Цæгат Иристони Сæргълæууæг Сергей Меняйло нæ республики дзиллæн зæрдиагæй арфæ кæнуй Уæрæсей Бони фæдбæл. Æ арфи нистауæни уотæ баханхæ кодта:

– Аци бон нин ес никкидæр ма еу рæуагæ, цæмæй æримисæн нæ цитгин бæсти гъæздуг истори, æ намусгин евгъуд рæстæг æма дуйней  цивилизацимæ ци æнæсеккаг агъазиау æвæрæнтæ бахаста, уой. Уæрæсей Бон – е уотид хумæтæг къæлиндарон бон нæй. Е æй сæребарæдзийнади, еудзийнади æма нæ Райгурæн бæстæй сæрустурдзийнади бæрæгбон. Е æй нæ размæцуди æма хуæдбарæдзийнадæмæ тундзундзийнади нисанеуæг. Æма, гъай-гъай, нæ берæнацион адæмæн кадæ кæнун, кæцитæ сæ уодуæлдай фæллойнæй, сæ искурдиадæй æма лæгдзийнади фæрци аразтонцæ, гъæуай кодтонцæ æма кæнунцæ нæ Фидибæстæ.  Нæ фидтæлти устур гъуддæгутæй райдайæ æма нуриккон зонадон, культурон æма техникон æнтæстдзийнæдти уæнгæ – мах сæрустур ан, нæ цитгин бæсти æнæфæххецæнгæнгæ хай ке ан, уомæй, æма лæдæрæн нæ бæрнондзийнадæ æ нури æма æ исонибони фæдбæл.

Лæдæрæн æй, нæ хъаурæ нæ еудзийнади ке æй, уой. Истори еу æма дууæ хатти нæ исбæрæг кодта: айдагъдæр кæрæдзей лæдæргæй, кæрæдзебæл федар баст уогæй, Уæрæсей адæм ке уодзæнæнцæ æнæбасæтгæ.

Абони нæ тугъдонтæ раззаг ханхæбæл лæугæй, æвдесунцæ еудзийнадæ, гъæуай кæнунцæ нæ бæсти хуæдбарæдзийнадæ æма  æдасдзийнадæ, фæскъилдун ка ’й, еци дзиллæ ба агъаз кæнунцæ фронтæн. Федарæй ми æруагæс кæнуй е, æма еумæйагæй цийфæнди зиндзийнæдтæбæл дæр ке фæууæлахез уодзинан.

Хъазар æмбæлттæ!

Мæ зæрдæ уин зæгъуй уæхецæн дæр æма уæ бийнонтæн дæр федар æнæнездзийнадæ, сабур æма фæрнæйдзаг цард, берæ хуарздзийнæдтæ æма  устур амонд. Уадзæ æма нин нæ Уæрæсе æма Иристонæй сæрустурдзийнадæ дæттæд  фулдæр хъауритæ, цæмæй никки агъазиаудæр æнтæстдзийнæдтæ нæ къохи æфтуйа. Уæрæсей Бони хуарзæнхæ уæ уæд!..»