Цӕгат Иристони культури министри ихӕстӕ рӕстӕгмӕ ӕнхӕстгӕнӕг КЪУБАЛТИ Эльбрус куд фегъосун кодта, уотемӕй иннӕ анз национ проект «Культурӕ»-мӕ гӕсгӕ нӕ республики ӕртӕ гъӕууон районеми исараздзӕнӕнцӕ нуриккон культурон-хеерхӕфсӕн косӕндӕнттӕ ӕма Культурон ирӕзти центр.

– Уомӕй уӕлдай, культури гъӕууон косӕндӕнттӕ исцалцӕг кӕнунмӕ гъавӕн. Адӕми исфӕлдистадон гӕнӕнтӕ цӕмӕй ирӕзонцӕ, ӕма культури къабазӕ нимӕцон равналӕнтӕй пайда кӕна, уонӕн агъаз кӕндзӕнӕнцӕ. Мӕздӕги райони Мӕлгъӕвӕги ӕма Рахесфарси райони Зӕронд Бӕтӕхъойгъӕуи нуриккон культурон-ерхӕфсӕн косӕндӕнтти арӕзтадӕ, Алагири райони Црауи, Мӕздӕги райони Киевскойи гъӕуи, Горӕтгӕрон райони Сунжи культурон косӕндӕнтти бундорон цалцӕг нимад уодзӕнӕнцӕ еугуремӕй ахсгиагдӕр гъуддӕгутӕбӕл, – загъта Къубали-фурт.

Амунд проектмӕ гӕсгӕ иннӕ анз Дигорай аразун райдайдзӕнӕнцӕ Культурон ирӕзти центр. Уомӕй уӕлдай, Октябригъӕуи ӕма Ӕрхонки сувӕллӕнтти аййевӕдти скъолатӕ цалцӕггонд ӕрцӕудзӕнӕнцӕ. Уомӕй уӕлдай ма аййевӕдти дууӕ скъолайемӕн радех кӕндзӕнӕнцӕ фӕрӕзнитӕ материалон-техникон бундор фӕффедар кӕнунӕн ӕма гъӕугӕ ефтонггӕрзтӕ балхӕнунӕн. Зинвадуат гъӕути цӕрӕг адӕмӕн концерттӕ ӕвдесун ӕма син библиотекон лӕггӕдтӕ кӕнуни фадуат ке ефтонггӕрзти фӕрци уодзӕнӕй, Культури министради зӕрди ес ӕртӕ уӕхӕн автоклуби, гъома, цӕугӕ берӕкъабазгин культурон центртӕ балхӕнун.

Уомӕй уӕлдай, культури ӕртӕ хуӕздӕр гъӕууон косӕндонемӕн ӕма культури гъӕууон косӕндӕнтти цуппар  хуӕздӕр косӕгемӕн агъаз кӕнуни фӕдбӕл мадзӕлттӕ идарддӕр ӕнхӕстгонд цӕудзӕнӕнцӕ. Иннӕ анз республики культури косӕндӕнтти 200 косӕгемӕй фулдӕремӕн уодзӕнӕй бӕсти раззагдӕр исфӕлдистадон уӕлдӕр скъолати бундорбӕл сӕ дӕсниади къӕпхӕн фӕууӕлдӕр кӕнуни фадуат.