӕркастӕй ӕ раздӕри унаффӕмӕ ӕма иснисан кодта, музейи нӕуӕг азгъунсти арӕзтадӕбӕл ка архайдтайдӕ, уӕхӕн къамис. Ӕ исконди адтӕнцӕ облӕсти хецауи хуӕдӕййевӕг инӕлар Писарев, бунӕттон интеллигенций минӕвӕрттӕ – Тускъати Иван, Грациан Тер-Барсегов, А.Михайлов ӕма иннетӕ. Фӕстӕдӕр къамис исфедар кодта архитектор Иван Рябикини проект. Фӕндӕ кодта, уӕди рӕстӕги ӕхуӕдӕг музейи хузӕн ка адтайдӕ, уӕхӕн нивӕфтуд азгъунст исаразун. Гъӕуама си адтайдӕ равдистити зал, цалдӕр уати экспозицитӕ ӕрӕвӕрунӕн, киунугӕдонӕ ӕма архивӕн.

Музейи азгъунсти проект исцӕттӕ кодта инженер И.В.Рябикин, ӕ аразунмӕ ба бавналдтонцӕ 1902 анзи. Зӕгъун гъӕуй, Дзӕуӕгигъӕу ӕнӕгъӕнӕй дӕр еумӕйагӕй архайдта еци ахсгиаг гъуддаги. Ци инсӕй мини ӕмбурдгонд ӕрцудӕй, уонӕй фондз мини иснивонд кодтонцӕ сахари цӕргутӕ, финддӕс мин соми ба Терки хъазахъаг ӕфсад ӕхе фӕрӕзнитӕй, сахари хецауадӕ ба арӕзтадӕн лӕвар радех кодта зӕнхи хай Соборон фӕзи. Мадта иннӕ раззагдӕр дзиллӕ дӕр, ке бон си куд адтӕй, уотӕ разӕнгардӕй агъаз кодтонцӕ. Зӕгъӕн, амалгъон Д.Васильев арӕзтадон ӕрмӕгутӕ ардӕмӕ ӕрласта, барон Штейнгели завод ба, хуӕздӕр ма ниууадзӕ, уӕхӕн агорийӕй фӕййагъаз кодта.

Куд фӕстӕдӕр, уотӕ арӕзтади еугур зиндзийнӕдтӕ минкъийӕй-минкъийдӕр кӕнгӕ цудӕнцӕ, ӕма 1907 анзи 21 январи музейи нӕуӕг ӕртӕуӕладзугон азгъунст ӕ дуӕрттӕ урух байгон кодта ӕрбацӕугути размӕ.

Музей байгон ӕй кадгин уавӕри, радзубанди си кодта облӕсти хецау инӕлар А.Колюбакин, иуазгутӕй ба – Стъараполи музейи бӕрнон косӕг А.Собриевский. Нӕуӕг бӕстихайбӕл киристон ӕгъдаумӕ гӕсгӕ исаргъудта сугъдӕг фидӕ Путилин. Уой фӕсте ба сӕрмагонд ӕмбурди равзурстонцӕ музейи разамунд. Ӕ цӕстдарӕгӕй (директорӕй) иснисан кодтонцӕ Григорий Вертепови, хайӕдти хецӕуттӕ ба иссӕнцӕ: ӕфсӕддон хайади – инӕлар М.Пржевальский, археологон – Н.Поляков, историон – Г.Тер-Барсегов, этнографион – Д.Вырубов, промышленнон – В.Грозмани.

Ӕрмӕгутӕй уӕлдай гъӕздугдӕр адтӕй археологон хайадӕ. Ӕ экспозицити ӕвӕрд адтӕнцӕ, Згиди ке иссирдтонцӕ, уӕхӕн аййевгӕнӕнтӕ, хъобайнаг бронзӕй конд фӕрӕттӕ, ӕрхийӕй конд адӕймаги сӕр, ӕндӕр рагон дзаумӕуттӕ. Газет «Терские ведомости» куд фегъосун кодта, уотемӕй Тифлиси музей Дзӕуӕгигъӕуӕн равардта, раздӕр Терки облӕстӕй ласт ка ‘рцудӕй, уӕхӕн археологон иссерӕггӕгтӕ, станицӕ Ессентукскийи цӕрӕг хъазахъаг Ф.Горелкин ба музейӕн балӕвар кодта рагон ӕхцати коллекци ӕма Рекоми разӕй рахаст фидтӕлтиккон дзаумау.

Музейи зонадон косгутӕ дӕр зӕрдиагӕй бавналдтонцӕ рагон Иристони циртдзӕвӕнтӕ гъӕуай кӕнунмӕ. Етӕ архайдтонцӕ археологон ӕма этнографион экспедицити, кастӕнцӕ лекцитӕ бӕстӕзонӕн фарстати туххӕй. Еузагъдӕй, алцидӕр аразтонцӕ, цӕмӕй ӕрбацӕугутӕ бауарзонцӕ фидибӕсти истори. Сӕ минкъий коллективӕн ахедгӕ агъаз кодта хецауадӕ дӕр. Музейӕн лӕвӕрд ӕрцудӕй финстӕгутӕ ӕма пакеттӕ лӕвар ӕрветуни, уӕдта ӕ коллекцитӕ банхӕст кӕнуни туххӕй фӕсарӕнтӕй рагон дзаманти дзаумӕуттӕ ӕма ӕндӕр ӕрмӕгутӕ пошлинӕ нӕ бафедгӕй рафинсуни барӕ.

Музей 1911 анзи лӕвӕрд ӕрцудӕй Терки хъазахъи ӕфсадӕн ӕма уой фӕрци ӕ материалон уавӕр бӕлвурд фӕффедардӕр ӕй. Номдзуд Брокгауз ӕма Ефрони зундгонд энциклопедион дзурдуати Дзӕуӕгигъӕуи музей нимад ӕрцудӕй паддзахи Уӕрӕсей тӕккӕ устурдӕр ӕхсӕрдӕс ӕма инсӕй музейей ӕхсӕн. Уӕди рӕстӕги ӕ райрӕзтмӕ агъазиау ӕвӕрӕн бахастонцӕ Байати Гаппо, Тускъати Иван, Павел Распопов, Николай Перекрестов, Лев Бирюлькин, Валентин Абрамов ӕма дзӕуӕгигъӕуккаг интеллигенций иннӕ минӕвӕрттӕ.

* * *

Цӕгат Кавкази Советон хецаудзийнадӕ ку ӕрфедар ӕй, уӕд (1918 анзи) Терки облӕстон музей иссӕй адӕмон ахуради Комиссаради бӕрни. Цанӕбӕрӕг рацудӕй ӕма 1920 анзи майи мӕйи ба музейи бундорбӕл 1920 анзи арӕзт ӕрцудӕй Цӕгат-Кавкази бӕстӕзонунади институт. Уой бӕрни иссӕй музей ӕхуӕдӕг дӕр ӕма хуннун райдӕдта «Сахар Дзӕуӕгигъӕуи Наукон-музей». Фӕстӕдӕр дӕр ӕ ном цалдӕр хатти ӕййивд ӕрцудӕй: 1928-1930 ӕнзти хундтӕй Историон музей, 1936 анзи уӕнгӕ – Цӕгат Иристони облӕстон бӕстӕзонӕн музей, 1936 анзӕй фӕстӕмӕ – Цӕгат Иристони АССР-и республикон бӕстӕзонӕн музей, 1979 анзӕй – Цӕгат Иристони историй, архитектури ӕма литератури еугонд музей, культури паддзахадон-бюджетон учреждени 2008 анзӕй «Республикӕ Цӕгат Иристон-Аланий национ музей». Фӕстаг рӕстӕгути зингӕ урухдӕр фӕцӕнцӕ ӕ бӕстихӕйттӕ: бафтудӕнцӕ ибӕл Дзӕуӕгигъӕуи рагон азгъунст (е кӕддӕр адтӕй зундгонд инсӕйӕймаг ӕноси зундгонд дзӕуӕгигъӕуккаг амалгъон Я. Ходякови, нимад цӕуй республикон ӕмвӕзади культурон бундорадӕбӕл), кӕддӕри къахидарӕс хуйӕн фабрики, аййевади Хӕдзари фӕзуӕттӕ. Абони Национ музейӕн ес еуӕндӕс филиали – куд Дзӕуӕгигъӕуи, уотӕ нӕ республики ӕндӕр рауӕнти дӕр. Уонӕн сӕ фулдӕр хуарз уавӕри ӕнцӕ, фал си кӕцидӕртӕ ба зингӕ базелуйнаг ӕнцӕ. Зӕгъӕн, нӕ национ ӕвзаг ӕма литератури Музейи бӕстихай (Терки облӕстон музей раздӕр кӕми адтӕй, е) бундоронӕй исцалцӕг кӕнуйнаг ке ӕй, уобӕл дзубандитӕ кӕд хъӕбӕр рагӕй цӕуй, уӕддӕр бӕлвурдӕй ба, куд раздӕр, уотӕ нур дӕр нецима арӕзт цӕуй. Аци фарста хаст бӕргӕ ӕрцудӕй Аланибӕл исаргъуди 1100 анзей бӕрӕг кӕнуни фӕдбӕл нисангонд мадзӕлтти номхигъдмӕ дӕр, фал нерӕнгӕ зӕрдрохсгӕнӕнӕй нецима ес. Нӕ республики арӕзтади ӕма архитектури министри хуӕдӕййевӕг Моргуати Константин ӕрӕги хецауади аппаратон ӕмбурди куд фегъосун кодта, уотемӕй си куститӕ идайгӕ дӕр нӕма ракодтонцӕ. Ӕ загъдмӕ гӕсгӕ, фӕрӕзнитӕ син нӕма радех кодтонцӕ, цӕмӕй куститӕ райдайуонцӕ, уомӕн гъӕугӕ ба кӕнуй 7,5 миллион соми…

Ци зӕгъӕн, магъа… Еунӕг е ба бӕлвурд ӕй, ӕма, еугӕр нӕ паддзахади Президент Владимир Путини сӕрмагонд Указмӕ гӕсгӕ аци анз Уӕрӕсей нимад ӕрцудӕй нӕ бӕсти адӕмти культурон бундаради Анзбӕл, уӕд, ци гӕнӕн ӕма амал ес, уомӕй ӕхсӕнади дӕр ӕма хецаудзийнади дӕр байархайун гъӕуй, нӕ адӕми ӕности цардарӕзти ӕвдесӕнтӕ, нӕ национ уодварни хӕзнатӕ ке фӕрци гъӕуайгонд цӕунцӕ абони, уӕдтӕ нӕ исонибони фӕлтӕртӕмӕ ке фӕрци рахъӕртдзӕнӕнцӕ, уонӕн сӕ арфиаг хъиамӕтӕн гъӕугӕ равгитӕ ӕма фадуӕттӕ ӕнхӕстӕй аразун.