02 декабря 2022

РÆСТУОДÆЙ АРФИАГ ФÆЛЛОЙНÆ КА КÆНУЙ, КАДИ АККАГ ДÆР Е ÆЙ!..

18.06.2021 | 21:42

Уæрæсей Бони кадæн Республикæ Цæгат Иристон-Аланий Сæргълæууæги ихæстæ рæстæгмæ æнхæстгæнæг Сергей Меняйло зæрдиаг арфити хæццæ кадгин хуæрзеугутæй исхуарзæнхæ кодта, айдагъ нæ республики сæрбæлтау нæ, фал, æнæгъæнæ Уæрæсей хуæрзæбонæн дæр æ уоди кæдзос фæллойни хай ка хæссуй, еци адæймæгути.

Æ арфи ба загъта: «Алли адæймаг дæр гъæуама уа сæрустур, уæхæн цитгин бæсти гражданин ке ’й, еумæйаг уæрæсейаг адæмихатт ке ан, уомæй. Берæ æнзти дæргъи ци намусгин фæллойнæ кæнетæ нæ рохс федæни фæрнугадæн, е иронх нæй. Сумах кæнетæ нæ агъазиау паддзахадæ тухгиндæр, федардæр æма рæсугъддæр уæ хуарз гъуддæгутæй, æма уин мæ зæрдæ зæгъуй, фиццагидæр, æнæнездзийнадæ, алкæддæр уæ къохи æнтæстдзийнæдтæ æфтуйæд уæ кусти бæрæггæнæнтæй. Амондгун уæд нæ бæстæ. Нур ба мин барæ раттетæ уæ намусгин фæллойнæн аргъ искæнунæн».

Паддзахадон бæрзонд хуæрзеугутæ лæвæрд æрцудæй цуппæрдæс адæймагемæн. Уонæй еу – газет «Дигори хабæрттæ»-йи сæйраг редактор Къорнати Тамерлан (къари – галеуæрдигæй æртиккаг). Исаккаг ин кодтонцæ Республикæ Цæгат Иристон-Аланий æскъуæлхт журналисти кадгин ном. Зæрдиагæй ин арфæ кæнæн еци ахсгиаг æма æхцæуæн цауи фæдбæл.

Куд редакцион коллективи разамонæг, уотæ æновудæй архайуй, цæмæй сæ куст исфæлдистадон æгъдауæй уа æнтæстгин, цæмæй райони газет дзиллæн уа зæрдæмæдзæугæ æма уарзон. Æма дин, Тамерлан, идарддæр дæр дæ арфиаг кусти де ‘скъуæлхтдзийнæдтæ фулдæрæй-фулдæр кæнæнтæ!..