Хестæр фæлтæртæй ма беретæ хуарз гъуди кæнунцæ, доги поэттæ æма сæ фæлдесгонд уадзимистæ цæйбæрцæбæл бæрзонд цæстиварди адтæнцæ нæ уæди æхсæнади медæгæ. Нури рæстæгути уой фæдбæл нæ бон æй айдагъдæр уотæ зæгъун: «Бæргæ, бæргæ…»

Цæмæй бабæй нæмæ поэзи ахсгиаг бунат æрахæсса нæ абони цардарæзти дæр, уобæл нæ исфæлдистадон интеллигенций минæвæрттæй беретæ архайунцæ, аразунцæ аллихузон мадзæлттæ.

Еци мадзæлттæй еу исуодзæнæй, 27 æма 29 майи Дзæуæгигъæуи Евгений Вахтагови Хæдзарæ-музейи 19 сахаттебæл ци музыкалон-поэтикон изæр «К свету! Рохсмæ!» арæзт æрцæудзæнæй, е дæр. Уоми райгъусдзæнæнцæ дигорон æвзагбæл финст поэтти ’мдзæвгитæ æма уонæбæл арæзт зартæ. Мадзали архайдзæнæнцæ Цæгат Иристони культури æскъуæлхт косæг, зундгонд артисткæ Цæрикъати Римæ, Цæгат Иристони культури æскъуæлхт косæг, композитор Дзоблати Анатолий, Цæгат Иристони æскъуæлхт артист Тогойти Алан, студенттæ Елойти Дианæ æма Тамати Юрий. Режиссер – Парастати Владимир.

Мадзалмæ бацæунæн билеттæ балхæнæн ес къасси 11 сахаттемæй 18 сахаттей уæнгæ, кенæ ба онлайн банки фæрци (геуæргибони къассæ нæ косуй).

Аци мадзали ном æма уой медесмæ гæсгæ зæрдæбæл æрбалæууй нæ номдзуд поэт Малити Геуæрги 1919 анзи ке ниффинста, еци æмдзæвгæ «Федог».

Рохсмæ, фæсевæд, тундзетæ,

Рохсмæ цæуетæ æмгом,

Нифс, лæгдзийнадæ уарзетæ,

Скæнтæ муггагмæ стур ном.

Арвмæ мæсуг амайетæ,

Хормæ скæнетæ фæндаг.

Гъæйт, зæрдиуагæй уайетæ,

Догъи ма уотæ фæстаг!

Тари цæфсæд сæребарæ,

Мегъи сорæд æ тунтæй,

Цард мабал уæд гъезæмарæ,

Зæнхæ райзол уæд рунтæй.

Рохсмæ, фæсевæд, тундзетæ,

Рохсмæ цæуетæ æмгом,

Нифс, лæгдзийнадæ уарзетæ,

Скæнтæ муггагмæ стур ном.

Æма, нæ дзиллæ, байгъосæн нæ номдзуд Малити Геуæргий фæдздзурдмæ «Рохсмæ, фæсевæд, тундзетæ!..» æма дзиллонæй бабæрæг кæнæн, мæнæ ци музыкалон-поэтикон изæри кой кæнæн, уой – уомæй фæййагъаз уодзинан нæ национ поэзий цардгъондзийнади райрæзтæн.