Хузæгæнæги дæсниадæ æнгон баст æй æрдзæ æма адæймаги æнкъарæнти хæццæ. Хузæгæнгутæ арфдæр уинунцæ аллибони цард. Етæ иннæ адæмæн сæ аййевади фæрци æвдесунцæ дуйней рæсугъддзийнадæ. Иристони ес искурдиадæгин фæсевæд, уонæй еу – Цæгат Иристони хузæгæнгути Цæдеси иуонг Сæбанти Ирбег.

Æригон хузæгæнæгæн аййевадæ иссæй æ царди Бонвæрнон, æма ин абони дæр амонуй над. Дзæуæгигъæуи Дзанайти Азанбеги номбæл аййевадон училищей дизайнери дæсниади хайади райдæдта Ирбеги над. Уæдта рандæй æфсадмæ, уой фæсте æ ахур райдарддæр кодта ЦИПУ-и аййевадон факультети. Æригон хузæгæнæг фæййархайуй айдагъ нæ республики равдистити нæ, фал нæ синхаг республикити дæр æма Уæрæсей æндæр регионти. Уой хæццæ ма ин адтæй сæрмагонд равдиститæ дæр. Ирбег куд загъта, уотемæй адæймаг гъæуама æхебæл аллибон дæр коса, цæмæй æ дæсниади уа хуæздæрти хуæздæр. Æхуæдæг мольберти уæлгъос изæригон, кæдзосзæрди æнкъарæнти хæццæ балæууй, цæмæй хузæгæнæги гъудитæ маци хъор кæна.

Алли дæсниади дæр æригон фæсевæдæн гъæуама уа дæнцæн – ахургæнæг. Е фæууинуй æ кæстæри искурдиадæ æма ‘й исразæнгард кæнуй е ‘рдзон лæварбæл косунæн. Ирбегæн дæр ес уæхæн хестæртæ. Се ‘хсæн – Советон Цæдеси æма Уæрæсей æскъуæлхт хузæгæнæг Бедойти Шалва, Уæрæсей адæмон хузæгæнæг Челæхсати Магрез æма иннетæ. Æхуæдæг дæр кодта ахургæнæги куст Алайнаг гимназий, уоми кæстæртæн амудта исфæлдистадон сосæгдзийнæдтæ.

Зæрдхæлар хузæгæнæгæн сæйрагдæр æй æ куст æма æ дæсниадæ уарзун, æма Ирбег дæр уæхæн цæстæй кæсуй хузæкæнуйнадæмæ. Æ гъудимæ гæсгæ, адæймаг, фиццагидæр, гъæуама гъуди кæна æ уодбæл, æма æ зæрдæмæ ци куст цæуй, уой кæна. Ирбегæн æнтæсуй æ равзурст надбæл нифсгунæй цæун, æма ‘й æ еци менеуæг никки хъæбæрдæр разæнгард кæнуй аййевади бæрзæндтæмæ.

ГÆДЖИТИ Агундæ