22 июня 2024

СÆЙРАГДÆР ÆЙ АХУРГÆНÆГ!..

19.08.2022 | 11:59

Нæ республики педагогон косгутæ æрæги сæ аллианзон урух æмбурди æрдзубанди кодтонцæ Цæгат Иристони еумæйаг ахурадон тугъдади идарддæри райрæзти фарстатæбæл.

Æмбурди кадгин иуазгутæ адтæнцæ Уæрæсей Федераций рохсади министри хуæдæййевæг Андрей Корнеев, федералон агентадæ «Рособрнадзор»-и разамонæг Анзор Музаев.

Конференций архайгутæн зæрдиаг арфæ ракодта Сергей Меняйло æма æ радзубандий фæббæрæг кодта, ахуради къабази идарддæри райрæзт ке ‘й нæ республики социалон-экономикон бундортæй тæккæ сæйрагдæр:

– Хуæрзгъæдæ, нуриккон домæнтæн дзуапп ка дæттуй, уæхæн еумæйаг ахурадæ райсунæн гъæуама уа еугур фадуæттæ дæр, е æй нæ фиццаградон нисантæй еу. Скъолай гъомбæладæ есунцæ нæ кæстæртæ. Æма цийфæнди аллихузон методикæтæмæ гæсгæ ку косæн, уæддæр сæйрагдæр æй ахургæнæг, æ кустбæл æновуд ка ‘й, сувæллæнтти хе хъæболти хузæн ка рæвдауй, уæхæн адæймаг.

Ахуради къабази æцæг профессионалтæ ку коса, уæд нæ алли гъуддаг дæр исирæздзæнæй.

Архайдзинан, цæмæй алли ахургæнæг дæр райгонд уа æ кусти уавæртæй, æ миздæй, гъæуй мадзæлттæ агорун, цæмæй æригæнттæ разæнгард кæнонцæ æма æхсицгонæй æвзаронцæ аци гъæугæ дæсниадæ.

Республики Сæргълæууæг æхсицгонæй куд фегъосун кодта, уотемæй анзи кæронмæ не скъолати ке фæззиндзæнæй 1848 нæуæг бунати, 66 скъолай цалцæггонд æрцæудзæнæнцæ, сæ фулдæр цæттæ уодзæнæнцæ 1 сентябрмæ, иннетæ ба – анзи кæронмæ. Æма бафæдзахста, цæмæй ахургæнгутæ сæхуæдтæ дæр сæ цæстæ даронцæ арæзтадон-цалцæггæнæн куститæмæ.

Сергей Меняйло фегъосун кодта, хæстæгдæр рæстæг ахуради къабази материалон-техникон ефтонгади, ахурадон æма гъомбæладон нæуæг косæндæнтти арæзтади, скъолати лæггæдти хуæрзгъæдæдзийнади æнаййепдæр кæнуни гъуддæгути ци арæзт æрцæудзæнæй, етæ.

Нæ республики ахуради къабази косгутæн видеобастдзийнади фæрци арфæ ракодта Уæрæсей Федераций рохсади министр Сергей Кравцов.

Конференций сæйраг доклади хæццæ радзубанди кодта Республикæ Цæгат Иристон-Аланий ахурадæ æма науки министр Алибегти Эллæ.

Бони фæтки фарстатæбæл сæ гъудитæ, сæ феппайуйнæгтæ загътонцæ æма фæндæнттæ бахастонцæ ахуради къабази разамонгутæ, фæлтæрдгун специалисттæ æма эксперттæ.