Зундгонд куд æй, уотемæй Цæгат Иристони науки æскъуæлхт архайæг, экономикон наукити доктор, профессор, Республикæ Цæгат Иристон-Аланий Парламенти депутат Тохъайти Нохбæл æрæги исæнхæст æй цуппаринсæй анзи. Æма еци агъазиау цауи фæдбæл юбиляри хæццæ фембалдæй Цæгат Иристони Сæргълæууæг Битарти Вячеслав.

Тохъайи-фуртæн зæрдиагæй райарфæ кæнгæй, республики разамонæг ахургонди исхуарзæнхæ кодта Республикæ Цæгат Иристон-Аланий бæрзонддæр паддзахадон хуæрзеуæг «Иристони Намус»-и орденæй.

– Де ‘хсæнадон æма педагогон архайд рагæй зундгонд æнцæ, ирæзгæ фæлтæри хæццæ ци гъомбæладон куст кæнис, е дæр устур арфи аккаг æй, – загъта æ арфи радзубандий Битарnи Вячеслав. – Дæ гъомбæлкæнуйнæгтæй беретæ иссæнцæ зундгонд экономисттæ æма ахургæндтæ, раззагдæр кустуæтти разамонгутæ. Де ‘хсæнадон архайд никки фæахедгæдæр æй, республики Парламенти депутат ку исдæ, уæдæй фæстæмæ. Уони туххæй дин арфæ кæнун. Æнæнездзийнадæ, амонд æма фæрнугадæй хайгин уо, – æ арфи дзубандий фæббæрæг кодта Битарти Вячеслав.

и Нох æ дзуаппон дзубандий куд загъта, уотемæй, æ хъауритæ куд амонунцæ, уотæ идарддæр дæр косдзæнæй республики хуарзæн, æ идарддæри социалон-экономикон æма культурон райрæзти сæрбæлтау.

Зæгъун гъæуй, юбиляри цард æнæгъæнæй дæр экономикон науки хæццæ баст ке æй, уой. Тохъайи-фурт, Мæскуй М.Ломоносови паддзахадон университети рауагъдон, агъазиау фескъуæлхтæй æ наукон архайдæй, бæрзонд аргъгонд ин цæуй айдагъ Иристони æма Уæрæсей нæ, фал ма сауæнгæ фæсарæнти дæр, зæгъæн æвзурст æрцудæй Нью-Йорки наукити академий æцæг иуонгæй. 1988 анзæй фæстæмæ косуй Цæгат Иристони Хетæгкати Къостай номбæл паддзахадон университети, нуртæккæ æй, уоми финанстæ æма кредити кафедри сæргълæууæг.