Терроризм ӕма экстремизми фӕззиндтитӕн нихкъуӕрд дӕттуни нисани хӕццӕ нӕ республики берӕ ахедгӕ мадзӕлттӕ арӕзт цӕуй.

 Аци анз Федералон Ӕдасдзийнади служби цӕгатиристойнаг управлени ӕма нӕ республики Сӕргълӕууӕги размӕ профилон къамис, Цӕгат Иристон-Аланий мухур ӕма дзиллон коммуникацити Комитети хӕццӕ еумӕ иснисан кодтонцӕ сӕрмагонд преми «Кӕдзос арв». Ӕма си хуарзӕнхгин кӕндзӕнӕнцӕ терроризм ӕма экстремизми зианхӕссӕг фӕззиндтити туххӕй, нӕ республики дзиллон хабархӕссӕг фӕрӕзнити косгутӕй радиой, телеуинунади, интернет сайтти ӕма газетти хуӕздӕр проектти ӕма ӕрмӕгути авторти.

Преми райсунбӕл конкурси аци анз се ‘сфӕлдистадон куститӕ балӕвардтонцӕ Национ телеуинунадӕ «Осетия-Иристон»-и, республикон газет «Северная Осетия»-йи ӕма интернет сайт «Цӕгат Кавказ-Медиа»-йи уацхӕсгутӕ. Уонӕй премий къамис хуӕздӕрбӕл банимадта Национ телеуинунадӕ «Осетия-Иристон»-и уацхӕссӕг Золойти Фатими кинонивӕ «Прививка от терроризма».

Ӕрӕги, нӕ республики мухур ӕма дзиллон коммуникацити Комитети сӕрдар Фидарати Юрий кадгин уавӕри конкурси диплом, номбӕлдаргӕ нисан ӕма ӕхцай преми равардта Золойти Фатимӕн.

– Аци конкурс фиццаг хатт аразӕн. Ӕма нӕ фӕндуй, цӕмӕй нӕ республики еугур дзиллон хабархӕссӕг фӕрӕзнити косгутӕ сӕ аккаг ӕвӕрӕн хӕссонцӕ терроризм ӕма экстремизми фӕззиндтитӕн, нӕ республики цӕргути никки лӕмбунӕгдӕрӕй зонгӕ кӕнонцӕ ӕ зианхӕссӕг фӕстеугути хӕццӕ, – загъта Фидарати Юрий.

Нӕ уацхӕссӕг