ХЪАЙТУХЪТИ Эльвирæ æма ТУАТИ Стэллæ.

Программæ «Гъæууон дохтир» («Земский доктор») æй, медицинон косгутæ кæми нæ фагæ кæнуй, еци гъæууон цæрæнуæттæмæ медицинон специалисттæ æрбаздахуни туххæй паддзахадон хъæппæрес. Дохтир, фельдшер, акушер æма медицинон хуæрæн паддзахадæ дæттуй еурæстæгон компенсацион феддон – 5 миллион соми, медицинон кустуати хæццæ фондз анзи си бакосуни туххæй бадзурд ку бафинса, уæд.

Дигори райони еуæй-еу медицинон специалисттæ еудадзуг нæ фæффагæ кæнуй, æма ин аци программæ хъæбæр фæййагъаз æй.

Райони поликлиники программæ «Гъæууон дохтир»-мæ гæсгæ нур дууæ анзи кардиологæй косуй Туати Стэллæ. Æхуæдæг Кирови районæй æй, 2014 анзи сугъзæрийнæ майдани хæццæ каст фæцæй скъола, 2020 анзи  сурх дипломи хæццæ – Цæгат Иристони Медицинон академи. Ординатури фæсте фæллойни надбæл æрлуæдтæй Дзæуæгигъæуи дуккаг поликлиники кардиологæй, 2024 анзи июлæй фæстæмæ ба архайуй программи. Фиццаг бæнттæй фæстæмæ æхе бауарзун кодта æ бæрзонд профессион зонундзийнæдтæ æма сæйгитæмæ зæрдиаг рахастдзийнæдти фæрци. Аргъ  ин кæнуй медицинон кустуати разамунд дæр. Æ зæрдибун архайди туххæй Туати Стэллæн лæвæрд æрцудæй ведомстви Кади гæгъæди.

Е ’мкосæг Хъайтухъти Эльвирæ Къора-Уорсдонæй æй, каст фæцæй Цæгат Иристони Медицинон академий дзæбæхгæнæн факультет æма равзурста терапевти дæснийадæ. Ординатури ахури рæстæг æрвист æрцудæй Дзæуæгигъæуи æвдæймаг поликлиникæмæ, æма си косгæ байзадæй. 2023 анзи рацудæй профессион цæттæдзийнадæ пульмонологибæл нæ бæсти раззагдæр уæлдæр ахургæнæндæнттæй еуеми – С.П. Боткини номбæл Мæскуйаг медицинон академий æма æнтæстгинæй куста терапевт æма пульмонологæй. Программæ «Гъæууон дохтир»-и нерæнгæ дуккаг мæйæ архайуй, æй фиццаг участоки терапевт, фал æхе цубур рæстæгмæ фæнзуйнагæй равдиста. Æ раздæри кусти бунатæй дæр Эльвири туххæй арфитæ ’рцудæй.

Сахар Дигорай райони центрон сæйгæдони сæйраг дохтири ихæстæ рæстæгмæ æнхæстгæнæг Ботъоти Олеся куд радзурдта, уотемæй 2024 анзæй 2026 анзи уæнгæ райони медицинон кустуæтти программæ «Гъæууон дохтир»-и фæлгæти косунцæ æхсæз адæймаги. Туати Стэллæ æма Хъайтухъти Эльвирæй уæлдай ма етæ ’нцæ Хъарман-Синдзигъæу, Дур-Дур æма станицæ Николаевскаяйи участокти терапевтæ Цъопбойти Лаурæ, Тауасити Таймораз æма Хосроти Зæлинæ, сæйгæдони хирургион хайади хирург Дзубити Валери. Анестезиолог-реаниматолог Хъаирти Тимури ба ’рхудтонцæ Тагъд агъази клиникон сæйгæдони реанимацион хайадæй. Уæхæн специалист сæ гъæуй, центрон сæйгæдони нæуæгæй сутки медæгæ еудадзуг кустгæнæн реанимацион службæ ке байгон уодзæнæй хæстæгдæр рæстæг, уой туххæй. «Сæ еугур дæр хъæбæр хуарз специалисттæ ’нцæ. Сæйгæдони разамунд æма райони цæргутæ сæ кустæй арази æнцæ», – фæббæрæг кодта Ботъоти Олеся.

Дигори райони центрон сæйгæдони администраци программæ «Гъæууон дохтир»-и фæлгæти гъавуй паллиативон хайади дохтир æма участоки педиатр æрбахонун Хъарман-Синдзигъæуи амбулаторимæ æма æ зæрдæ даруй, еци бунæттæмæ дæр ке ’рбацæудзæнæнцæ бæрнон, профессион æгъдауæй бæрзонд цæттæдзийнади хецау фæлмæнзæрдæ специалисттæ.

Вероникæ ПАХОМОВА