Нæ Цитгин Уæлахези цуппаринсæй анзей бæрæгбони фæдбæл нæ республики дзиллитæн зæрдиагæй арфæ кæнуй Цæгат Иристони Сæргълæууæг Сергей Меняйло.

Æ арфи фиццагидæр уой баханхæ кодта, æма æнæгъæнæ Уæрæсей куд æй, уотæ Иристони дæр алли адæймагæн дæр Устур Фидибæстон тугъди анзфинст æй æ  бийнонти архивти æма сау-уорс къарти æвдист табуйаг имисуйнаг. Нæ республикæй фронтмæ ка рандæй, еци 95 мин адæймагемæй алли дуккаг дæр тугъди будури æносмæ байзадæй. Мингай адæймæгутæ фæскъилдуни æвæллайгæй хъиамæт кодтонцæ, сæхебæл нæ ауæрдгæй, агъаз кодтонцæ, цæмæй Уæлахез ралæудтайдæ еци табуйаг еугурадæмон гъуддагæн.

Нæ адæми еугур фæлтæрти уодиконди сæрустуйраг менеугути туххæй дзоргæй, нæ республики разамонæг уой дæр баханхæ кодта, æма абони нæ бæстæ æндагон тæссагдзийнадæй багъæуай кæнун бабæй ку багъудæй,  уæд мингай лæхъуæнтæ, цуппаринсæй анзей размæ сæ бабати хузæн, æнæ уæлдай ракæнæ-бакæнæй  Райгурæн бæсти сæрбæлтау тохмæ разæнгардæй цæун федæттонцæ. Е уой æвдесæн æй, æма нæ Райгурæн бæстæ нин еу ке æй, е нæ адæми еугур фæлтæртæн æй алцæмæй дæр сæйрагдæр! Рæстуодæй æй уарзун æма ибæл æновуд ун  нимад æй сæйраг æнкъарæнбæл. Уотæ адтæй, нур дæр æй æма алкæддæр уодзæнæй!