Аци фæдзæхст нæ рагфидтæлтæй байзадæй, æма нин абони дæр ма зундамонæнæн бæззуй – æнæмæнгæ æнхæсткæнуйнаг гъуддаг гъæуама рагацау исаразай. Æма еци загъдмæ гæсгæ æркæсуйнаг æй, нуртæккæ зуймон уавæрти архайунмæ цæйбæрцæбæл цæттæ ’нцæ цæрæнуатон-коммуналон къабæзтæ. Аци ахсгиаг фарстай фæдбæл æрæги сæрмагондæй дзубанди цудæй нæ республики Хецауади æмбурди.

Уоми цæрæнуатон-коммуналон хæдзаради, артаг æма энергетики министр Тамати Майрæн куд фегъосун кодта, уотемæй донæфсесадæ æма донуадзæн объектти райарæзти туххæй федералон программити фæлгæти, 2024 анзи ведомствæ гъæуама бундоронæй исараза 10 объекти. Проект «Кæдзос дон»-и фæрци республики Алагири дондзæуæн нæуæг хæтæлтæ исæвæрунбæл куст (фиццаг кезуй) идарддæр цæуй – объект техникон æгъдауæй нуриуæнгæ цæттæ ’й 90 проценти.

Нæ регион паддзахадон программæ «Цæгат Кавкази федералон зилди райрæзт»-и ке архайуй, е фадуат равардта Алагири райони хуæнхон гъæути донуадзæн хæтæлтæ нæугутæй баййевунæн. Разæнгардæй уобæл архайд цæуй поселоктæ Бурон, Садон, Галон, фæрсаг гъæутæ Уæллаг Згид æма Унали. Арæзтадон программæ гъæуама æнхæстгонд æрцæуа 2021-2025 æнзти.

Æмбурди ма æрдзубанди кодтонцæ, регионалон проект «Хуæрзвадуат горæттаг фалдзости исаразун» куд æнхæстгонд цæуй, уобæл. Тамати Майрæн фегъосун кодта, нуртæккæ 39 æхсæнадон бунатей куститæ ке фæцæнцæ 31 объекти, иннæ фæзуæтти ба идарддæр цæттæгонд цæунцæ. Зæгъæн, Дигорай Тогой-фурти гъæунги парк цæттæгонд цæуй, аци объект исуодзæнæй бийнонтæн зæрдæмæдзæугæ фæлладуадзæн бунат. Проекти амунд куд ес, уотемæй си уодзæнæй фестæгæйцæугутæн нæдтæ, велонæдтæ, тренажертæ æма сувæллæнтти гъазæн фæзтæ. Иснæуæг си кæндзæнæнцæ рохситæ, фæззиндзæнæй си хуæдтолгитæн æрлæууæн бунат, æдасдзийнадæмæ цæстдарæг видеофæлгæсæнтæ, е ’нæнездзийнадæ гъигæдард кæмæн æй, райони еци цæргутæн дæр си уодзæнæй еугур уавæртæ.

– Цæгат Иристони æнхæстгонд цæунцæ берæ федералон æма регионалон программитæ. Æма етæ еугурæй дæр гъæуама арæзт æрцæуонцæ нисангонд æмгъудмæ бæрзонд хуæрзгъæдæдзийнади хæццæ, – загъта æмбурди кæронбæттæни республики Хецауади Сæрдар Дзанайти Барис.