28 майя 2022

ТЕРРОРИЗМИ НИХМӔ ТОХ – НӔ ЕУМӔЙАГ ИХӔС ӔЙ!..

15.10.2021 | 10:16

Республики Сӕргълӕууӕг Сергей Меняйло архайдта терроризми нихмӕ Национ комитети ӕмбурди. Видеобастдзийнади фӕрци конд ӕрцудӕй Мӕскуй, амудта ‘й Ӕдасдзийнади федералон служби разамонӕг Александр Бортников. Архайдтонцӕ ма си ӕдасдзийнади Федералон служби регионалон управлений разамонӕг Игорь Тиньгаев ӕма терроризм ма ‘руадзуни къамиси аппарати разамонӕг Олег Баранов.

Ӕмбурди дзубанди цудӕй Цӕгат Кавкази терроризми фудракӕндтитӕ ма ‘руадзуни туххӕй фарстатӕбӕл. Куд баханхӕ кодтонцӕ, уотемӕй Цӕгат Кавкази фӕстаг ӕртӕ анзей дӕргъи уорӕд ӕрцудӕнцӕ 20 террористон фудбӕлахи, терроризми хӕццӕ баст ӕндӕр уӕхӕн фудракӕндтитӕ ба 30, бӕлах исаразунвӕндӕ кӕмӕ адтӕй, уӕхӕн адӕймӕгутӕй 84 еуварсгонд ӕрцудӕнцӕ, сӕ агъазгӕнгутӕй ба бауорӕдтонцӕ 379 адӕймаги.

Александр Бортников куд радзурдта, уотемӕй дуйнеуон террористон организацитӕ архайунцӕ региони уавӕр фудракӕндтитӕй низгули кӕнунбӕл, интернетӕй пайда кӕнгӕй, терроризм парахат кӕнунцӕ, фӕсевӕдӕй кӕцидӕр хай сӕхердигӕй фӕккӕнунцӕ, сӕ архайдӕн ӕхца иссерунцӕ. Муниципалон ӕмвӕзади ахедгӕ ӕма комкоммӕ куст кӕнунмӕ агъазиау ӕргом ӕздахуй терроризми нихмӕ архайди Национ комитет.

Бунӕттон разамунд ӕма хецауади оргӕнтӕн се ‘мгустадӕ гъӕуама арӕзт цӕуа ахедгӕ ӕма бӕлвурд хузи, уӕлдай лӕмбунӕг ӕргом ӕздахун гъӕуй уомӕ, цӕмӕй цӕргутӕ террористтӕн агъазгӕнгути нимӕдзӕмӕ гъӕуама ма ‘фтуйуонцӕ. Фӕсевӕдӕн гъӕуама лӕдӕрдгонд уонцӕ фудгӕнгути ахъелӕн миутӕ, сӕ знаггадӕхӕссӕг гъудитӕ ӕма фӕндитӕ. Уой туххӕй ба, хецауадон къабӕзтӕй терроризми нихмӕ мадзӕлттӕ аразунӕй ихӕсгин ка ‘й, етӕ гъӕуама цӕттӕ кӕнонцӕ гъӕугӕ ӕрмӕг, хъӕртун ӕй кӕнонцӕ ирӕзгӕ фӕлтӕртӕмӕ, лӕдӕрун син сӕ кӕнонцӕ.

Ӕмбурди архайгутӕ иснисан кодтонцӕ бунӕттон хеунаффӕйади ӕма терроризми нихмӕ къамисти ахедгӕ архайди туххӕй уӕлӕнхасӕн мадзӕлттӕ, терроризми нихмӕ куст Цӕгат Кавкази фӕййахедгӕдӕр кӕнуни туххӕй.

Аци игъосункӕнуйнагмӕ ба ма нӕхердигӕй уой бафтауйнаг ан, ӕма терроризми ӕма уой хӕццӕ баст ӕндӕр фудракӕндтити нихмӕ айдагъ барадон оргӕнти косгутӕ нӕ, фал нӕ дзиллӕ еугурӕй дӕр еузӕрдиуонӕй архайуонцӕ. Знаггадӕхӕссӕг гъуддӕгутӕ аразгутӕ некӕбӕл ауӕрдунцӕ, уӕлдай син нӕй, сӕ фудмиутӕй ке бастъалдзӕнӕнцӕ, е. Уомӕ гӕсгӕ ба сӕ нихмӕ гъӕуама еумӕйаг архайдӕй ӕрлӕууӕн ӕма син федар нихкъуӕрд дӕттӕн.

 

Нӕ уацхӕссӕг