Аци бӕнтти  Паддзахадон телерадиокомпани «Алани» бӕрӕг кӕнуй цалдӕр ахсгиаг бӕрӕгбони – республикон радиой исарӕзтбӕл исӕнхӕст ӕй 90 анзи, нӕнацион телеуинунадӕбӕл 60 ӕма цӕгаткавказаг телевизион киноаййевадӕбӕл ба 55 анзи. Уой фӕдбӕл ӕрӕги ци цитгин мадзал арӕзт ӕрцудӕй, уоми архайдта нӕ республики Сӕргълӕууӕг Сергей Меняйло, зӕрдиагӕй райарфӕ кодта телерадиокомпаний косгутӕн. Ӕ радзубандий уотӕ загъта:

– Сумах ӕнхӕст кӕнетӕ ахсгиаг куст, уой ахедундзийнадӕ агъазиау ӕй нӕ абониккон цардарӕзти хабӕрттӕ ӕнтӕстгиндӕрӕй аразуни гъуддаги. Уӕ бӕрзонд дӕснидзийнадӕн уин устур аргъ кӕнӕн, никки ба ма ми федарӕй ӕруагӕс кӕнуй, идарддӕр дӕр уӕхӕн ахедгӕ куст ке кӕндзинайтӕ, е. Мӕ зӕрдӕ уин зӕгъуй сабур ӕма фӕрнӕйдзаг цард!..

Республики Сӕргълӕууӕги унаффӕй телерадиокомпаний косгути устур къуар хуарзӕнхӕгонд ӕрцудӕнцӕ аллихузон хуӕрзеугутӕй.

Майдан «Иристони Намус»-ӕй хуарзӕнхӕгонд ӕрцудӕнцӕ Уӕрӕсей паддзахадон телерадиокомпаний генералон директори хуӕдӕййевӕг Рифат Сабитов, радиой Хӕдзари уӕлдӕр къӕпхӕни зӕлонрежиссер Газайти Зойӕ ӕма радиобакаститӕ амонӕг Къадзати Станислав.

Телеуинунади ӕма радиоигъосунади зӕрдиаг кусти туххӕй Республикӕ Цӕгат Иристон-Аланий Кади грамотитӕй исхуарзӕнхгин кодтонцӕ Уӕрӕсей паддзахадон телерадиокомпаний косгутӕ Андрей Никитини, Дмитрий Щугореви, радиой шеф-редактор Баллати Рити, амонӕг Хӕдарцати Лиди, телеуинунади шеф-редактор Богазти Аслани, оператор  Гайти Хетӕги, сӕрмагонд уацхӕссӕг Хъалӕгати Надежди, рохсдӕттӕг Александр Тюльтеви.

Республики Сӕргълӕууӕги Арфи финстӕгутӕ лӕвӕрд ӕрцудӕнцӕ Фидарати Зӕринӕн, Гаглойти Светланӕн, Дзугати Нэллийӕн, Хъарати Аллӕн, Хъарати Нателлӕн, Фидарати Ларисӕн, Юлия Филатовайӕн, Хӕуитати Зитӕн, телерадиокомпани «Алани»-й разамонӕг Хъусати Тимурӕн.