24 майя 2022

ТӔССАГ УАВӔРТӔМӔ ГӔСГӔ МАДЗӔЛТТӔ ДӔР ФӔККАРЗДӔР ӔНЦӔ

21.08.2021 | 09:35

Коронавируси ӕууӕлтӕмӕ гӕсгӕ исӕвзургӕ санитарон-эпидемиологон уавӕр карздӕр ке кӕнуй, уой нимайгӕй, Республикӕ Цӕгат Иристон-Аланий Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей МЕНЯЙЛОЙИ  Указӕй уӕлӕнхасӕн гӕрӕнтӕ ӕвӕрд цӕуй дзиллон мадзӕлттӕ (кувдтитӕ, киндзӕхсӕвӕртӕ, зиани кӕндитӕ ӕма уотӕ идарддӕр) аразуни фӕтки.

Уой хӕццӕ, Указӕй бӕлвурд амунддзийнӕдтӕ лӕвӕрд ӕрцудӕй ӕхсӕнадон хуӕлцади организацити кусти туххӕй дӕр. Сӕрмагондӕй документи бӕрӕггонд ӕрцудӕй, еугур санитарон-эпидемиологон цӕстдарди домӕнтӕ дӕр ӕнӕмӕнгӕ ӕнхӕстгӕнгӕ ке  ‘нцӕ, е. Уони нимӕдзи  – 1,5 метри социалон хе изолдаруни фӕткӕ дӕр.

Куд зонӕн, уотемӕй республики Сӕргълӕууӕги Указӕй 2021 анзи 23 июнӕй фӕстӕмӕ сӕ тухи  ‘нцӕ уӕлӕнхасӕн санитарон цӕстдарди уӕхӕн мадзӕлттӕ:

– ӕхсӕнадон хуӕлцади организацитӕ гъӕуама косонцӕ айдагъдӕр 6 сахаттемӕй 23 сахаттей уӕнгӕ;

– рӕстӕгмӕ гъӕуама уорӕд ӕрцӕуа базарадон центри рази косӕг сувӕллӕнтти гъазӕнуӕттӕ ӕма фуд-кортти архайд, ӕхсӕвигон клубтӕ, дискотекитӕ, кафӕн фӕзтӕ ӕма ӕндӕр уӕхӕн бунӕттӕ дӕр гъӕуама уонцӕ ӕхгӕд;

– театртӕ, кинотеатртӕ ӕма концертон залтӕ гъӕуама косонцӕ уӕхӕн фӕткӕмӕ гӕсгӕ: еци-еу рӕстӕг зали еугур бунӕттӕн се  ‘мбес гъӕуама уа уӕгъдӕ;

– паддзахадон хецаудзийнади ӕма бунӕттон хеунаффӕйади оргӕнтӕмӕ, медицинон  организацитӕ ӕма афтектӕмӕ, базарадон организацитӕмӕ, автовагзалтӕ ӕма станцитӕмӕ, уӕдта ӕндӕр ӕхсӕнадон бунӕттӕмӕ бацӕугӕй, маскитӕ  ‘нцӕ ӕнӕмӕнгӕ даргӕ;

– еугур организацити разамонгутӕ дӕр гъӕуама фадуӕттӕ исаразонцӕ санитарон-эпидемиологон цӕстдарди мадзӕлттӕ ӕнӕкъулумпийӕй ӕнхӕст кӕнунӕн;

– кустдӕтгутӕн амунд ӕрцудӕй, цӕмӕй, 65 анземӕй уӕлӕмӕ кӕбӕл цӕуй, уӕдта аллихузон хроникон незтӕ ке тухсун кӕнунцӕ, еци косгути раййевонцӕ идарддзӕфмӕ архайди фӕткӕмӕ, кенӕ ба син радтонцӕ аллианзон отпуск федералон закъонӕвӕруйнади уагӕвӕрди бундорбӕл;

– зиани кӕндитӕ ка аразуй, етӕ гъӕуама ӕрбацӕуӕг адӕми ефтонг кӕнонцӕ маскитӕ ӕма дезинфекцион фӕрӕзнитӕй, уой хӕццӕ, архайонцӕ, цӕмӕй саударӕн ӕмбурди  архайгути нимӕдзӕ уа минкъийдӕр.

Нур еци фӕткӕмӕ уӕлӕнхасӕн бафтауйнӕгтӕ хаст ӕрцудӕй. Уотӕ, ӕхсӕнадон хуӕлцади косӕндӕнтти кувдтитӕ, киндзӕхсӕвӕртӕ ӕма ӕндӕр дзиллон мадзӕлттӕ аразгӕй, зали еци-еу рӕстӕг 100 адӕймагемӕй фулдӕр гъӕуама ма уа. Уой хӕццӕ, стъолти  ‘хсӕн гъӕуама уа 1,5 метрей бӕрцӕ.

Республики Сӕргълӕууӕги Указӕй цӕстдарӕг ведомствитӕн амунд ӕрцудӕй, цӕмӕй санитарон-эпидемиологон цӕстдарди аци ӕма иннӕ мадзӕлттӕ ӕнхӕст кӕнуни фӕткӕмӕ уа лӕмбунӕгдӕр цӕстдард.

Уой туххӕй фегъосун кодта Республикӕ Цӕгат Иристон-Аланий Сӕргълӕууӕги  ӕма Хецауади пресс-службӕ.