Евгъуд авдисæри арæзт æрцудæй сæрмагонд æмбурд, кæцими нæ республики Парламенти депутаттæ, Хецауади иуонгтæ, бунæттон хеунаффæйади разамунд базонгæ ‘нцæ Цæгат Иристон-Аланий Сæргълæууæги ихæстæ рæстæгмæ æнхæстгæнæг Сергей Ивани фурт Меняйлой хæццæ. Архайдта си Уæрæсей Федераций Æнхæстбаргин минæвар Цæгат Кавкази федералон зилди Юрий Чайка.

Æмбурди фиццаг радзубанди кодта Юрий Чайка. Е куд радзурдта, уотемæй Республикæ Цæгат Иристон-Аланий Сæргълæууæг Битарти Вячеслав æ куст ниууадзуни туххæй  барвæндонæй ниффинста курдиадæ. Уой фæсте Юрий Чайка бакастæй Президенти Указ, уомæ гæсгæ Сæргълæууæги ихæстæ рæстæгмæ æнхæстгæнæгæй нисангонд æрцудæй Сергей Меняйло.

Битарти Вячеслав разамонæги кустмæ бавналдта 2016 анзи феврали, уой фæсте фондз анзей дæргъи адтæй республики Сæргълæууæг, – загъта Юрий Чайка. – Раст зæгъун гъæуй, æ къохи берæ хуарз гъуддæгутæ бафтудæй. Е ‘мкосгути хæццæ уæззау социалон-экономикон уавæр бабæстон кодта, нæуæг кусти бунæттæ искодта. Еумæйаг уавæрмæ нæ кæсгæй, Цæгат Иристони экономикон бæрæггæнæнтæ рауадæнцæ дзæбæх, æнæнездзийнадæ гъæуайкæнуйнади косæндæнттæ фæгъгъомусгиндæр æнцæ. Арфæ кæнун Битари-фуртæн, республики ирæзтмæ ци байвæрæн бахаста, уой туххæй.

Æ радзубандий Юрий Чайка уой дæр баханхæ кодта, æма Сергей Меняйло Иристонæн æцæгæлон адæймаг нæй. Райгурдæй 1960 анзи, Алагири, службæ кодта Цæгатаг, Хъаспийаг, Сауденгизаг флотти. Ес имæ паддзахадон хуæрзеугутæ. Адтæй Президенти Æнхæстбаргин минæвар Сибираг федералон зилди, Севастополи губернатор, кæми куста, уоми бæрнонæй, зæрдиагæй.

– Æй фæлтæрдгун паддзахадон адæймаг, æ уоди менеугутæ рабæрæг æнцæ, сибираг сахартæ дæлдон ку фæцæнцæ, уæд, – загъта Юрий Чайка.

Æма Сергей Меняйломæ е ‘ргом раздахгæй, æ дзубандибæл бафтудта:

– Хъазар Сергей Ивани фурт, Президент дæ Цæгат Иристони Сæргълæууæги ихæстæ æнхæстгæнæгæй ке иснисан кодта, уомæй дæмæ æвдесуй е ‘ууæнкæ. Алкæддæр цæттæ дæн æнхусмæ, уотæ – федералон хецауадæ дæр.

Уæрæсей Президенти Æнхæстбаргин минæвари гъудимæ гæсгæ, гъæуама æмхузонæй уæн æмцæдесонтæ, уæд иристойнæгти цард æма фæрнугадæ уодзæнæнцæ æнтæстгин.

Уой фæсте радзубанди кодта Сергей Меняйло æма загъта:

– Иристон мæ фидибæстæ æй, ами нигæд æнцæ мæ ниййергутæ. Кæмифæнди косгæй, алли хатт дæр æнхус кодтон республикæн. Арфиаг дæн Битарти Вячеславæй, ци гъуддæгутæ исаразта, уой туххæй. Раздæр си ка куста, еци разамонгутæн, Иристони сæрбæлтау ка фæллойнæ кæнуй, еци еугур адæмæн. Фал ма нæ нурма берæ цидæртæ гъæуй искæнун. Президент мæ ку иснисан кодта, уæд загътон, Цæгат Иристонæн хецæн ирæзти программæ исаразуни туххæй. Мæ хæццæ исарази ‘й.

Сергей Меняйло æ радзбуандий куд баханхæ кодта, уотемæй идарддæри кусти сæйрагдæр нисан æй еугур мадзæлттæ дæр исаразун, цæмæй æнтæстгиндæрæй цæуа æ райрæзти надбæл:

-Е ахсгиаг æма вазуггин гъуддаг æй, фал нæ къохи бафтуйдзæнæй. Нæ географион бунат, нæ традицитæ нин фадуат дæттунцæ размæ рацæунæн. Гъæуама æрбангом уæн, айдагъдæр уотемæй бафтуйдзæнæй нæ къохи еци нисан. Фадуæттæ нин ес. Иронау дзорун, финсун, кæсун, тæлмацгæнæг мæ нæ гъæуй. Цæттæ дæн кустмæ, косун ке фæндуй, уони хæццæ. Рæстæг хумæтæг нæй, фал уæддæр мæ зæрдæ уæбæл дарун æма еугур равгитæй, фадуæттæй дæр раст æма æнхæстæй пайдагонд цæудзæнæй, нæ еумæйаг куст æнтæстгин уодзæнæй.

Æмбурди уой фæсте радзубанди кодта Битарти Вячеслав. Райарфæ ракодта Уæрæсей Президентæн, вазуггин фарстатæ лух кæнгæй æ фарсмæ ке адтæй, агъаз ин ке кодта, уой фæдбæл. Сергей Меняйло ба æхемæ ци ихæстæ есуй, етæ æ къохи куд бафтуйуонцæ, уæхæн арфæ ин ракодта.