Национ проект «Ахурадӕ»-мӕ хауӕг федералон проект «Нуриккон скъола»-мӕ гӕсгӕ ке аразунцӕ, Дигори райони Дур-Дури коррекцион скъола-интернат «Ӕууӕнкӕ»-йи  нӕуӕг ӕрмадзти ӕнхӕстгонд ӕрцудӕнцӕ цалцӕггӕнӕн куститӕ.

Специалисттӕ ахургӕнӕндонӕмӕ ци нуриккон косӕнгӕрзтӕ ӕрбафтудӕнцӕ, уони си ӕвӕрунцӕ. Федералон бюджет ӕрмадзтӕ исефтонг кӕнунӕн радех кодта 7,3 миллион соми.

Скъола-интернат ӕрмадзтӕн радех кодта авд косӕнуати. Дзӕуӕгигъӕуи электроники колледжи студенттӕ ӕма педагогтӕ косӕнуӕтти ефтонггади дизайн-проектбӕл бакустонцӕ.

Аци анз сентябрӕй фӕстӕмӕ скъола-интернати искосдзӕнӕнцӕ къахидарӕс хуйӕн, хуӕруйнаггӕнӕн, агропромышленнон, арӕзтадон, кустадон-аййевгӕнӕн, массажгӕнӕн, робототехники ӕрмадзтӕ, уӕдта къарӕесӕн ӕма анимацион студитӕ.

– Педагогтӕ коррекцион ахургӕнӕндӕнтти ке ‘нхӕст кӕнунцӕ, еци профориентацион куст агъаз кӕнуй сувӕллӕнтти социалон адаптацийӕн. Нӕуӕг ӕрмадзти фӕрци сувӕллӕнттӕн ахурадӕ райсуни фӕсте уодзӕнӕй дӕсниадӕ равзаруни фадуат. Сӕ идарддӕри цардӕн гъӕугӕ аллихузон дӕсниӕдти хӕццӕ цӕмӕй базонгӕ уонцӕ, аци проект уомӕн агъаз кӕнуй, – загъта Цӕгат Иристони ахурадӕ ӕма науки министри ихӕстӕ рӕстӕгмӕ ӕнхӕстгӕнӕг Алибегти Эллӕ.

Ӕрмадзти ка косдзӕнӕй, еци специалисттӕ онлайн уагӕй дӕсниадӕ уӕлдӕргӕнӕн къурситӕ каст фӕцӕнцӕ, сентябри ба аци адӕмӕн ахурадӕ комкоммӕ уагӕй амондзӕнӕнцӕ.

Феппайуйнаг: сӕйраг адаптацигонд еумӕйаг программитӕмӕ гӕсгӕ ахурадон куст ка ‘нхӕст кӕнуй, фӕлварӕ ӕма фарӕ национ проект «Ахурадӕ»-мӕ гӕсгӕ еци дууӕ республикон косӕндони – гъосӕй ӕма цӕстӕй рӕвдзӕ ка нӕй, еци сувӕллӕнттӕн Дзӕуӕгигъӕуи комплексон реабилитацион-ахурадон центри ӕма Мӕздӕги сӕрмагонд (коррекцион) скъола-интернати – материалон-техникон бундор иснӕуӕг кодтонцӕ.