Цæгат Иристони Сæргълæууæг Сергей Меняйло куд террори нихмæлæууæг республики къамиси разамонæг, уотæ æрæги исаразта аци къамиси æма республикон оперативон штаби еумæйаг æмбурд. Арæзт ба æрцудæй видеобастдзийнади хузи æма си архайдтонцæ барадæгъæуайгæнæг оргæнти минæвæрттæ, Хецауади иуонгтæ, Дзæуæгигъæу æма республики районти сæргълæугутæ.

Æмбурди уæлдай бундорондæр дзубанди цудæй æвзарæн кампаний бæнтти, зонундзийнæдти Бони æма Беслæни фудбæлахи номерæн бæнтти терроризм æма экстремизми фæззиндтитæ ма ’руадзуни мадзæлттæ ахедгæ хузи исаразунбæл. Зундгонд куд æй, уотемæй 18-20 сентябри Цæгат Иристони, куд еугур Уæрæсей, æвзардзæнæнцæ депутаттæ Уæрæсей Федераций Паддзахадон Думæмæ. Е ахсгиаг дзиллон гъуддаг æй, уомæ гæсгæ ба гъæлæс кæнуни рæстæг закъони ихæлдтитæ ма ’руадзун æма граждæнти æдасдзийнади сæйраг рахуæцæн æй æвзарæн участокти техникон ефтонггæрзтæй æнхæст ефтонггонддзийнадæ æма сæ кустгъондзийнадæ. Уой туххæй пайдагонд цæудзæнæй стационарон æма къохидаргæ æфсæйнагагорæнтæй, уæдта æвзарæн участоктæ исефтонг кæндзæнæнцæ видеоцæстдарди системитæй гъæлæсгæнæн азгъунститæ æма объектти алливарс.

Хецæнæй дзубанди цудæй уобæл дæр, æма, æвзарæн участоктæ ци субъектти ’нцæ, уордæмæ, фиццагидæр, ахурадон уагæдæнттæмæ гъæуама уагъд ма цæуонцæ, уонæми кæмæн неци кустаг ес, уæхæн адæймæгутæ. Уæлæнхасæн мадзæлттæ арæзт цæудзæнæй, æвзарæн къамистæмæ документаци ку баласонцæ, уæд, уæдта гъæугæ физикон уагæй гъæуай кæндзæнæнцæ æвзарæн участоктæ æхсæвигон дæр.

Дзубанди ма цудæй уобæл дæр, æма 18 сентябри Хонсар Иристони Президенти æвзурстити рæстæг гъæлæс кæнунæн ци цуппар участоки косдзæнæнцæ, уони гъæугæ техникæй исефтонг кæнун æма се ’дасдзийнади фарста бахинцун.

Федаргонд æрцудæнцæ барадон æма æдасдзийнади мадзæлттæ ахурадон уагæдæнтти зонундзийнæдти Бон бæрæг кæнуни рæстæг. Кадгин мадзæлттæ ци скъолати цæудзæнæнцæ 1-4 сентябри, етæ Уæрæсей Национ гвардий цæгатиристойнаг дæлхайади инженерон-саперон хайæдти косгути хæццæ  фæдæсгарæг куйти агъазæй басгардзæнæнцæ рæмодзæн æрмæг си иссеруни фæдбæл федаргонд графикмæ гæсгæ. Уой фæсте объекттæ гъæуай кæндзæнæнцæ æнæсцохæй, цалинмæ мадзæлттæ нæ райевгъуйуонцæ, уæдмæ сутки дæргъи.

Æмбурди ма куд рабæрæг æй, уотемæй еугур еци фарстати нерæнгæ ма нæхъæртондзийнæдтæ дæр ес. Дзубанди цудæй ахурадон уагæдæнттæ æмбæлгæ инженерон-техникон фæрæзнитæй ефтонггонд ке нæ ’нцæ æма террористон барадæихæлдтитæ еуварс кæнунмæ службæгæнгути æдзæттæдзийнади туххæй.

Нæ республики ахурадæ æма науки министр Алибегти Эллæ куд фегъосун кодта, уотемæй архайд цæуй ахурадон уагæдæнтти террорæй багъæуай кæнуни куст бæрзонддæр æмвæзадæмæ исесунбæл, сæрмагонд æргом æздахунцæ уагæвæрди домæнтæмæ гæсгæ объектти æмбæлгæ гъæуайгæнæн фадуæттæ исаразунмæ. Нуртæккæ си идарддæр цæунцæ видеоцæстдарди системитæ æма фæдеси кънопкитæ (тревожная кнопка), исаразуни куститæ.

Еугур еци фарстати фæдбæл дзубандимæ гæсгæ куд загъд æрцудæй, уотемæй ахурадон объекттæ гъæуай кæндзæнæнцæ сæрмагондæй бартæ кæмæ ес, айдагъдæр еци гъæуайгæнæг организацити косгутæ.

Æмбурдæн хатдзæгтæ кæнгæй, Сергей Меняйло уæлдай карзæй бафæдзахста уой, æма террори нихмæ къамиси еугур унаффитæ æнæмæнгæ æнхæстгæнгæ ке ’нцæ:

– Республики цæргути æдасдзийнадæ нин алцæмæй дæр сæйрагдæр гъуддаг æй. Террори нихмæ къамис æма Оперативон штаби унаффитæ гъæуама æнхæстгонд цæуонцæ амунд æмгъудтæмæ æнæкъулумпитæй. Еугур дзуапдæттæг службитæ, объектти техникон цæттæдзийнадæ æма алли мадзалмæ лæмбунæг цæстдаруни хæццæ æнгом баст æй адæми æдасдзийнадæ.

Республикæ Цæгат Иристон-Аланий Сæргълæууæг æма Хецауади пресс-службæ