Цæгат Иристони æрæги косæг балций адтæй Уæрæсей Федераций юстиций министр Константин Чуйченко.

Республикæмæ е ‘ссуди нисан адтæй, граждайнаг æхсæнадæмæ хауæг институттæ æма уагдæнттæ ци хузи косунцæ, уой исбæлвурд кæнун, уæдта, адæми, уæлдайдæр ахæст адæми бартæ куд гъæуайгонд цæунцæ, уой базонун.

Константин Чуйченко, фиццагидæр, бабæрæг кодта, ахæст адæми рæстæгмæ кæми дарунцæ, Дзæуæгигъæуи Къостай номбæл проспектбæл, еци изолятор. Министр æрзилдæй ахæстдони бæстихæйттæбæл, æркастæй, дзолфицæн цех, хуæруйнаггæнæн блок куд косунцæ, уомæ. Бабæрæг кодта санитарон хай. Аци рауæн ахæст адæми æнæнездзийнадæ бæрæг кæнунæн ес флюоро– æма рентген аппараттæ, ес сæмæ сæхе стоматологон къæбинет. Алли уати дæр ес гъæугæ уавæртæ. Ахæст адæмæн изолятори лæггадæ кæнунцæ дууадæс адæймаги. Министр бакастæй, ахæст адæми кæми дарунцæ, еци камеритæмæ дæр, фæууидта, ци уавæртæ син ес, уони, æма си аразийæй байзадæй.

Хъæбæр сагъæссаг уавæри æй изоляторæн æ сæйраг бæстихай. Æй хъæбæр рагон, арæзт æрцудæй 1855 анзи, æ фиццаг уæладзуг еудадзугдæр æй уомæл, уомæ гæсгæ ин нæдæр цалцæггæнæн ес, нæдæр æ райаразуни аргъ нæбал æй. Уомæ гæсгæ хаст æрцæудзæнæй изолятор сахарæй æндæдæр рауæнмæ рахæссуни унаффæ.

– Ахæст адæми кæми дарунцæ, уæхæн изолятор сахари астæу, цæрæн хæдзæртти ‘хсæн ке æй, е раст нæй, уомæй уæлдай ба ма е ихалуй сахари архитектурæ дæр, – загъта Константин Чуйченко.

Министр бабæрæг кодта республики тæрхондонæ, пъиристæфти дæр. Уой фæсте хецауади Хæдзари адтæй æмбурд.

Республики Сæргълæууæги ихæстæ рæстæгмæ æнхæстгæнæг Сергей Меняйло райарфæ кодта Константин Чуйченкойæн, Цæгат Иристон ке бабæрæг кодта, уой туххæй. Куд загъта, уотемæй граждайнаг æхсæнади къабази республики ес лухкæнуйнаг фарстатæ, зæгъæн, тæрхондони экспертизæ бæрзонддæр къæпхæнмæ исесуни, лæвар юридикон консультацитæ аразуни æма æндæр гъуддæгути. Æма, куд загъта, уотемæй, æ зæрдæ даруй, уæрæсейаг министрæн е ‘ссуди фæсте лухгонд ке æрцæудзæнæнцæ, уобæл.

Куд алли региони, уотæ Цæгат Иристони дæр гъæуама арæзт æрцæуа паддзахадон юридикон бюро.

– Нæ зæрдæ дарæн, 2024 анзмæ лухгонд ке ‘рцæудзæнæй лабораторий фарста дæр. Фал бал раздæр гъæудзæнæй исбæлвурд кæнун, циуавæр экспертизитæ араздзæнæй еци лаборатори, уой, – загъта министр.

Уой фæсте Константин Чуйченко æма Сергей Меняйло фембалдæнцæ республики Адвокатти палати минæвæртти хæццæ, сæ сæргъи палати президент Гаглойти Марк, уотемæй, уæдта нотариусти хæццæ æма дзубанди кодтонцæ, адвокати, нотариуси лæггæдтæ аразуни къабази ци фарстатæ ес, уонæбæл æма сæ ралух кæнуни мадзæлттæбæл.

Уæрæсейаг министри косæг балци кæронбæттæни Константин Чуйченко æма Сергей Меняйло дзиллон хабархæссæг фæрæзнити минæвæртти фарстатæн равардтонцæ дзуæппитæ.