Уæрæсей Федераций Президент Владимир Путин сувæллæнттæ гъæуай кæнуни Æхсæндуйнеуон бони Кремли Екатеринаг зали паддзахадон бæрзонд хуæрзеугутæ – орден «Ниййерæги кадæ» æма кадгин ном «Мадæ-бæгъатæр» – исаккаг кодта нæ бæсти фараст берæсувæллонгин бийнонтæн. Уони ’хсæн адтæнцæ не ’мзæнхонтæ, Рæмони-фурти поселокки цæргутæ Кæркусти  Симæ æма æ уодæнкъай Барис, кæцитæ цардбæллонæй гъомбæл кæнунцæ финддæс сувæллони.

Кремли арæзт цитгин мадзали радзубанди кæнгæй, Кæркусти Симæ зæрдиагæй райарфæ кодта нæ паддзахади разамонæгæн, берæсувæллонгин бийнонти цардиуаги уавæртæ цæмæй зæрдæмæдзæугæ  уонцæ, уомæ устур æргом ке æздахуй, уой туххæй. Æ загъдмæ гæсгæ, уæхæн хуæрзауодундзийнадæй æнхæстæй хайгин æнцæ сæ бийнонтæ дæр.

Кæркусти бийнонти ’хсæн ци финддæс сувæллони гъомбæл кæнунцæ, уонæн сæ хестæртæ 22-анздзуд фазæнттæ Давид æма Динæ ниййергутæн агъазгъон æнцæ, кæстæр сабийбæл ба цæуй æртæ анзи.

Уомæн еу æвдесæн: 2017 анзи нæ республики Хецауадæ Кæркусти бийнонтæн равардта, 100 квадратон метри кæми ес, уæхæн æртæуатон фатер .

*  *  *

Идарддæр ба уæ зонгæ кæнæн, абони сувæллонгин бийнонтæбæл паддзахади ’рдигæй ци ауодундзийнадæ ес, уой туххæй Уæрæсей социалон фонди цæгатиристойнаг хайади пресс-служби игъосункæнуйнаги хæццæ.

Амунд хайадæ агъаз кæнуй дæсгай мин сувæллонгин бийнонтæн. Паддзахадæй агъаз райсуни барæ кæмæ ес, уæхæн бийнонти нимæдзæ алли анз фулдæр кæнуй, гъæугæ феддонтæн гæгъæдитæ аразуни гъуддаг ба хумæтæгæй-хумæтæгдæр кæнунцæ. Сабийи фæззиндмæ æнгъæлмæ кæсуни рæстæг, уæдта æ райгурди фæсте ниййергутæн федаргонд æрцудæнцæ еурæстæгон æма аллимæйон пособитæ.

Æнгъæлдзаудзийнади рæстæг дæр федæни ниййергутæмæ ес паддзахадæй æхцай агъаз райсуни барæ. Аци рæстæг ниййергутæн байагъаз кæнунæн Социалон фонди хайадæ æнгъæлдзаудзийнадæ æма райгурци фæдбæл пособи исæвæруй. Пособий бæрцæ аразгæ æй мизди бæрцæй. Фонд æнæкосгæ силгоймæгтæн пособи исæвæруй федаргонд бæрцæй.

Уомæй уæлдай, федæни ниййергутæмæ ес еумæйаг пособи райсуни барæ дæр. Бийнонти æфтуйæгтæ æма фæккæсуйнагдзийнади къæпхæн нимайгæй, еумæйаг пособи исæвæрунцæ æнгъæлдзаудзийнади дууадæс къуæремæй раздæр номхигъдтæмæ бахæссуни рæстæг. Аци анз феддони бæрцæ  мæйæмæ æй 9289-18579 соми. Амунд пособи есунцæ 2200 æнгъæлдзау силгоймаги.

АХСГИАГ ГЪУДИ

Владимир ПУТИН:

– Бийнонти бундор, сувæллæнтти багъæуай кæнун, хестæрти, ниййергути фæллойнæн кадæ кæнун – етæ ’нцæ не ’хсæнадæ нин ка æргом кæнуй æма еу фæлтæрæй иннемæ лæвæрд ка цæуй, размæ цæунмæ нин ка агъаз кæнуй, уæхæн гъуддæгутæ.

Сабийи райгурди фæсте Социалон фонди хайадæ бийнонтæн, се ’фтуйæгти бæрцæ нæ нимайгæй, исæвæруй 28450 сомей бæрцæ еурæстæгон пособи. Аци пособи райсуни барæ ес ниййергутæй еуемæ, кенæдта – евгедгæнæгмæ (опекун).  Еци-еу рæстæг кæд цалдæр сувæллони фæззиндтæнцæ, уæд син алкæмæн дæр пособи федунцæ. Аци анз 1,4 мин бийнонтæ сувæллони райгурди рæстæг фæрæзнитæ райстонцæ.

Сувæллонбæл цалинмæ 17 анзи нæ исæнхæст уа, уæдмæ ниййергутæмæ ес сувæллонæн æмбæлгæ еумæйаг пособийæн гæгъæдитæ исаразуни барæ. 107 мин цæгатиристойнаг сувæллонемæй фулдæри ниййергутæ аци пособи есунцæ. Аллимæйон æхцайæй агъази бæрцæ ’й 8267-16534 соми. Бийнонти æфтуйæгтæ æма син сæ есбон нимайгæй, пособи исæвæрунцæ.

Цалинмæ ниййерæг 1,5 анземæй кæстæр сабиймæ зелуни фæдбæл отспуски æй, уæдмæ дæр бийнонтæн аллимæйон пособи федун æнгъезуй. Косунгъон ниййергутæн аци пособий бæрцæ ’й мæйæмæ 10669 сомемæй 83021 сомей уæнгæ. Пособий бæрцæ ’й раздæри дууæ анземæн рæстæмбес мизди 40 проценти. Ниййерæг æнцойнæ-уагъдæй кустмæ æмгъудæй раздæр кæд рацудæй, уæддæр ин пособи федун æнгъезуй. Æнæкосæг ниййергутæн пособий бæрцæ ’й 10669 соми.

Аци анзи 1 июнæй фæстæмæ архайун райдæдта агъази нæуæг хузæ – 18 анземæй кæстæр тæккæ минкъийдæр дууæ сувæллоней хæццæ (сувæллæнттæ кæд бонæй ахур кæнунцæ, уæдта сæбæл цалинмæ 23 анзи нæ исæнхæст уа, уæдмæ) косæг ниййергутæн бийнонти аллианзон феддон. Бийнонтæн бафедунцæ раздæри анзи туххæй æфтуйагæй физикон еуæгти æфтуйагæн хигъдон хъалони бæрци æма амунд æфтуйаги ’хсæн нимад 6 процентей бæрцæ игъаугидзийнадæ.

Нур берæ æнзти дæргъи ниййерæги капитал нимад æй бийнонтæн агъази хецæн хузæбæл. Программæ архайун ку райдæдта, уæдæй фæстæмæ 90 мин цæгатиристойнаг бийнонти æнцæ сертификатти хецæуттæ.

Аци анз фиццаг сувæллонæн (2020 анзи 1 январæй фæстæмæ ка райгурдæй, уæхæнæн) ниййерæги капитали бæрцæ ’й 728921 соми; дуккаг сувæллонæн (сертификати барæ кæд 2020 анзæй фæстæмæ исæвзурдæй, уæд) – 963243 соми. Дуккаг сувæллони райгурди рæстæг (фиццаг сувæллонæн ниййерæги капитал кæд райстонцæ, уæд) бафтауйнаг æхцай бæрцæ уодзæнæй 234321 соми.

Сертификати фæрæзнитæ бахарз кæнæн ес цæрæнуатон уавæртæ фæххуæздæр кæнунбæл, æмбурдгæнæн пенсибæл, инвалид-сувæллæнттæ æхсæнадæбæл цæмæй исахур уонцæ, уобæл, уæдта æртæ анзей уæнгæ 16534 сомей бæрцæ аллимæйон феддонбæл. 10 мин сомемæй фулдæр ка нæй, ниййерæги капиталæй байзайæг еци хай райсæн ес еурæстæгон феддонæй.

Сувæллонгин бийнонтæн агъази еугур мадзæлтти туххæй бæлвурддæр хабæрттæ базонæн ес Уæрæсей Социалон фонди сайти мæнæ уæхæн сæрмагонд хайади: https://sfr.gov.ru/grazhdanam/semyam s detmi/.

Фарстатæ кæд байзадæнцæ, уæд уæмæ ес Уæрæсей Социалон фонди еумæйаг контакт-центрмæ 8-800-100-00-01 телефонæй лæвар бадзоруни барæ (Социалон фонди цæгатиристойнаг хайади линий кусти фæткæ: авдисæрæй цуппæрæнмæ – 9.00 сахаттемæй 18.00 сахаттей уæнгæ, майрæнбони ба – 9.00 сахаттемæй 16 сахатти æма 45 минуттей уæнгæ).