Аци анз Дигори райони скъолати фæндараст загътонцæ дууадæс æма цуппаринсæй рауагъдонемæн. Æма сæ еугуремæн дæр еци хабар цийнаг куд нæ уодзæнæй, уæлдай æхцæуæн ба е æй, æма сæ уодуæлдай фæллойни фæрци, зонундзийнæдтæмæ разæнгардæй турнундзийнади уæлдай æнтæстгиндæрæй ка фескъуæлхтæй, уонæн – рауагъдонтæй æхсæз æма инсæйемæн аккаггонд æрцудæнцæ сугъзæрийнæ æма æвзестæ майдантæ. Райони ахуради къабази анзфинсти уæхæн бæрзонд бæрæггæнæнтæ нуриуæнгæ нæма адтæй.

Ахури гъуддаги уæлдай æнтæстгиндæрæй ка фескъуæлхтæй, еци рауагъдонти кадæн æрæги Дигори райони администраций азгъунсти арæзт æрцудæй сæрмагонд цитгингæнæн мадзал.  Уоми син зæрдиагæй райарфæ кодта райони администраций сæргълæууæги ихæстæ æнхæстгæнæг Хохойти Валери. Æ радзубандий куд баханхæ кодта, уотемæй аци искурдиадæгин фæсевæд æнцæ айдагъ сæ ниййергути æма ахургæнгути нæ, фал æнæгъæнæ райони сæрустурдзийнадæ æма нифс.

– Æма  еугурей дæр зæрдиагæй фæндуй, цæмæй æнтæстгинæй куд исахур кæнайтæ уæ равзурст дæснийæдтæбæл, уæ размæ ци нисантæ æвæрд цæуй, уонæмæ федар къахдзæфтæй, гъæддухæй куд цæуайтæ, – загъта е.

Уой хæццæ ба ма син зæрдæ байвардта уомæй дæр, æма багъæуаги алкæддæр сæ бон ке æй райони хецауади агъазмæ æнгъæлмæ кæсун.

Сугъзæрийнæ майдантæ райстонцæ:  Есети Лианæ, Тогузати Алан, Калоти Евæ (сахар Дигорай 1-аг астæуккаг скъола), Мурити Данæ, Цалити Янæ, Цæголти Анастасия, Габолати Дарья (сахар Дигорай 2-аг астæуккаг скъола), Гергити Виктория, Хæтæгти Миленæ, Цæрæкти Зæлинæ (Хъармани гъæуи скъола), Томайти Самирæ, Габети Арнелæ (станицæ Николаевскаяйи скъола).  Æвзестæ майдантæ райстонцæ: Калоти Сарæ, Хадзити Ладæ, Цæрикъати Аринæ, Æгъузарти Бэллæ (сахар Дигорай 1-аг астæуккаг скъола), Хадати Александр, Хъарданти Аминæ, Гокъоти Аланæ, Цъебойти Аминæ, Годизти Алинæ, Дзарагасти Петр, Сæбанти Заремæ (сахар Дигорай 2-аг астæуккаг скъола), Бекъойти Аннæ, Магати Анжеликæ, Зурапти Сæрмæт (Хъармани гъæуи астæуккаг скъола).

Разæнгардгæнæг арфитæ рауагъдонтæн загъта  Дигори райони  ахуради хайади хецау Цæголти Натэлæ. Куд баханхæ кодта, уотемæй Дигори район скъолати педагогон коллективтæ ахурдзаутæн дæттунцæ хуæрзгъæдæ ахурадæ, кæций фæрци фæсевæди бон фæууй фадуат идарддæр ахур кæнунмæ бацæунæн нæ бæсти уæлдæр ахургæнæндæнттæмæ.

Ниййергутæ æма рауагъдонтæ зæрдиагæй райарфæ кодтонцæ сæ ахургæнгутæн, еуæндæс анзей дæргъи сæ фарсмæ ке адтæнцæ,  сæ усхъæ сæмæ ке дардтонцæ багъæуаги, æновуд сæбæл ке адтæнцæ æма харакеттæй син ке хай кодтонцæ сæ берæ æма федар зонундзийнæдтæй. Уæлдай рæсугъд арфитæ ба ракодтонцæ Хохойти Валерийæн, алæмæти зæрдæмæдзæугæ бæрæгбон син ке исаразта, уой туххæй.

КЪОРНАТИ Тамерлан