Мегъти сарсинæй арв

Сæлфунæг лæуаруй.

Сонт бæлæсти телгæ уомæл сæртæ

Фæссæйгæ ’нцæ, цума.

Уазал нез мæ маруй. –

Нæбал уинун нæ гъог синæр цæгъдгæ.

«Фæндараст, фæндараст» –

И хъурройти фæдбæл

Ратæхунцæ меднеун сифтæртæ.

Фæндараст, о мæ Уарзт,

Киндзæ адтæ, фæззæг,

Сугъзæрийнæдзигго ’ма къæртрæзти.

Мегъти сарсинæй арв

Сæлфунæг лæуаруй,

Рагзумæг фæххатуй нур æ дустæ,

Фæлласуй бони гъар

Цæугæдон ивадæй.

Мæгур гъæумæ стонг анз æрæсмуста.

Нæ зундгонд поэт Скъодтати Эльбруси финст аци æмдзæвги медес лæдæрд æй: фæззæги-рагзумæги бонигъæдæ кæд æма «сæлфунæг лæуаруй», уæддæр си уод ба нæ мæгур кæнуй – зæрдæ ’й лæдæруй, уавæр рæстæгмæ ке æй, уой, æма исонибон бабæй райдзаст æма уод федаргæнæг ке уодзæнæй. Гъе дин поэзий уæлтæмæнадæ – адæймагæн цийфæнди уавæрти дæр нифсдæттæг, разæнгардгæнæг ун. Æма уæхæн уодæнцойнæхæссæг менеугутæй ба æнхæстæй-æнхæстдæр æй Скъодтати Эльбруси исфæлдистадæ.

Скъодтати Бариси фурт Эльбруси туххæй абони нæ дзубанди уомæ гæсгæ ’й, æма ибæл хуæрзæрæги, 14 ноябри  исæнхæст æй фондз æма æртинсæй анзи. Зæрдиагæй дин арфæ кæнæн, Эльбрус, нæ зæрдтагон æрдхуард æма æмгустгæнæг. Æнтæстгин, æнæнез, дæ бийнонти æма хеуæнтти, уæлдайдæр ба дæ кæстæрти, дæ зæрдтагон адæми цийнæдзийнæдтæй хайгин уо!