Нæ зундгонд поэт Хъазбегти Хъазбег æ тугъдон æмдзæвгитæй еуеми уотæ финста:

 Зонун, бæллис мæнмæ, мæ мадæ,
Бæллун дæмæ æз дæр,
Æма дæ фæндуй, цæмæй мæ кадæ
Ма уа тохи дæлдæр.

 Гъе уæхæн нифсæй разæнгард уогæй, Устур Фидибæстон тугъди рæстæг советон адæм тох кодтонцæ немуцаг-фашистон æрбалæборгути нихмæ æма фæууæлахез æнцæ. Гъе уæхæн нифсæй æхсаргин æнцæ, абони нæ Фидибæсти алли фудгæнгутæй багъæуай кæнуни сæрбæлтау ка тох кæнуй, нæ еци фæсевæд дæр. Сæрустур си ан… Уой хæццæ ба зæрдристæй хъонц кæнæн. Кадæртæ си се ’фсæддон ихæс кадгинæй исæнхæст кæнуни туххæй сæ цард ке иснивонд кодтонцæ, уой фæдбæл… Сæ рохс нæмттæ син имисæн, цитгин сæ кæнæн.

Мæнæ æрæги Уæрæсей Федераций Гæрзефтонг тухти æфсæддон полиций Цæгат Иристони  ахурадон центри бундоронбæл игонгонд æрцудæй циртдзæвæн, се ’фсæддон ихæс æнхæстгæнгæй ка фæммард æй, еци æфсæддонти номерæнæн.

Уой фæдбæл кадгин мадзали архайдтонцæ нæ республики Сæргълæууæг Сергей Меняйло, Уæрæсей гъæуайкæнуйнади æфсæддон полиций Сæйраг управлений хецау инæлар-болкъон Сергей Кураленко, Кургани облæсти сахар Шучьей æфсæддон комендатури службæгæнæг хестæр сержант Илья Сычев, дини æма æхсæнадон архайгутæ, республики æригон патриотон æзмæлд «Юнармий» минæвæрттæ…