25 майя 2022

ӔНТӔСТГИН АРХАЙДӔН РАВГИТӔ ГЪӔУАМА НӔХЕМӔ УОНЦӔ ӔНХӔСТӔЙ

18.09.2021 | 16:23

Ӕрӕги нӕ республики косӕг  балций адтӕй паддзахадон корпораци «Цӕрӕнбунатон-коммуналон хӕдзарадӕ райарӕзтӕн агъазади Фонд»-и разамонгути делегаци: Цӕстӕдарӕг совети сӕрдар Сергей Степашин, генералон директор Константин Цицин, ӕ хуӕдӕййевӕг Тамирлан Аджиев. Цӕгат Иристони Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей Меняйло, Хецауади иуонгти ӕма профилон ведомствити разамонгути хӕццӕ фембӕлдтити рӕстӕг ӕрдзубанди кодтонцӕ аци къабази берӕ аллихузон фарстати фӕдбӕл, исаразтонцӕ бадзурдтӕ ӕмгустади туххӕй.

Хузи: Сергей Меняйло ӕма Сергей Степашин.

Официалон ӕгъдауӕй нӕ абони цардиуаги ахсгиаг фарстати туххӕй

Нӕ республикон хецаудзийнади ‘рдигӕй еудадзугон цӕстдард цӕуй эпидемиологон уавӕрмӕ, уӕдта коронавируси пандемий нихмӕ мадзӕлттӕ куд ӕнхӕстгонд цӕунцӕ, ӕма ма ӕнӕмӕнгӕ ци исаразун гъӕуй, уомӕ. Цӕгат Иристони Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей МЕНЯЙЛО ӕрӕги министрадти ӕма ведомствити, уӕдта муниципалон оргӕнти разамонгути хӕццӕ ци аппаратон ӕмбурд исаразта, уоми бӕлвурд дзубанди бабӕй цудӕй еугур еци фарстати туххӕй. «Роспотребнадзор»-и разамонӕг Тибилти Алан куд фегъосун кодта, уотемӕй  фӕстаг ӕртӕ къуӕрей дӕргъи эпидемиологон уавӕр еуцӕйдӕрбӕрцӕдӕр хуӕздӕрӕрдӕмӕ раййивта:

– Зӕгъӕн, евгъуд къуӕрей дӕргъи медицинон тести фӕрци коронавирусӕй ци сӕйгитӕ рабӕрӕг кодтан, уони нимӕдзӕ, уой размӕ къуӕрей хӕццӕ рабаргӕй, рауадӕй 17 проценти минкъийдӕр. Уой хӕццӕ, сӕйгӕдӕнтти ке исӕвардтонцӕ, еци адӕми нимӕдзӕ дӕр 4,3 проценти фӕмминкъийдӕр ӕй.
Нури эпидемиологон уавӕр ӕма ковид-госпитӕлти архайди туххӕй дзоргӕй, Сергей Меняйло профилон ведомствӕ ӕма медицинон косӕндӕнтти разамонгути ӕргом раздахта, тауӕггурӕй ефтонгдзийнадӕ цӕйбӕрцӕбӕл ӕнаййеп ӕй, уомӕ.

– Еугур ковид-госпитӕлти дӕр медицинон тауӕггурӕ гъӕуама уа, гъӕугӕ цӕйбӕрцӕ кӕнуй, уомӕй фулдӕр. Уой хӕццӕ ба нӕ ӕвӕстеуатӕй аразун гъӕуй еугур мадзӕлттӕ дӕр, цӕмӕй еци гъуддаги еске дӕлбарӕ ма уӕн. Уомӕн еугур фадуӕттӕ дӕр гъӕуама исмадзал кӕнӕн. Уомӕ гӕсгӕ ба ӕнӕбунати рӕуӕнттӕн бунат ма уа. Е куд ӕй, уотӕ ку ракӕнунцӕ, гъома, тауӕггурӕ ласуни куст кӕмӕн байхӕс кӕнӕн, уӕхӕн шофертӕ, дан, нӕ бон иссерун нӕй. Етӕ фӕливд дзубандитӕ ‘нцӕ, уомӕн ӕма куд рабӕрӕг ӕй, уотемӕй медицинон тауӕггурӕ ласунӕн бӕзгӕ хуӕдтолгитӕ дӕр, уӕдта еугур гъӕугӕ гӕгъӕдитӕ дӕр кӕмӕ ес нӕ республики, уӕхӕн шоферти бӕрцӕ хъӕртуй фондзсӕдемӕ. Уомӕ гӕсгӕ ба рартасун гъӕуй,  тауӕггурӕ ласуни ӕма иннӕ кустити еугур равгитӕ ӕма гӕнӕнтӕ дӕр.

Сергей Меняйло ӕнӕнездзийнадӕ гъӕуайкӕнуйнади министрадӕ ӕма «Роспотребнадзор»-и разамонгутӕн байхӕс кодта, цӕмӕй идарддӕр дӕр лӕмбунӕг цӕстдард уа, бонӕй-бонмӕ коронавирусӕй сӕйгити нимӕдзӕ куд ӕййевгӕ цӕуй, уомӕ. Уой хӕццӕ, ӕ дзубандимӕ гӕсгӕ, республики эпидемиологон уавӕр идарддӕр дӕр хуӕздӕрӕрдӕмӕ ку ӕййева, уӕд рагагъоммӕ рагъуди кӕнун гъӕуй медицинон косӕндӕнттӕ нӕуӕгӕй пъланон кусти фӕткӕмӕ раййевунбӕл.

Уомӕй уӕлдай, республики разамонӕг профилон ведомствити бӕрнон косгутӕн байхӕс кодта, цӕмӕй гъӕугӕ ӕргом ӕздахонцӕ адӕми диспансеризаций фарстамӕ дӕр.  Куд загъта, уотемӕй, аци къуӕрей идӕрддзӕф гъӕути дӕр гъӕуама райдайуонцӕ диспансеризаций мадзӕлттӕ.

– Гъӕугӕ фадуӕттӕ исаразун гъӕуй, цӕмӕй медицинон косгутӕ фӕххӕстӕгдӕр уонцӕ адӕммӕ, – загъта Сергей Меняйло. –  Ӕма цӕмӕй поликлиникитӕ ӕма сӕйгӕдӕнтти агъазгъӕуагӕ адӕм берӕгӕйттӕй ради ма лӕууонцӕ, уой туххӕй медицинон косгутӕ гъӕуама рабалци кӕнонцӕ идӕрддзӕф гъӕутӕ ӕма ӕндӕр цӕрӕн рауӕнтӕмӕ. Республики Оперативон штаби радон ӕмбурдмӕ бацӕттӕ кӕнетӕ бӕлвурд игъосункӕнуйнаг, районтӕмӕ цӕунӕн цал бригади иснисан кодтайтӕ, циуавӕр графикмӕ гӕсгӕ косдзӕнӕнцӕ ӕма ӕндӕр уӕхӕн мадзӕлтти туххӕй. Еци  къуари сконди гъӕуама косонцӕ социалон службити минӕвӕрттӕ дӕр.


Нӕ республики эпидемиологон уавӕр ӕма коронавируси нихмӕ циуавӕр мадзӕлттӕ арӕзт цӕуй ӕма ма цӕудзӕнӕй, уой фӕдбӕл дзубанди цудӕй Хецауади ӕмбурди, ӕ Сӕрдари ихӕстӕ рӕстӕгмӕ ӕнхӕстгӕнӕг Тускъати
Тайморази
разамундӕй.

Куд си фегъосун кодтонцӕ, уотемӕй тагъд агъази республикон клиникон сӕйгӕдони архайунцӕ тауӕггурӕ дӕттуни нӕуӕг уагӕвӕрд фӕххуӕздӕр кӕнунбӕл. Ӕнӕнездзийнадӕ гъӕуайкӕнуйнади министри ихӕстӕ рӕстӕгмӕ ӕнхӕстгӕнӕг Тебиати Сослани дзубандимӕ гӕсгӕ, еци-еу рӕстӕг Республикон клиникон сӕйгӕдони ӕвӕрунцӕ тауӕггури дууӕ уӕлӕнхасӕн бӕрцуати. Ведомстви цӕттӕ кӕнунцӕ «Ростехнадзор»-ӕн гъӕугӕ гӕгъӕдитӕ. Тускъати Таймораз байхӕс кодта ӕнӕнездзийнадӕ гъӕуайкӕнуйнади министрадӕн, цӕмӕй медицинон организацити кустмӕ алкӕддӕр сӕ цӕстӕ даронцӕ, бӕрӕг сӕ кӕнонцӕ. Медицинон тауӕггурӕ ласунӕн ба гъӕуама бацӕттӕ кӕнонцӕ гъӕугӕ транспорт, цӕйбӕрцӕ гъӕуй, уойбӕрцӕй. Уой фӕдбӕл Тускъай-фурт загъта:

– Министрадӕ гъӕуама Промышленность ӕма транспорти ведомстви хӕццӕ бакосонцӕ ӕвӕстеуатӕй медицинон тауӕггурӕ ласунӕн транспорт балхӕнуни гъуддагбӕл. Гъӕуама аци фарстай  уӕн хуӕдбарӕ. Хуӕдтолгити хецӕуттӕй корӕги-коргӕй нӕ бон ахедгӕ хузи косун нӕй, е баст ӕй тӕссагдзийнади хӕццӕ. Аци рауӕн ба тӕссагдзийнадӕн гъӕуама бунат ма уа.  Уомӕй уӕлдай ма  Тускъай-фурт бафӕдзахста, цӕмӕй Республикон бауӕри ӕма венерологон диспансери хуӕцгӕнезӕй сӕйгитӕн уӕлӕнхасӕн бунӕттӕ искӕнуни фарстамӕ лӕмбунӕг ӕркӕсонцӕ. Ӕ дзубандимӕ гӕсгӕ, уоми 250 бунати ӕнцӕ агъазиау агъаз, ӕма гъӕуама цубур рӕстӕгмӕ байгон уонцӕ.


Нӕ республики Сӕргълӕууӕги ӕма Хецауади пресс-службӕй нин куд фегъосун кодтонцӕ, уотемӕй Сергей Меняйлойи фӕдзӕхстмӕ гӕсгӕ тагъд агъази Республикон клиникон сӕйгӕдони тауӕггури системӕ раййевунӕн радех кодтонцӕ 113 миллион ӕма 245, 3 мин соми.

Ӕнӕнездзийнадӕ гъӕуайкӕнуйнади министри ихӕстӕ рӕстӕгмӕ ӕнхӕстгӕнӕг Тебиати Сослани загъдмӕ гӕсгӕ тауӕггури системӕ ӕнхӕстӕй ӕййевдзӕнӕнцӕ бӕлвурд домӕнтӕмӕ гӕсгӕ ӕма аци анзи октябри кӕронмӕ гъӕуама исцӕттӕ уа.

Куститӕмӕ цӕстдард уодзӕнӕй «Ростехнадзор» ӕма «Росздравнадзор» -и  экспертти ‘рдигӕй. Республикон клиникон сӕйгӕдони ма ку зӕгъӕн, тауӕггурӕн ӕвӕрунцӕ дууӕ уӕлӕнхасӕн бӕрцуати.