Уæрæсей Федераций Фæллойнадон закъонадæмæ гæсгæ адæймаг косгæ къуæрей дæргъи гъæуама коса 40 сахатти.

Цума æнæуой ба цæйбæрцæ бауодзæнæй адæймаги бон бакосун, дæ кустæн дин дæхемæ гæсгæ, фагæ мизд фист ку цæуа, уæд? Уæхæн фарста дзиллон цæстингас бæлвурдгæнгутæ равардтонцæ, кусти бунæттæ ка агоруй адæмæн, еци уагæдони косгутæмæ. Куд рабæрæг æй, уотемæй сауæнгæ дувæр миздбæл дæр сæ рæстæмбеси бон нæй бакосун.

Ке бафарстонцæ, етæ адтæнцæ 1600 адæймагей бæрцæ. Уæрæсей кустбæл хуæст адæми 48 проценти арази нæ ‘нцæ къуæремæ 40 сахаттемæй фулдæр косунбæл, сауæнгæ син уæлæнхасæн ку федонцæ, уæддæр. Уони ‘хсæн фулдæр æнцæ силгоймæгтæ (59 проценти). Æма уомæн æнæ уотæ уæн дæр нæййес. Фулдæр бакоснубæл арази ‘нцæ нæлгоймæгтæ. Етæ ‘нцæ сæйраг хæдзардартæ, уомæ гæсгæ ба цæттæ ‘нцæ уæлæнхасæн косунбæл, се ‘нæнездзийнадæбæл нæ мæтæгæнгæй.

Уæрæсей кусти лæуд адæмæй сæ кусти мизд 50 мин сомемæ кæмæн хъæртуй, етæ нæ ‘нцæ арази къуæрей дæргъи 40 сахаттемæй фулдæр косунбæл. Уомæй фулдæр улупа ка есуй, етæ ба арази ‘нцæ никкидæр ма фулдæр косунбæл.

Косгути 39 проценти ба арази ‘нцæ 40-50 сахатти косунбæл дæр, 3 проценти ба 60-80 сахатти косунбæл дæр хуарз мизди хæццæ.

Айдагъдæр 4 проценти арази ‘нцæ 80 сахаттемæй фулдæр косунбæл къуæрей дæргъи. Уони ‘хсæн æнцæ, 35-45 анзи кæбæл цæуй, уæхæн фæсевæд, æцæг сæ кусти мизд 100 мин сомемæй уæлæмæ куд уа, уотемæй.

Æгæр берæ рæстæг ка фæккосуй, етæ ахиддæр гъаст кæнунцæ, се ‘нæнездзийнадæ лæмæгъ ке æй, уомæй. Фал царди æхцагъæуагæ ке æййафунцæ, уомæ гæсгæ ба æнæбари дæр цæунцæ уæлæнхасæн кустмæ. Е, гъай-гъайдæр,  хуæрзæрдæмæ нæ зиннуй фæллойнæгæнæг адæймагбæл. Кустдæтгутæн ба сæ фулдæр хай уоййасæбæл нæ мæтæ кæнунцæ сæ косгути æнæнездзийнадæбæл, цæйбæрцæ син гæнæн ес, уойбæрцæ, куд фæззæгъунцæ, цъирунцæ адæймаги хъаурæ, федгæ ба – къапеккитæ.

Расагъæс кæнетæ, еци уæлæнхасæн къапеккитæ уæ уотемæй гъæунцæ, уобæл.